މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް) އިން ޖެޓް ފިއުލް ވިއްކާ މިންވަރު ކޮންޓްރޯލް ކުރަން ޖެހުނީ ސްރީލަންކާއިން ތެޔޮ ހުސްވެ ރާއްޖޭގެ ވެލާާނާ އިންޓަނޭޝަނަލް އެއާޕޯޓަށް ޖައްސާ ފްލައިޓްތަކުން ތެޔޮ ގަންނަމުން ދިޔަ ވަރު ކުއްލިއަކަށް އިތުރުވުމުން ކަމަށް އެމްއޭސީއެލް އާއި އެސްޓީއޯއިން މިއަދު ބުނެފި އެވެ.
އެމްއޭސީއެލް އާއި އެސްޓީއޯ ގުޅިގެން މިއަދު ބޭއްވި ނޫސްވެރިންގެ ބައްދަލުވުމުގައި އެމްއޭސީއެލްގެ އޮފިޝަލް އިބްރާހިމް ތޯހާ ވިދާޅުވީ ލަންކާއިން ތެޔޮ ހުސްވުމުގެ ސަބަބުން ސްރީލަންކަން އެއާލައިންސް ހިމެނޭ ގޮތަށް މާލެ އާއި ކޮލޮމްބޯއާ ދެމެދު ދަތުރުކުރި ގިނަ ފްލައިޓުތަކެއް ދިޔައީ ކުރިއަށްވުރެ ގިނައިން ތެޔޮ ގަންނަމުން ކަމަށެވެ.
"އަޅުގަނޑުމެންގެ ފިއުލް ކެޕޭސިޓީއަކީ ކޮންމެ ސަމާ ސީޒަންއަކަށް ވެސް 13 މިލިއަން ލީޓަރު. އެކަމަކު ލަންކާއިން ދަތުރުކުރާ ކޮންމެ ފްލައިޓްއަކުން އެބަ އަޅާ ދެ ދަތުރަށް ވެސް ވާ ވަރަށް ފިއުލް. އެހެންވެ އަޅުގަނޑުމެން ފޯކާސްޓް ކޮށްފައި މި އޮތް ވަރަށް ވުރެ ވެސް އިތުރަށް މި ޖެހުނީ ވިއްކަން،" އޭނާ ކިޔައިދެއްވި އެވެ.
އެމްއޭސީއެލްގެ މެނޭޖިން ޑިރެކްޓަރު މަހުޖޫބު ޝުޖާއު ވިދާޅުވީ އެއާލައިންތަކަށް ވިއްކާ ފިއުލްގެ ރޭޓު މި ވަގުތަށް ކޮންޓްރޯލް ކުރަން ޖެހުނު ނަމަވެސް ކޮންމެ އެއާލައިނަކުން ވެސް ދަތުރު ކުރަން ބޭނުންވާ މަންޒިލަށް ދެވޭ ވަރަށް ތެޔޮ ފޯރުކޮށްދެވޭނެ ކަމުގެ ޔަގީންކަން އެބަ އޮތް ކަމަށެވެ. އަދި ތެޔޮ ނުލިބިގެން އެއާލައިންތަކުގެ އޮޕަރޭޝަނަށް އެއްވެސް ބުރޫ ނާރާނެކަމުގެ ޔަގީންކަން އޭނާ ދެއްވި އެވެ.
އެސްޓީއޯގެ މެނޭޖިން ޑިރެކްޓަރު ހުސައިން އަމްރު ވިދާޅުވީ ލަންކާއަށް ދިމާވި ހާލަތުގެ ސަބަބުން ކުއްލިއަކަށް ޖެޓް ފިއުލް ސަޕްލައިގެ ޑިމާންޑް ބޮޑުވިއިރު، ރަޝިއާ ޔޫކްރޭން ހަނގުރާމައިގެ ސަބަބުން މެދުއިރުމަތިން ތެޔޮ ގަންނަންދާ ބަނދަރުތައް ކުރިއަށްވުރެ ބޮޑަށް ތޮއްޖެހިފައިވާ ކަމަށެވެ. އޭގެ ސަބަބުން ފިއުލް ޝިޕްމަންޓް އައުމުގައި ލަސްކަމެއް ކުރިމަތިވަނީ ކަމަށް އޭނާ ވިދާޅުވި އެވެ.
"ފުރަތަމަ ކަމަކަށް އަޅުގަނޑުމެން އެބަ ޖެހޭ ކުރިއާލާ އެއް މަސް ކުރިން ޝިޕްމަންޓް ބޭނުންވާ ކަން އަންގަން، އަދި މިޑްލް އީސްޓްގައި ތެޔޮ ލޯޑު ކުރާ ޕޯޓްތަކުގެ ކޮންޖެޝަން ބޮޑުވެގެން ދިއުމުން ބޯޓެއް އެބަ ޖެހޭ ތެޔޮ ލޯޑް ކުރުމަށް ޓަކައި ކިއޫގައި 12-13 ގަޑިއިރުގައި ޕޯޓްގައި މަޑުކުރަން،" އަމްރު ތަފްސީލްކޮށްދެއްވި އެވެ.
މިއީ މީގެ ކުރިން ވެސް މި ގޮތަށް ފިއުލް ސަޕްލައިގެ ކެޕޭސިޓީއަށް ބާރުބޮޑުވުމުން، އަމަލުކުރަމުން އައިސްފައިވާ އުސޫލެކެވެ. އަދި، އެއްވެސް މައްސަލައެއް ދިމާ ނުވެ މީގެ ކުރިން ވެސް އެއާލައިންތަކަށް އެމްއޭސީއެލްއިން ވަނީ ހިދުމަތް ދީފަ އެވެ.
ތެޔޮ ވިއްކުން ކޮންޓްރޯލް ކުރިއިރު، މިވަގުތު ރާއްޖެއަށް 25 ބައިނަލްއަގްވާމީ އެއާލައިނަކުން ގެންދަނީ ޝެޑިއުލް ދަތުރުތައް ކުރަމުންނެވެ.
