ޔޯގާ ޑޭގައި ހަމަނުޖެހުން ހިންގި މައްސަލައިގައި އިދިކޮޅު ޕްރޮގްރެސިވް ޕާޓީ އޮފް މޯލްޑިވްސްގެ ކައުންސިލް މެމްބަރު މުހައްމަދު އިސްމާއިލަށް ދައުވާ ކުރުމުން އެ ޕާޓީން އެކަން ކުށްވެރިކޮށްފި އެވެ.
ޕީޕީއެމުން މިއަދު ނެރުނު ބަޔާނެއްގައި ބުނީ ޖޫން 21، ވަނަ ދުވަހު ރަސްމީ ބޯޅަދަނޑުގައި ހަމަނުޖެހުން ހިނގީ، ހަމަނުޖެހުމަށް މަގުފަހިވާ އެގޮތަށް ސަރުކާރުން ކަންކަން ރާވާފައި އޮތުމުން ކަމަށެވެ. އަދި ބުނެފައި ވަނީ މުހައްމަދު އިސްމާއިލާއި ދައުވާ ލިބޭ ބާކީ 17 މީހުންގެ މައްސަލަ ކޯޓަށް ހުށަހެޅީ ކަމުގެ ހަގީގަތް ފޮރުވަން ކަމަށެވެ.
"މުހައްމަދު އިސްމާއިލް އެ ދުވަހު ގަލޮޅު ދަނޑަށް ވަދެފައެއް ވެސް ނުވޭ. އަދި އޭނާއަކީ އެ ހަމަނުޖެހުން ހިންގި އިރު އެތަނުގައި ހުރި މީހެއް ވެސް ނޫން. އެހެންކަމުން ޕްރޮސެކިއުޓާ ޖެނެރަލްގެ އެ ނިންމުން އެންމެ ހަރުކަށި އިބާރާތުން ކުށްވެރި ކުރަން،" ޕީޕީއެމުން ނެރުނު ބަޔާނުގައި ބުނެފައިވެ އެވެ.
ޔޯގާ ޑޭ ހަރަކާތުގެ ބައެއް ހިސާބުތަކުން މުހައްމަދު އިސްމާއިލް ފެނިފައިވެ އެވެ. އަދި ޔޯގާ ޑޭއާ ދެކޮޅު ހެދި މީހުން އުފުލީ ޕީޕީއެމްގެ އޮފީހުން މުހައްމަދު އިސްމާއިލް ނެރުނު ދިދަތަކެކެވެ.
ޕީޕީއެމްގެ ބަޔާނުގައި އިންޑިއާ ސަރުކާރަށް ވެސް ވަރަށް ބޮޑަށް ފާޑުކިޔާފައިވެ އެވެ. އަދި ޔޯގާ ޑޭގެ ހަމަނުޖެހުމުގައި އިންޑިއާގެ އަތެއްވާ ކަމަށް އެ ޕާޓީން ތުހުމަތު ކުރި އެވެ.
އެ ހަމަނުޖެހުން ހިނގީ ޔޯގާ ޑޭގެ ހަރަކާތެއް ދަނޑުގައި ބާއްވާތީ އެކަމާ ދެކޮޅަށް އަޑުއުފުލަން ދިޔަ ބަޔަކު ދަނޑަށް ވަދެގަތުމުންނެވެ. ދަނޑަށް ވަނީ ސެކިއުރިޓީ ބަލަހައްޓަން ތިބި ފުލުހުންނަށް ހަމަލާދިނުމަށްފަހެވެ. އަދި ފަހުން ޔޯގާ ޑޭ ހަރަކާތުގައި ބައިވެރި ބައެއް މީހުންނަށް ވެސް ހަމަލާދިނެވެ.
އެ މައްސަލައިގައި ދައުވާ ކުރި މީހުންގެ ތެރެއިން ޝެއިހު އާދަމް ނިޝާން އާއި ޝެއިހު ފަޒްލޫން މުހައްމަދު ހިމެނެ އެވެ. ދެ ޝެއިހުން ހަމަނުޖެހުމުގައި އަމަލީ ގޮތުން ބައިވެރިނުވި ނަަމަވެސް ދައުލަތުން ކުރަނީ ހަމަނުޖެހުމަށް ހިތްވަރުދިންކަމުގެ ދައުވާ އެވެ.
