އަވަށްޓެރި އިންޑިއާގެ ހޮސްޕިޓަލްތަކަށް ދައުލަތުގެ ހެލްތު އިންޝުއަރެންސް ނިޒާމު، "އާސަންދަ" އިން އަހަރަކު 100 މިލިޔަނަށް ވުރެ ގިނަ ރުފިޔާ ހަރަދުވާކަމަށް ތަފާސް ހިސާބުތަކުން ދައްކައިފި އެވެ.

އާސަންދައިން "އަދަދު"އާ ހިއްސާކުރި ހިސާބުތަކުގައިވާ ގޮތުން މިދިޔަ ހަ އަހަރު ދުވަހުގެ ތެރޭގައި އިންޑިއާގެ ހޮސްޕިޓަލްތަކަށް އާސަންދައިން އެންމެ މަދުން ހަރަދުވި އަހަރު ވެސް 100.6 މިލިޔަން ރުފިޔާ ހަރަދުވި އެވެ.

ކޮވިޑް-19 ގެ ބަލިމަޑުކަމާ ހެދި އެތައް މަހެއް ވަންދެން ރާއްޖޭން ބޭރަށް ދަތުރުނުކުރެވޭ ގޮތް މެދުވެރިވި 2020 ވަނަ އަހަރަކީ ބޭރުގެ ހޮސްޕިޓަލްތަކަށް އެންމެ މަދުން ފައިސާ ހަރަދުވާނެ އަހަރު ކަމަށް ބެލެވުނަސް، އެންމެ މަދުން ހަރަދުވީ 2017 ވަނަ އަހަރު އެވެ.

ކޮވިޑް-19ގެ ލޮކްޑައުންއާ އެކު ވެސް 2020 ވަނަ އަހަރު އިންޑިއާގެ ހޮސްޕިޓަލްތަކަށް އާސަންދައިން 104.3 މިލިޔަން ރުފިޔާ ހަރަދުވި އެވެ.

ހިސާބުތަކުން ދައްކާ ގޮތުގައި އިންޑިއާގެ ހޮސްޕިޓަލްތަކަށް އާސަންދައިން އެންމެ ބޮޑު ހަރަދެއް ކުރީ 2019 ވަނަ އަހަރު އެވެ. އެ އަހަރު އެކަނި 244.6 މިލިޔަން ރުފިޔާ ހަމަ އެކަނި އިންޑިއާގެ ހޮސްޕިޓަލްތަކަށް އާސަންދައިން ހަރަދުކުރި އެވެ.

އިންޑިއާގެ ހޮސްޕިޓަލްތަކަށް ހަރަދުކުރި ފައިސާ 2017-2022

• 2017: 100.6 މިލިޔަން ރުފިޔާ
• 2018: 199.5 މިލިޔަން ރުފިޔާ
• 2019: 244.6 މިލިޔަން ރުފިޔާ
• 2020: 104.3 މިލިޔަން ރުފިޔާ
• 2021: 203.5 މިލިޔަން ރުފިޔާ
• 2022: 96.8 މިލިޔަން ރުފިޔާ

އިންޑިއާގެ ހޮސްޕިޓަލްތަކުން މީހުން ބޭސްކުރަން އާސަންދައިން ހަރަދުކުރި ފައިސާގެ ބޮޑު ބައެއް ގޮސްފައި ވަނީ ހިސާބުތަކުން ދައްކާ ގޮތުގައި ކޮޗިންގައި ހުންނަ އަމްރިތާ ހޮސްޕިޓަލަށެވެ. އިންޑިއާގެ ހޮސްޕިޓަލްތަކަށް އާސަންދައިން އެންމެ ބޮޑު ހަރަދެއް ހިނގި، 2019 ވަނަ އަހަރު އެ ހޮސްޕިޓަލަށް އެކަނި 104.7 މިލިޔަން ރުފިޔާ ހަރަދުވި އެވެ. ދެން އެންމެ ގިނައިން އެ ހޮސްޕިޓަލަށް ފައިސާ ހަރަދުވި ކަމަށް ހިސާބުތަކުން ދައްކަނީ 2021 ވަނަ އަހަރު އެވެ. އެ އަހަރު 91.4 މިލިޔަން ރުފިޔާ ހަރަދުވި އެވެ. އެހޮސްޕިޓަލަށް އެންމެ މަދުން ހަރަދުކޮށްފައި އޮތީ 2017 ވަނަ އަހަރު އެވެ. އެ އަހަރު ހަރަދުވީ 33.1 މިލިޔަން ރުފިޔާ އެވެ.

އާސަންދައިން ހިއްސާކުރި ހިސާބުތަކުގައިވާ މިދިޔަ ހަ އަހަރުގެ ތެރޭގައި އަވަށްޓެރި ސްރީލަންކާގެ ހޮސްޕިޓަލްތަކަށް އާސަންދައިން ހަރަދުކޮށްފައި ވަނީ އަހަރަކު ގިނަވެގެން ތިން މިލިޔަން ރުފިޔާ އެވެ. އެެގައުމުގެ ހޮސްޕިޓަލްތަކަށް އާސަންދައިން އެންމެ ބޮޑު ހަރަދެއް ކުރީ 2019 ވަނަ އަހަރު އެވެ. އެއީ 2.99 މިލިޔަން ( ގާތްގަނޑަކަށް ތިން މިލިޔަން ރުފިޔާ) އެވެ. ލަންކާގެ ހޮސްޕިޓަލްތަކަށް އެންމެ މަދުން ފައިސާ ހަރަދުވީ 2021 ވަނަ އަހަރު އެވެ. އެ އަހަރު ހަރަދުވީ 1.3 މިލިޔަން ރުފިޔާ އެވެ.

ސްރީލަންކާގެ ހޮސްޕިޓަލްތަކަށް ހަރަދުކުރި ފައިސާ 2017-2022

• 2017: 2.6 މިލިޔަން ރުފިޔާ
• 2018: 1.8 މިލިޔަން ރުފިޔާ
• 2019: 2.9 މިލިޔަން ރުފިޔާ
• 2020: 1.3 މިލިޔަން ރުފިޔާ
• 2021: 410،458.ރ ( ހަތަރު ލައްކަ ދިހަ ހާސް ހަތަރުސަތޭކަ ފަންސާސް އަށް ރުފިޔާ)
• 2022: 183،655.ރ ( އެއް ލައްކަ އަށްޑިހަ ތިން ހާސް ހަ ސަތޭކަ ފަންސާސް ފަސް ރުފިޔާ)

އާސަންދައިގެ މި ހިސާބުތަކުން ދައްކާ ގޮތުގައި އަވަށްޓެރި އިންޑިއާ އާއި ސްރީލަންކާގެ ހޮސްޕިޓަލްތަކަށް މިދިޔަ މިދިޔަ ހަ އަހަރު ދުވަހުގެ ތެރޭގައި ހޭދަވި ފައިސާގެ ޖުމްލަ 958.8 މިލިޔަން ރުފިޔާ ( ގާތްގަނޑަކަށް އެއް ބިލިޔަން ރުފިޔާ) އަރަ އެވެ. މިއީ ދަރުމަވަންތަ ހޮސްޕިޓަލް އިމާރާތްކުރަން ހަރަދުވި ފައިސާގެ ގާތްގަނޑަކަށް ދެބައިކުޅަ އެއްބަޔާ އެއްވަރުގެ އަދަދެކެވެ. ދަރުމަވަންތަ ހޮސްޕިޓަލް އިމާރާތްކުރަން ދައުލަތުން ހަރަދުވީ 2.2 ބިލިޔަން ރުފިޔާ އެވެ.