ސްރީލަންކާގެ ރައީސް ކަމުގެ މަގާމުން އިއްޔެ އިސްތިއުފާ ދެއްވި ގޮތަބަޔާ ރާޖަޕަކްސަ، ރާއްޖެއިން ޓްރާންސިޓްވުމަށް ހުއްދަ ދިނީ ލަންކާ ސަރުކާރުގެ އެދުމަކަށް ކަމަށް ދިވެހި ސަރުކާރުން ބުނެފި އެވެ.

ފޮރިން މިނިސްޓްރީން ރޭ ނެރުނު ބަޔާނެއްގައި ބުނީ، ސްރީ ލަންކާގެ އަސްކަރީ މަތިންދާބޯޓެއްގައި އެ ގައުމުގެ އޭރުގެ ރައީސް، ގޮތަބަޔާ ރާޖަޕަކްސަ އާއި އެމަނިކުފާނުގެ އަނބިކަނބަލުން ރާއްޖެ އެތެރެވުމަށް ކްލިއަރެންސް ދިނީ ލަންކާ ސަރުކާރުން އެކަމަށް ރަސްމީކޮށް އެދުމުން ކަމަށެވެ.

އެގޮތުން ރާއްޖޭގައި ޓްރާންސިޓްވުމަށް މިމަހު 13ގައި ރާއްޖެ އެތެރެވުމަށް ހުއްދު ދިނުމަށްފަހު ގޮތަބަޔާ ވަނީ އިއްޔެ ސިންގަޕޫރަށް ވަޑައިގެންފަ އެވެ.

ރައީސް ގޮތަބަޔާ ރާއްޖެ ވަޑައިގެންނެވީ އެމަނިކުފާނުގެ ދެ ބޮޑީގާޑުންނާއި އަނބިކަނބަލުންނާއެކު އެވެ. އެމަނިކުފާނަށް ވެލާނާ އިންޓަނޭޝަނަލް އެއާޕޯޓުން ސެކިއުރިޓީ ފޯރުކޮށްދިނީ ފުލުހުންނާއި ސިފައިންނެވެ.

ގޮތަބަޔާ ރާއްޖެ ވަޑައިގެންނެވީ އަންގާރަ ދުވަހުގެ ދަންވަރު 2:50 ގައި ސްރީ ލަންކާގެ އަސްކަރީ އުޅަނދެއްގަ އެވެ. ސިންގަޕޫރަށް ވަޑައިގަތީ ރާއްޖޭގައި 32 ގަޑިއިރު ހޭދަ ކުރެއްވުމަށްފަހު އެވެ.

ގޮތަބަޔަ ރާއްޖެ ވަޑައިގަތީ މިދިޔަ ހޮނިހިރު ދުވަހު އެމަނިކުފާނުގެ ގެކޮޅަށް ލަންކާގެ އާންމުން ވަދެގަތުމުގެ ކުޑައިރުކޮޅެއް ކުރިން ފިއްލެވުމަށްފަހު އެވެ. ފުރަތަމަ މަސައްކަތް ކުރެއްވި ކަމަށްވަނީ ޑުބާއީއަށް ވަޑައިގަތުމަށެވެ.

ރައީސް ގޮތަބަޔާ ރާއްޖެ ވަޑައިގެންނެވިއިރު ވައުދުވެވަޑައިގެންފައި އޮތީ އިއްޔެ މެންދުރު އިސްތިއުފާ ދެއްވާނެ ކަމަށެވެ. ފަހުން ރާއްޖޭގައި ހުންނަވައި ގާނޫނު ހަދާ މަޖިލީހުގެ ރައީސަށް ފޯނުން ގުޅުއްވައި އިއްޔެ ރޭ ދަންވަރު 12:00 ޖެހުމުގެ ކުރިން އިސްތިއުފާ ދެއްވާނެ ކަމަށް ވިދާޅުވި އެވެ. އެމަނިކުފާނުގެ އިސްތިއުފާ ސިޓީ ލަންކާގެ ގާނޫނު ހަދާ މަޖިލީހަށް ލިބިފައިވާކަން ރޭގެ ވަގުތެއްގައި އެ ގައުމުގެ ނޫސްވެރިން ވަނީ ބުނެފަ އެވެ.