އެމްޑީޕީގެ ކުރީގެ ޗެއާޕާސަން އަދި ރައްޔިތުންގެ މަޖިލީހުގެ ކުރީގެ ނައިބު ރައީސް މޫސާ މަނިކު (ރީކޯ މޫސަ) އަލުން އެމްޑީޕީއަށް ގުޅިވަޑައިގެން ސޮއިކުރައްވާފައިވާ މެންބާޝިޕް ފޯމު ހަވާލުކުރައްވައިފި އެވެ.

ރީކޯ މޫސަ ސޮއިކުރައްވާފައިވާ ފޯމާ ހަވާލުވެވަޑައިގަތީ އެމްޑީޕީގެ މިހާރުގެ ޗެއާޕާސަން އަދި އިކޮނޮމިކް މިނިސްޓަރު ފައްޔާޒު އިސްމާއީލެވެ.

އެ ރަސްމިއްޔާތުގެ އެމްޑީޕީގެ ޓްވިޓާއިން ހިއްސާކޮށްފައިވާއިރު އެ ތަނުގައި އެމްޑީޕީގެ އެންމެ އިސް ލީޑަރު އަދި ރައީސް އިބްރާހީމް މުހައްމަދު ސޯލިހް ވެސް ހުންނެވި އެވެ.

އޭގެ އިތުރަށް ޑިފެންސް މިނިސްޓަރު މާރިޔާ އަހުމަދު ދީދީއާއި، ފޮރިން މިނިސްޓަރު އަބްދުﷲ ޝާހިދާއި، އެމްޑީޕީގެ ޕާލިމެންޓްރީ ގްރޫޕްގެ ލީޑަރު އަދި ރައްޔިތުންގެ މަޖިލީހުގެ ހިތަދޫ އުތުރު ދާއިރާގެ މެންބަރ މުހައްމަދު އަސްލަމް ވެސް ތިއްބެވި އެވެ.

އެމްޑީޕީގެ ޕާލިމެންޓްރީ ގްރޫޕްގެ ޑެޕިއުޓީ ލީޑަރު އަދި ރައްޔިތުންގެ މަޖިލީހުގެ ހެންވޭރު ދެކުނު ހުސައިން ޝަހީމް (އަނދުން ހުސައިން) އާއި އެމްޑީޕީގެ ޗެއާޕާސަންގެ ނައިބު އަދި ރައްޔިތުންގެ މަޖިލީހުގެ ބާރަށު ދާއިރާގެ މެންބަރު އަހުމަދު އަބްދުﷲ ވެސް ތިއްބެވި އެވެ.

ރައްޔިތުންގެ މަޖިލީހުގައި ތިން ދައުރު އަދާކުރައްވާފައިވާ ރީކޯ މޫސަގެ ސިޔާސީ ހަޔާތް ފެއްޓެވީ ވެސް އެމްޑީޕީންނެވެ. އޭނާ އެމްޑީޕީ ދޫކޮށްލީ އަށާރަވަނަ ރައްޔިތުންގެ މަޖިލީހުގައި ހުންނަވަނިކޮށެވެ.

ޕީޕީއެމްއާ ގުޅިވަޑައިގަތުމަށް ފަހު، 2018 ވަނަ އަހަރުގެ ރިޔާސީ އިންތިހާބުގައި ޕީޕީއެމްގެ ރިޔާސީ ކެންޑިޑޭޓް އަދި އޭރުގެ ރައީސް އަބްދުﷲ ޔާމީނަށް ރީކޯ މޫސަ ކެމްޕޭން ވެސް ކޮށްދެއްވި އެވެ.

ފަހުން ފަހުން މޫސަ ގެންދެވީ ވެސް ރައީސް ސޯލިހަށް ތައުރީފް ކުރައްވަމުންނެވެ. އެމްޑީޕީގެ ދެ ފެކްޝަނެއް އޮތް އިރު، ރައްޔިތުންގެ މަޖިލީހުގެ ރައީސް މުހައްމަދު ނަޝީދުގެ ފެކްޝަނަށް ފާޑުވިދާޅުވެ ވާހަކަ ދައްކަވާފައިވެސް ވެއެވެ.