މީގެ އަށް މަސް ކުރިން، މިދިޔަ ޑިސެމްބަރު މަހު، ގައުމީ ގްރޯން ޕްރީ މުބާރާތުގައި ގައުމީ ދެ ރެކޯޑް މުގުރާލައި، އެ މުބާރާތުގެ އެންމެ މޮޅު އަންހެން އެތުލީޓަކަށް ހޮވުނު އާމިނަތު ޖާއިޝާ ޖުނީޒް، މި އަހަރަށް ވެސް އެކި އަޒުމުތަކެއް ކަނޑައެޅި އެވެ. އެކަމަކު، މި އަހަރު އޭނާ އެކި ތަޖުރިބާ ކުރަން ޖެހުނަސް ކޮންމެ ފަހަރެއްގައި ވެސް ފެންނަނީ ތަފާތު ހިތްވަރެއް ނެރެެގެން އެނބުރި އަންނަތަނެވެ.

އެ ގޮތުން މީގެ ތިން މަސް ކުރިން ފަޔަށް ލިބުނު އަނިޔާއެއްގެ ސަބަބުން ޖާއިޝާ އަށް ޓްރެއިނިންއާ ދުރުގައި މުއްދަތެއް ހޭދަކުރަން ޖެހުނެވެ. އޭނާގެ ކޯޗު އަބްދުﷲ އިބްރާހިމް (އަބުޅޯ) ދިޔައީ ޖާއިޝާ އަށް ދޭންޖެހޭ އެހީތެރިކަން ފޯރުކޮށްދީ ކުރިއަށް ދިއުމަށް ހިތްވަރު ދެމުންނެވެ.

އަނިޔާ އިން ރިކަވާވުމާއި ފޯމު ނަގަހައްޓަން ކުރި މަސައްކަތުގައި ޖާއިޝާ އަށް ޓައިމް ޓްރަޔަލްގައި ބޭނުންވާ އަމާޒު ވާސިލްނުވެ ދިޔަ ކަމުގައި ވިޔަސް އޭނާ ކުރަމުން ދިޔަ މަސައްކަތަށް ބަދަލެއް ނާދެ އެވެ.

އެ ޓްރެކުގައި ކުރިއަށް ދިޔައިރު، ޖާއިޝާ އަށް ހިތްވަރު ލިބުނީ މިދިޔަ ޖޫން މަހު ތިން ވަނަ ދުވަހު، ޓޯޓަލް ފިޓްނަސް ގްރޫޕް (ޓީއެފްޖީ) އިން ބޭއްވި ދުވުން، "އެމްވީރަން"ގެ އެއް ވަނަ ލިބުމެވެ. ކޯޗު އަބުޅޯ ސިފަކުރާގޮތުގައި އެއީ ޖާއިޝާގެ ކޮންފިޑެންސަށް މުހިންމު ރޭހެކެވެ.

އެކަމަކު، އެ ރޭހަށް ފަހު، އޭނާ ޓްރެއިނިން ކުރިއަށް ގެންދަމުން އަންނަނިކޮށް އިއްޔެ ފެށި އެސޯސިއޭޝަން ޗެމްޕިއަންޝިޕް ފެށެން ހަފްތާ އަކަށް ވެފައި ވަނިކޮށް މާލޭގައި މި އުޅޭ ހުންގަނޑު ޖައިޝާ އަށް ޖެހުނެވެ.

އެކަމަކު ފަސް ބެލުމެއްނެތި ޓްރެއިނިން އަށް އަލުން ނުކުތްތާ ހަފްތާއެއް ވެސް ނުވަނިސް ޖެހި ރޭހުގައި ޖާއިޝާ މި ވަނީ ތަފާތު ދައްކައިފަ އެވެ.

އިއްޔެގެ ރޭހުގައި ޖާއިޝާ ދުވަނީ: އޭނާ ވަނީ 5000 މީޓަރު ދުވުމުން ރަން މެޑަލް ހޯދާފައި.-- ފޮޓޯ: އަބްދުﷲ އިޔާން/ އަދަދު

އިއްޔެ ހަވީރު ކުޅިވަރު އެކުވެނި ސިންތެޓިކް ޓްރެކުގައި ކުރިއަށްދިޔަ އަންހެނުންގެ 5000 މީޓަރު ދުވުމުގެ އެއް ވަނަ ހޯދި ޖާއިޝާގެ ޓައިމިން އަކީ 20 މިނިޓް 17.02 ސިކުންތެވެ. ދެ ވަނަ އަށް ދިޔަ މަރިިޔަމް އަބްދުލް ކަރީމް (މަރީ) ރޭސް ނިންމީ 20 މިނިޓް 27.09 ސިކުންތުންނެވެ. އަދި ތިން ވަނަ ހޯދި އައިޝަތު ރިޝްމީގެ ޓައިމިން އަކީ 20 މިނިޓް 46.10 ސިކުންތުންނެވެ.

"ހުންގަނޑު ޖެހިގެން އުޅެފައި، ރަނގަޅަށް ޕްރެކްޓިސް ނުކުރެވި ހުރެ، އެނބުރި އައިސް މާގިނަ ދުވަހެއް ނުވެ ޖައި 5000 މީޓަރުގެ އެ ރޭހުން އެއް ވަނަ ހޯދީ، އަސްލު ޓާގެޓް ކުރީ (ރެކޯޑަކަށް) 18 އިން ރޭސް ޖަހަން. އެކަމަކު، ބަލިވެގެން ބޭނުންވި ގޮތަށް ޓްރެއިނިން ކުރިއަށް ނުގެންދެވުނީމަ ދެން ޓާގެޓް ޖެހީ، އެއް ވަނަ ހޯދަން ރޭހުގެ، އެކަން ހާސިލް އެ ކުރީ ޖައިގެ ވަރަށް ހިތްވަރުން،" އަބުޅޯ ބުންޏެވެ.

އިއްޔެ ހެނދުނު އަންހެނުންގެ 4 ގުނަ 400 މީޓަރު ދުވުމުގެ ރިލޭގައި ޖައިޝާ ހިމެނޭ ޓްރެކް އެންޑް ފީލްޑް އެސޯސިއޭޝަން ޓީމުން ވަނީ ދެ ވަނަ ހޯދައިފަ އެވެ. އެ އިވެންޓްގެ އެއް ވަނަ ހޯދި އައިލެންޑް ރަނާސް މޯލްޑިވްސްގެ ޓައިމިން އަކީ 4 މިނިޓް 38.66 ސިކުންތެވެ. ދެ ވަނަ އަށް ދިޔަ ޓްރެކް އެންޑް ފީލްޑް އެސޯސިއޭޝަނުން ރޭސް ނިންމީ 4 މިނިޓް 48.23 ސިކުންތުންނެވެ. ތިން ވަނަ ހޯދި ކުޑަ ހުސެން ސްޕޯޓްސް އެކެޑަމީގެ ޓައިމިން އަކީ 5 މިނިޓް 14.20 ސިކުންތެވެ.

ޖާއިޝާ އަށް މިއަދު އޮތީ އަންހެނުންގެ 800 މީޓަރު ދުވުމުގެ އިވެންޓާއި އަންހެނުންގެ 1500 މީޓަރު ދުވުމުގެ އިވެންޓް އެވެ. ޖާއިޝާ ވަނީ އެންމެ ފަހުން ބޭއްވި ގައުމީ ލެވަލްގެ ދެ މުބާރާތުގައި ވެސް މި ދެ އިވެންޓުން ރަން މެޑަލް ހޯދައިފަ އެވެ. މިދިޔަ އަހަރުގެ ގްރޯން ޕްރީގައި ޖާއިޝާ ވަނީ 1500 މީޓަރު ދުވުމުގެ ގައުމީ ރެކޯޑް ވެސް މުގުރާލައިފަ އެވެ.