ފެނަކަ ކޯޕަރޭޝަނުގެ މެނޭޖިން ޑިރެކްޓަރާއި ޗެއާމަނަށް ބޮޑެތި ތުހުމަތުތަކެއް ކުރެއްވުމަށް ފަހު، އެ ކުންފުނީގެ ޑެޕިއުޓީ މެނޭޖިން ޑިރެކްޓަރު ކަމުން އިސްތިއުފާ ދެއްވި އިބްރާހިމް ވަހީދު (އެންސްޕާ އިބުރޭ) ގެ ތުހުމަތުތަކަކީ "ބުހުތާން ދޮގު" ކަމަށް އެ ކުންފުނީގެ މެނޭޖިން ޑިރެކްޓަރުގެ މަގާމުގައި ހުންނެވި އަހްމަދު ސައީދު ވިދާޅުވެއްޖެ އެވެ.

އިބްރާހީމް ވަހީދު ފެނަކައިން އިސްތިއުފާ ދެއްވީ މިމަހުގެ ހަތް ވަނަ ދުވަހު ކަމަށް ވިޔަސް، އޭނާގެ އިސްތިއުފާގެ ސިޓީ ސޯޝަލް މީޑިއާގެ ބައެއް ޕްލެޓްފޯމްތަކުގައި ދައުރުވާން ފެށީ އިއްޔެ އެވެ. އެ ސިޓީގެ ކޮޕީއެއް "އަދަދު" އަށް ވެސް ލިބިފައިވާއިރު އޭގައި ވަނީ ގިނަ ތުހުމަތުތަކެއް ސައީދު އާއި ޗެއާމަންގެ މަގާމުގައި ހުންނެވި މުހައްމަދު ރަޝީދަށް ކޮށްފަ އެވެ.

އެގޮތުން، އިބްރާހިމް ވަހީދުގެ އިސްތިއުފާގެ ސިޓީގައި ވިދާޅުވެފައި ވަނީ ކުންފުނީގެ ދަރަނި ބޮޑުވެފައިވަނީ ޗެއާމަން އާއި އެމްޑީގެ ނާގާބިލް ކަމުންނެވެ. އެ ދެ ބޭފުޅުން ފެނަކަ ހިންގުމާ ހަވާލުވެވަޑައިގެންނެވި އިރު އެ ކުންފުނީގެ ދަރަނީގެ ގޮތުގައި އޮތީ 680 މިލިޔަން ރުފިޔާ ކަމަށް ވިޔަސް މިހާރު ދަރަނި 1.3 ބިލިޔަން ރުފިޔާއަށް އަރާފައިވާ ކަމަށް އޭނާ ވިދާޅުވެފައިވެ އެވެ.

"އެއީ ރަނގަޅު އަދަދެއް ވެސް ނޫން، ރަނގަޅު ވާހަކައެއް ވެސް ނޫން. އަޅުގަނޑުމެން ފެނަކައާ ހަވާލުވިއިރު ވެސް އެތަނުގައި ވަރަށް ބޮޑު ދަރަންޏެއް އޮތް. އިތުރެއް ނުވޭ. ގަވާއިދުން ނުދެއްކުނު ނަމަވެސް އަޅުގަނޑުމެން މިދަނީ ދައްކަމުން. ކުރީގެ ދަރަނި އެދަނީ ބޮޑުވަމުން،" އެ ތުހުމަތުތަކާ ގުޅޭގޮތުން "އަދަދު" ނޫހާ ވާހަކަ ދައްކަވަމުން ސައީދު ވިދާޅުވި އެވެ.

ހަމައެހެންމެ، އެ ކުންފުނީގެ އެއްވެސް ޑޭޓާއަކަށް އިބުރޭއަށް އެކްސެސް ނުވެވޭގޮތަށް ހަދާފައިވާ ކަމަށް އިބުރޭގެ ސިޓީގައި ވިދާޅުވެފައި ވެއެވެ. އަދި، އެއީ ސައީދު އާއި ރަޝީދު "ޒާތީ ހަސަދައެއް" ފިލުވުމަށް ކުރި ކަމެއް ކަމަށް އޭނާ ވިދާޅުވެފައި ވެއެވެ.

އެކަމާ ގުޅިގެން ސައީދު ވަނީ އިބުރޭގެ މައްޗަށް ބޮޑު ތުހުމަތެއް ކުރައްވާފަ އެވެ.

"ފެނަކައިގެ ޑޮކިއުމެންޓުތައް ވަގަށް ނަގައި އެކި ދިމަ ދިމާލަށް އެ އެއްޗެހި ޝެއާކުރާ ކަން ފެނަކައިގެ ސާވާ ބެލިއިރު، އެމަނިކުފާނު (އިބުރޭ) ގެ އެކްސެސް ބެލިއިރު އެކަން ކުރާކަން ސާބިތުވާތީ އެކްސެސް ކަނޑާލީ،" އިބުރޭގެ މައްޗަށް ތުހުމަތު ކުރައްވަމުން ސައީދު ވިދާޅުވި އެވެ.

ހަމައެހެންމެ، ފެނަކައިގެ ޑެޕިއުޓީ މެނޭޖިން ޑިރެކްޓަރުގެ ހައިސިއްޔަތުން އޭނާ އަދާކުރައްވަން ޖެހިވަޑައިގަންނަވާ މަސްއޫލިއްޔަތު އަދާކުރެއްވުމަށް ޗެއާމަން އާއި މެނޭޖިން ޑިރެކްޓަރު ހުރަސް އަޅުއްވަމުން ގެންދަވާ ކަމަށް ވެސް އިބުރޭގެ އިސްތިއުފާ ސިޓީގައި ވިދާޅުވެފައިވެ އެވެ.

ނަމަވެސް، ސައީދު ވިދާޅުވާ ގޮތުން އިބުރޭ "އަބަދުވެސް ހުންނަވަނީ ކޮންމެވެސް ޗުއްޓީއެއް" ގައި އެވެ.

"ވާޖިބު އަދާކުރުމަށް، ޒިންމާ އަދާކުރުވުމަށް، ޒިންމާދާރު ކުރުވުމަށް، ލިޔެކިޔުމުން ހުންނާނެ ތަންތަން ހަވާލުކޮށްފައި. އެއްވެސް އެއްޗެއް [ޒިންމާ] ބަދަލުކޮށްފައެއް ނުވާނެ،"

ގިނަ ތުހުމަތުތަކެއް ކުރެއްވުމަށް ފަހު ފެނަކައިގެ ޑީއެމްޑީގެ މަގާމުގައި ހުންނެވި އިބުރޭ އިސްތިއުފާ ދެއްވާފާއިރު އެ ކުންފުނީގެ މައްޗަށް އަބަދުވެސް މިފަދަ ތުހުމަތުތައް އަންނަނީ ކުރެވެމުންނެވެ.

ނަމަވެސް، ހިޔާނާތާއި ފަސާދައިގެ އެއްވެސް އަމަލަކަށް ފެނަކަ ތެރޭގައި މިހާރު ޖާގައެއް ނޯންނާނެ ކަމަށް ތަކުރާރުކޮށް އެކުންފުނިން މީގެ ކުރިން ވެސް ބުނެފައިވެ އެވެ.