ލިވާތު ކުރުމާއި ސިހާގުގެ ކުށަކީ ޖިނާއީ ބޮޑެތި ކުށްތަކުގެ ތެރޭގައި ހިމެނޭ ދެ ކުށް ކަމުގައި ކަނޑައެޅުމަށް ޖިނާއީ އިޖުރާއަތުގެ ގާނޫނަށް އިސްލާހު ހުށަހަޅައިފި އެވެ.

ލިވާތު ކުރުމުގެ ކުށަކީ ދެ ފިރިހެނަކު ޖިންސީ ގުޅުން ހިންގުމެވެ. އަދި, ސިހާގުގެ ކުށަކީ ‫‬އަންހެނަކު އަންހެނަކާއި ޖިންސީ ގުޅުން ހިނގުމެވެ.

އެ ދެ ކުށް ޖިނާއީ ބޮޑު ކުށެއްގެ ގޮތުގައި ބަޔާންކުރުމަށް ޖިނާއީ އިޖުރާއަތުގެ ގާނޫނުގެ 22 ވަނަ މާއްދާއަށް އިސްލާހު ހުށަހެޅުއްވީ ޖުމްހޫރީ ޕާޓީގެ ލީޑަރު, މާމިގިލީ ދާއިރާގެ މެންބަރު ގާސިމް އިބްރާހިމެވެ.

މިހާރު ގާނޫނު އޮތް ގޮތުން, ޖިނާއީ ބޮޑެތި ކުށްތައް ގޮތުގައި ކަނޑައަޅާފައިވަނީ 12 ކުށެކެވެ.

އެ އިސްލާހު ހުށަހަޅުއްވައި ގާސިމް ވިދާޅުވެފައިވަނީ އެ ދެ އަމަލަކީ އިސްލާމް ދީނުގައި ވަރަށް ބޮޑަށް ނަހީކުރައްވާފައިވާ ހުތުރު ފާހިޝް އަމަލެއް ކަމަށެވެ. އެހެންވެ, އެ ދެ ކުށަކީ ރާއްޖޭގައި ޖިނާއީ ބޮޑު ކުށެއް ކަމަށް ކަނޑައަޅާފައި އޮންނަން ޖެހޭ ކަމަށް ގަބޫލު ކުރައްވާ ކަމަށް އޭނާ ވިދާޅުވި އެވެ.

އެއް ޖިންސުން ގުޅުން ހިންގާ މީހުންނަކީ މުޖުތަމައުއަށް ނުރައްކާ ބައެއް ކަމަށާއި އަދި އެމީހުންގެ ވަސްވާސް އެމީހާގެ އާއިލާއަށާއި މުޅި މުޖުތަމައުއަށް ފޯރާނެ ކަމަށެވެ. އެހެންވެ, އެބައިމީހުން މުޖުތަމައުން އެކަހެރިކުރަން ޖެހޭކަން ގާސިމް ފާހަގަކުރެއްވި އެވެ.

ގާނޫނުލްއުގޫބާތުގެ 411 ވަނަ މާއްދާ މިހާރު އޮތް ގޮތުން ކައިވެނިކޮށްގެން ހުރި މީހަކު އެއް ޖިންސުން ގުޅުން ހިންގައިފިނަމަ, ކުށް އޮތީ ޖިނާޔަތުގެ ފަސް ވަނަ ދަރަޖައިގެ ކުށެއް ކަމުގަ އެވެ. އެއީ ދެ އަހަރަށްވުރެ ދިގު ނޫން މުއްދަތަކަށް ޖަލު ހުކުމެކެވެ. ކައިވެންޏެއްގެ މަތީގައި ނުވާ މީހެއްނަމަ, ޖުނައިހުގެ ދެވަނަ ދަރަޖައިގެ ކުށެކެވެ. އެއީ, ހަ މަސް ދުވަހުގެ ޖަލު ހުކުމެކެވެ.