މާލެ ސަރަހައްދުގައި އަޅާ ބްރިޖުގެ މަސައްކަތުގެ ތެރެއިން ވިލިމާލެއާ ހަމައަށް ގުޅުވާލުމުގެ މަސައްކަތް އަވަސް ކުރުމުގެ ގޮތުން އިންޑިއާގެ އެފްކޮންސްއަށް އިތުރަށް 26 މިލިއަން ޑޮލަރު (400 މިލިއަން ރުފިޔާ) ދިނުމުގެ ވިސްނުމެއް ނެތް ކަމަށް ރައީސް އިބްރާހީމް މުހައްމަދު ސޯލިހް ވިދާޅުވެއްޖެ އެވެ.
ވިލިމާލެއާ ހަމައަށް ބްރިޖް ގުޅުވާލުމުގެ މަސައްކަތް އަންނަ އަހަރުގެ ޖުލައި މަހަށް ނިންމަން 26 މިލިއަން ޑޮލަރު އިތުރަށް ދޭން އެ މަސައްކަތް ހަވާލުކުރި އެފްކޮންސް އިން އެދިފައިވާ ކަމަށް މީޑިއާތަކުގައި ކުރިން ރިޕޯޓް ކޮށްފައިވެ އެވެ. އެކަމަކު އަގަށް ދިވެހި ސަރުކާރުން އެއްބަސް ނުވާ ކަމުގަ އެވެ.
"އަޅުގަނޑުމެން ވާހަކަ ދެއްކިން އަވަސްކުރަން، އެކަމަކު ކޮންމެހެން 26 މިލިއަން ޑޮލަރު ދީގެން އެކަން ކުރާ ގޮތަކަށް ނޫން މިތިބީ، އަދިވެސް އިތުރަށް ނެގޯޝިއޭޓް ކުރަމުން މި ދަނީ، އެކަމަކު ވެސް ހަމަ އިތުރަށް ދޭކަށް ނުވިސްނަން،" ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި ކުރި ސުވާލަކަށް ޖަވާބު ދެއްވަމުން ރައީސް ވިދާޅުވި އެވެ.
ކޮވިޑުގެ ބަލިމަޑުކަމުގެ ހާލަތާއި، ރަޝިއާ-ޔޫކްރޭން ހަނގުރާމައިގެ ސަބަބުން ދުނިޔޭގެ އިގްތިސޯދަށް ކުރިމަތިވެފައިވާ ލޮޅުންގަނޑުން ސަލާމަތް ވުމުގެ ގޮތުން ބްރިޖް ފަދަ އުމްރާނީ ތަރައްގީގެ އަގު ބޮޑު މަޝްރޫއުތައް މަޑުޖައްސާލަން ބައިނަލްއަގްވާމީ މާލީ އިދާރާތަކުން ވެސް ދަނީ ލަފާދެމުންނެވެ.
އެއާއެކު ގިނަ ނޫސްވެރިންގެ ސުވާލުތައް ވެސް ބްރިޖްގެ މަޝްރޫއުއާ ގުޅޭ ގޮތުން އަމާޒު ކުރިއިރު، އެ ސުވާލުތަކުގެ ޖަވާބުގައި ރައީސް ވިދާޅުވީ އެ މަޝްރޫއުއަކީ މި ވަގުތަށް "ކޮންމެހެން" ކުރަން ޖެހޭ ކަމެއް ކަމަށެވެ.
ބްރިޖް މަޝްރޫއުގެ ތެރޭގައި ގުޅީފަޅުގައި ގާއިމްކުރާ މާލެ ސަރަހައްދުގެ ވިޔަފާރި ބަނދަރުގެ މަސައްކަތާއި މާލެ ސަރަހައްދުގެ ވިޔަފާރި މުދާތަކުގެ ގުދަންތައް ބަދަލު ކުރުމުގެ މަސައްކަތް ވެސް ހިމެނޭތީ، މުދާ އެތެރެކުރުމާއި ގުދަން ކުރުމުގެ އަގު ތިރިވާނެ ކަމަށް ރައީސް ވިދާޅުވި އެވެ.
މިއީ ރިޔާސީ އިންތިހާބުގެ ކުރިއަށް ސިޔާސީ ބޭނުމަކަށް ކުރާ މަސައްކަތެއްގެ ގޮތުގައި އެއް ބަޔަކު ސިފަކުރި ނަމަވެސް އެއީ އެފަދަ ބޭނުމެއްގައި ކުރާ މަސައްކަތެއް ނޫން ކަމަށް ވެސް އެމަނިކުފާނު ވިދާޅުވި އެވެ.
ބޮޑު އަގެއްގައި ބްރިޖް އަޅަނީ ކަމަށް ބުނެ ދެކެވޭ ވާހަކަތަކަށް ވެސް ރައީސް މިއަދު ރައްދު ދެއްވި އެވެ. އެމަނިކުފާނު އަޅާ ކިޔުއްވީ ކުރީގެ ސަރުކާރުގައި ގާއިމްކުރި ހުޅުމާލެ ބްރިޖަށެވެ.
ބްރިޖްގެ ދިގުމިން އަޅާ ކިޔުއްވައި ރައީސް ވިދާޅުވީ މި ސަރުކާރުން އަޅާ ބްރިޖްގެ ހަރަދަށް އެ ބްރިޖް ނިންމި ނަމަ، ހުޅުމާލެ ބްރިޖްގެ އަގަށް ވުރެ 70 މިލިއަން ރުފިޔާ އަގުހެޔޮކޮށް ބްރިޖް ނުނިމުނިސް ކަމަށް އެމަނިކުފާނު ވިދާޅުވި އެވެ.
ބްރިޖު މަޝްރޫއުގެ ހުލާސާ
މުޅި ޕްރޮޖެކްޓަށް 7.7 ބިލިއަން ރުފިޔާ ހަރަދުވާނެ ކަމަށް ބެލެވޭ މި ބްރިޖުގެ މަސައްކަތް ކުރަނީ އިންޑިއާގެ އެފްކޮންސް ކުންފުނިންނެވެ.
މި ބްރިޖު ނިމުމުން ގްރޭޓާ މާލޭ ސަރަހައްދުގައި ހިމެނޭ ތިލަފުއްޓާއި ގުޅީފަޅާއި ވިލިމާލެ މާލެއާ ގުޅާލެވޭނެ އެވެ. އެއާއެކު ތިލަފުށިން ހުޅުމާލެއާ ހަމައަށް އެއްގަމު މަގުން ދަތުރުކުރެވޭނެ މަގުފަހި ވާނެ އެވެ.
މި ރަށްތައް ގުޅާލަން އަޅާ ބްރިޖާއި ކޯސްވޭ އަދި މަގުތަކުގެ ނެޓްވާކުގެ ދިގުމިނުގައި 6.7 ކިލޯމީޓަރު ހުންނާނެ އެވެ. މި ލިންކުގެ ބައިތަކުގެ ތެރޭގައި ތިން ބްރިޖާއި، ދެ މަގާއި، ކޮންމެ ރަށަކަށް އަރާ ފޭބުމަށް އިންޓަޗޭންޖް ޕޮއިންޓްތަކާއި، ޕާކިން ސަރަހައްދުތައް ގާއިމުކުރެވޭނެ އެވެ.
މާލެ-ތިލަފުށި ބްރިޖަކީ މި ސަރުކާރުގެ އިގުތިސޯދީ ތަސައްވުރާއި ސިޔާސަތުގެ މުހިންމު ބަޔެކެވެ. ނަމަވެސް މި ރިޔާސީ ދައުރު ނިމެންވާއިރަށް ބްރިޖުގެ މަސައްކަތް މުޅީން ނުނިމޭނެ އެވެ.
މި ބިޔަ ޕްރޮޖެކްޓަށް ހަރަދުކުރަނީ އިންޑިއާ އެގްޒިމް ބޭންކު މެދުވެރިކޮށް ހަމަޖައްސާފައިވާ 400 މިލިއަން ޑޮލަރުގެ ކްރެޑިޓް ފެސިލިޓީގެ ތެރެއިންނާއި އިންޑިއާ ސަރުކާރުން ދޭ 100 މިލިއަން ޑޮލަރުގެ ހިލޭ އެހީންނެވެ.
