މާލޭގައި މިނީ ބަހުގެ ހިދުމަތް ގާއިމްކުރުމުގައި އެމްޓީސީސީއާ މާލެ ސިޓީ ކައުންސިލުން އެންމެ ފަހުން އެއްގަލަކަށް އަރައިފި އެވެ.
މާލޭގައި މިނީ ބަހުގެ ހިދުމަތް ފަށަން ކުރިން ތާރީހު ދީފައި ވަނީ ޖުލައި މަހަށެވެ. ނަމަވެސް އެ ހިދުމަތް ގާއިމްކުރުމުގައި މާލެ ސިޓީ ކައުންސިލުގެ އެއްބާރުލުން ނުލިބޭ ކަމަށް އެމްޓީސީސީގެ ސީއީއޯ އާދަމް އާޒިމް ވަނީ މީގެ ކުރިން ވިދާޅުވެފަ އެވެ.
ނަމަވެސް އޭނާ އިއްޔެ "އަދަދު"އަށް ވިދާޅުވީ މިހާރު ސިޓީ ކައުންސިލާއި ޕްލޭނިން މިނިސްޓްރީއާ ގުޅިގެން މިނީ ބަހުގެ ހިދުމަތް ގާއިމްކުރުމުގެ މަސައްކަތް ކުރަމުންދާ ކަމަށެވެ.
މިނީ ބަހުގެ ހިދުމަތް ލަސްވީ، މާލޭގެ ބޮޑެތި މަގުތަކުގައި ހުރި ޕާކިންޒޯނުތައް ހުސްކުރަން ޖެހޭތީ އެވެ.
މާލެ ސިޓީ ކައުންސިލުގެ މީޑިއާ އޮފިޝަލް މިއަދު "އަދަދު"އަށް ވިދާޅުވީ ރައީސް އޮފީހާއި ޕްލޭނިން މިނިސްޓްރީ އަދި ކައުންސިލުން އެއްބަސްވި ގޮތަށް އެ މަސައްކަތް ކުރިއަށްދާ ކަމަށެވެ. އަދި ޕާކިން ސްލޮޓްތައް ހެދޭނީ، ސަރުކާރުން ކައުންސިލާ ހަވާލުކުރަންޖެހޭ ބިންތައް ސާފުކޮށް، ހަވާލު ކުރުމުން ކަމަށް ވެސް އެ ކައުންސިލުން ބުނެ އެވެ.
"ކައުންސިލާ ޕާކިން ސްލޮޓްތައް ހަދަން ހަވާލުކުރަން ޖެހޭ ބިންތައް ސާފުކޮށްފަ އަދި ހަވާލު ނުކުރާތީ ޑިލޭ ވަމުން ދަނީ،" އޭނާ އިތުރަށް ވިދާޅުވި އެވެ.
މާލޭގައި މިނީ ބަހުގެ ހިދުމަތް ތައާރަފު ކުރުމަކީ ރައީސް އިބްރާހިމް މުހައްމަދު ސޯލިހްގެ 100 ދުވަހުގެ ރިޔާސީ ވައުދެކެވެ. ނަމަވެސް މި ސަރުކާރަށް ހަތަރު އަހަރުވީ އިރުވެސް އެ ވައުދު ނުފުއްދި އޮތް އިރު އެ ހިދުމަތް ފަށަން ތަފާތު ތާރީހުތައް ދީފައިވެ އެވެ. ނަމަވެސް އެ ހިދުމަތް މިހާތަނަށް ފަށާފައެއް ނުވެ އެވެ.
މިނީ ބަހުގެ ހިދުމަތް ގާއިމްކުރުމަށް އެމްޓީސީސީން މިހާރު ވަނީ 36 މިނީ ބަސް ގެނެސް، ބަސްތައް ދުއްވަން މުވައްޒަފުން ތަމްރީނު ކުރަން ފަށައިފަ އެވެ.
