އަންނަ އަހަރުގެ ރިޔާސީ އިންތިހާބުގައި ވާދަކުރައްވާނެކަމުގެ އިޝާރާތެއް ދެއްވާފައި ވަނިކޮށް ރައީސް އިބްރާހިމް މުހައްމަދު ސޯލިހު އާއި ޖުމްހޫރީ ޕާޓީގެ ލީޑަރު އިއްޔެ ބޭއްވެވި ބައްދަލުވުމުގައި އިންތިހާބާ ގުޅޭ އެއްވެސް މަޝްވަރާއެއް ކުރައްވާފައި ނުވާކަން އެނގިއްޖެ އެވެ.
ހުކުރު ދުވަހު މާމިގިއްޔަށް ވަޑައިގެން ސަން އައިލެންޑުގައި ދެ ބޭފުޅުން ބައްދަލުކުރެއްވުމާ ގުޅިގެން ބައެއް ފަރާތްތަކުން ވަނީ އިންތިހާބުގެ މަޝްވަރާތައް އެ ބައްދަލުވުމުގައި ކޮށްފައިވާ ކަމަށް ބުނެފަ އެވެ. ނަމަވެސް، ސަރުކާރުގެ އިސް އޮފިޝަލަކު ވަނީ އެ ވާހަކަތައް ދޮގުކުރައްވާފަ އެވެ.
"2023 ގެ އިންތިހާބާ ގުޅޭ އެއްވެސް މަޝްވަރާއެއް އެ ބައްދަލުވުމުގައި ކޮށްފައިނުވޭ. ނަމަވެސް، އިގްތިސާދީ ގޮތުން އަޅަމުންދާ ފިޔަވަޅުތަކާއި ގައުމުގެ ހާލަތާ ގުޅޭ ގޮތުން ދެ ބޭފުޅުން މަޝްވަރާ ކުރެއްވި،" އެ ބައްދަލުވުމާ ގުޅޭގޮތުން "އަދަދު" ނޫހަށް މައުލޫމާތު ދިން ސަރުކާރުގެ އިސް އޮފިޝަލަކު ވިދާޅުވި އެވެ.
ރައީސް ސޯލިހުގެ އަރިހުގައި އެ މަނިކުފާނާ އަރިސް ސަރުކާރުގެ އިސް ބޭފުޅުންގެ ވަފްދެއް ވެސް ސަން އައިލެންޑަށް ވަޑައިގަތެވެ.
އެގޮތުން، އެމްޑީޕީގެ ޗެއާޕާސަން އަދި އިކޮނޮމިކް މިނިސްޓަރު ފައްޔާޒު އިސްމާއިލް އާއި ފިނޭންސް މިނިސްޓަރު އިބްރާހިމް އަމީރު އާއި އަލިފުށީ ދާއިރާގެ މެމްބަރު މުހައްމަދު ރަޝީދު (ބިގޭ) ގެ އިތުރުން ހެންވޭރު ދެކުނު ދާއިރާގެ މެމްބަރު ހުސައިން ޝަހީމް (އަނދުން ހުސައިން) ވެސް ބައިވެރިވެވަޑައިގަތެވެ.
އެ ބޭފުޅުން ހުކުރު ދުވަހު މާމިގިއްޔަށް ވަޑައިގަތުމުން ރަތް ދޫލައިގައި މަރުހަބާ ދެންނެވީ ވެސް ގާސިމް އެވެ. އަދި، ޖުމްހޫރީ ޕާޓީގެ އިސްވެރިން ވެސް ރައީސަށް މަރުހަބާ ދެންނެވުމަށް ގޮސް ތިއްބެވި އެވެ.
މިއީ ކޮވިޑް-19 ގެ ފަހުން ގާސިމް އާއި ރައީސް އެއް މޭޒަކުން ބައްދަލުވެ މަޝްވަރާ ކުރެއްވި ފުރަތަމަ ފަހަރެވެ.
މިދިޔަ ބުދަ ދުވަހު ބޭއްވި ނޫސްވެރިންގެ ބައްދަލުވުމުގައި އަންނަ އިންތިހާބު އެމްޑީޕީއަށް ކާމިޔާބު ކުރުމަށް "ޗޮއިސް" އަކީ އެމަނިކުފާނު ކަމަށް ރައީސް ވަނީ ވިދާޅުވެފަ އެވެ.
ރައީސް ވިދާޅުވީ އަންނަ ރިޔާސީ އިންތިހާބު ވެސް އެމްޑީޕީން ކާމިޔާބު ކުރުމަކީ މުޅި ގައުމަށް ވެސް ވަރަށް ބޭނުންތެރި އަދި އެންމެ ފައިދާ ބޮޑު ކަމެއް ކަމަށެވެ. ނަމަވެސް، އެ އިންތިހާބު ވެސް ކާމިޔާބު ކުރެވޭނީ ކޯލިޝަނެއްގެ އެހީތެރިކަމާއެކު ކަމަށް ޔަގީންކުރައްވާ ކަމުގައި ރައީސް ވިދާޅުވި އެވެ.
އެމަނިކުފާނުގެ ކޯލިޝަނުގެ އެންމެ މުހިންމު ބައިވެރިޔާ ކަމަށްވާ ޖުމްހޫރީ ޕާޓީގެ ލީޑަރު ގާސިމް އިބްރާހިމް ވެސް ވަނީ ރިޔާސީ އިންތިހާބާ ގުޅޭގޮތުން ބުރާސްފަތި ދުވަހު ވާހަކަ ދައްކަވާފަ އެވެ. އިންތިހާބުގައި ވާދަކުރުމާ ގުޅޭގޮތުން ގޮތެއް ނުނިންމަވާ ކަމަށް ގާސިމް ރާއްޖޭގެ މީޑިއާ އަކަށް ވިދާޅުވި އެވެ.
ވެރިކަމަށް ކޯލިޝަނަކާ އެކު ވަޑައިގެން އެންމެ ގިނަ ދުވަހު ކޯލިޝަން ދެމެހެއްޓެވީ ރައީސް ސޯލިހު އެވެ. ކުރީގެ ރައީސް އަބްދުﷲ ޔާމީންގެ ސަރުކާރުގައި ވެސް ޖުމްހޫރީ ޕާޓީގެ ހިއްސާ އޮތެވެ. ނަމަވެސް، ހިޔާލު ތަފާތުވެ ކޯލިޝަނުން ވަކިވީ އެވެ.
