މީގެ 11 އަހަރު ކުރިން ވިލިމާލޭގައި ގުރޫޕަކުން ހަމަލާދީ މަރާލި ނ. މާޅެންދޫ ވައިޓްހައުސް, އަހުމަދު މިރުޒާ އިބްރާހިމްގެ މަރުގެ މައްސަަލައިގައި ދައުވާ ކޮށްފައިވާ އެކަކުގެ މައްޗަށް ދަށު ކޯޓުން އިއްވާފައިވާ މަރުގެ އަދަބުން އޭނާ ސަލާމަތްކޮށް 17 އަހަރުގެ ޖަލު ހުކުމެއް ހައި ކޯޓުން މިއަދު އިއްވައިފި އެވެ.
އިސްލާމީ ޝަރީއަތުގައި މަރަށް މަރު ހިފޭނީ މަރާލި މީހާގެ ވާރިސުން އެކަމަށް ބޭނުންވާ ނަމަ އެވެ. އެއީ, ވާރިސުންގެ ހައްގެއްގެ ގޮތަށް އޮންނައިރު އެންމެ މީހަކު އެކަމަށް ދެކޮޅު ހެދި ނަމަވެސް, މަރުގެ އަދަބު ކަނޑައެއް ނޭޅޭނެ އެވެ.
މިރުޒާ މަރުގެ މައްސަލާގައި މަރަން ހުކުމް ކޮށްފައިވަނީ ފުވައްމުލައް ސިޓީ, ޒާވިއާ، އަބްދުﷲ ނަޒީފް އަދި ވ. ފަޒީލާމަންޒިލް, މުހައްމަދު ޝިފާއު އެވެ. ޝިފާއުގެ މައްސަލަ ހައި ކޯޓުގައި އޮތް އިރު ނަފީޒްގެ މައްސަލަ އޮތީ ސުޕްރީމް ކޯޓުގަ އެވެ.
ހައި ކޯޓުގައި ޝިފާއުއަށް މައާފު ކޮށްފައިވާ ކަމަށް މިރުޒާގެ ބައްޕަ ބުނެފައިވާއިރު، ސުޕްރީމް ކޯޓުގައި މިރުޒާގެ ހުރިހާ ވާރިސުން ވަނީ ނަފީޒަށް މައާފުކޮށްފަ އެވެ.
ޝިފާއުގެ މައްސަލާގައި ހައި ކޯޓުން އިއްވި ހުކުމުގައިވާ ގޮތުން، އެންމެ ވާރިސަކު ވެސް ދެކޮޅު ހަދައިފި ނަމަ އިސްލާމީ ޝަރީއަތުގައިވާ ގޮތުގެ މަތިން ގާތިލަށް މަރުގެ އަދަބު ނުދެވޭނެ ކަމުގަ އެވެ. އެހެންވެ ތައުޒީރީ އަދަބެއްގެ ގޮތުގައި 17 އަހަރުގެ ޖަލު ހުކުމެއް ކަނޑައެޅުއްވީ އެވެ.
ފަނޑިޔާރު މުހައްމަދު ނިޔާޒާއި ފަނޑިޔާރު މުހައްމަދު ފައިސަލް އަދި ފަނޑިޔާރު ހުސައިން ޝަހީދުގެ އިއްތިފާގުން އިއްވި އެ ހުކުމުގައިވާ ގޮތުން ޖަލު ހުކުމުގެ ގޮތުގައި 17 އަހަރާއި ހަ މަސް ކަނޑައެޅީ ގާނޫނުލް އުގޫބާތުގެ ދަށުން އަދަބުގެ ދަރަޖަ މަތި ކުރުމަށް ވެސް ފަހުގަ އެވެ.
އޭގެ އިތުރަށް ކައްފާރާގެ ގޮތުން ދެ މަސް ދުވަހު ރޯދަ ހިފަން ވެސް ހުކުމުގައި އަންގާފައިވެ އެވެ.
ސުޕްރީމް ކޯޓުގައި އޮތް ނަފީޒްގެ މައްސަލާގައި ވެސް މިހާރު އަޑުއެހުންތައް އޮތީ ނިންމާލައިފަ އެވެ. ނަމަވެސް މިހާތަނަކަށް އެ މައްސަލައިގެ ހުކުމެއް އެ ކޯޓުން ނުއިއްވަ އެވެ.
