ޓޫރިޒަމްގެ ބޭނުންތަކަށް ދޫކޮށްފައިވާ ބިންތަކުގެ ކުލި ކުޑަކުރަން ސަރުކާރުން ހުށަހަޅާފައިވާ އިސްލާހަކީ މި ދަނޑިވަޅުގައި ބުއްދިވެރި ކަމެއް ނޫން ކަމަށް މަރުކަޒީ ބޭންކު، މޯލްޑިވްސް މަނިޓަރީ އޮތޯރިޓީ (އެމްއެމްއޭ)ގެ ގަވަރުނަރު އަލީ ހާޝިމް މިއަދު ވިދާޅުވެއްޖެ އެވެ.
ސަރުކާރުން ޓޫރިޒަމް ގާނޫނަށް ހުށަހަޅާފައިވާ އިސްލާހުތައް ދިރާސާކުރަމުންދާ އިގުތިސޯދީ ކޮމިޓީގެ ބައްދަލުވުމެއްގައި ގަވަރުނަރު މިކަން ހާމަކުރެއްވީ މި ބިލާ މެދު މަރުކަޒީ ބޭންކުގެ ލަފާ ހިއްސާކުރައްވަމުންނެވެ.
އެގޮތުން ގަވަރުނަރު ވިދާޅުވި ގޮތުގައި ދުނިޔޭގެ ހާލަތު މިހާރު ހުރި ގޮތުން އާމްދަނީއަށް އަސަރުކުރާނެ ފިޔަވަޅުތަކެއް އެޅުން ރަނގަޅު ނޫނެވެ. އަދި ލަންކާއަށް މިހާރު ދިމާވެފައިވާ އިގުތިސޯދީ ކާރިސާގެ ފަހަތުގައިވާ ކަންކަމުން މިސާލު ނަގަނީނަމަ، އާމްދަނީ ހީނަރުވާނެ ފިޔަވަޅުތަކުގެ ނަތީޖާ ރަނގަޅު ނުވާނެ ކަމަށް އޭނާ ވިދާޅުވި އެވެ.
"ރެވެނިޔު ދަށްވާ ކަހަލަ އެކްޝަންތަކެއް ނެގުން ބުއްދިވެރިއެއް ނޫން،" ހާޝިމް ވިދާޅުވި އެވެ.
ސަރުކާރުން ޓޫރިޒަމް ގާނޫނަށް ހުށަހަޅާފައިވާ އިސްލާހުގައި ވަނީ ނ. އަތޮޅުން ފެށިގެން ދ. އަތޮޅަށް މިހާރު ހިންގަމުންދާ ރިސޯޓުތަކުގެ ކުލި ކުޑަކުރާށާއި، ތ. އަތޮޅުން ފެށިގެން ގދ. އަތޮޅަށް ހުރި ރިސޯޓުތަކުގެ ކުލި ކުޑަކުރާށެވެ. ސަރުކާރުން ބޭނުންވާ ގޮތަށް އިސްލާހު ފާސްކޮށްފިނަމަ މި ހުރިހާ އަތޮޅެއްގައި ހުރި ހުރިހާ ރިސޯޓުތަކެއް ކުލި ކުޑަވާނެ އެވެ.
ޓޫރިޒަމް މިނިސްޓްރީ އާއި ދައުލަތުގެ އެހެން އިދާރާތަކުން ލިބެންހުރި މައުލޫމާތުގެ އަލީގައި "އަދަދު" ނޫހުން ހެދި ދިރާސާއަކުން ދައްކާ ގޮތުގައި 158 ރިސޯޓެއްގެ ކުލި ކުޑަވާނެ އެވެ. އެއީ "ނ.-ދ." ކެޓެގަރީގައިހިމެނޭ 146 ރިސޯޓަކާއި "ތ.-ގދ." ކެޓެގަރީގައި ހިމެނޭ 12 ރިސޯޓެކެވެ.
މިއީ ރާއްޖޭގައި މިވަގުތު ހިންގަމުންދާ 166 ރިސޯޓުގެ 93 ޕަސެންޓެވެ.
ނަމަވެސް ސަރުކާރުން މަޖިލިހާ މިހާތަނަށް ހިއްސާކުރި މައުލޫމާތުން ނުވަތަ އެހެން ވެސް ގޮތަކުން ލިބެން ހުރި މައުލޫމާތުން މި އަދަދުތަކާއި، އާމްދަނީއަށް ކުރާނެ އަސަރު ކަށަވަރެއް ނޫނެވެ.
އެ އަދަދުތައް ނުހިމަނާތީ އެމްއެމްއޭ އަދި މޯލްޑިވްސް އިންލެންޑް ރެވެނިޔު އޮތޯރިޓީ (މީރާ)އިން ވެސް އެކަން ކޮމިޓީގައި ފާހަގަކުރި އެވެ. ދެ އިދާރާގެ ފަރާތުން ބައިވެރިވި ބޭފުޅުން ވެސް ވިދާޅުވީ ދައުލަތުގެ އާމްދަނީއަށް އަސަރުކުރާ ކަންކަމުގައި "އެނަލިސިސް" އެއް އޮންނަން ވާނެ ކަމަށެވެ.
ސީދާ އަދަދެއް ނޭނގުނު ކަމުގައިވީ ނަމަވެސް، މި ބައްދަލުވުމުގައި މީރާއިން ބައިވެރިވި ޑެޕިއުޓީ ކޮމިޝަނާ ޖެނެރަލް އޮފް ޓެކްސޭޝަން އަސްމާ ޝަފީއު ވިދާޅުވީ، "ރަފް" ނުވަތަ ވަގުތީ އަންދާޒާތަކުން ދައްކާ ގޮތުގައި މި ބަދަލުގެ ސަބަބުން ދައުލަތުގެ އާމްދަނީން ގާތްގަނޑަކަށް 590 މިލިއަން ރުފިޔާ ގެއްލޭނެ އެވެ.
އެއީ ކޮންމެ އަހަރަކު ޓޫރިޒަމްގެ ބޭނުންތަކަށް ދޫކޮށްފައިވާ ތަންތަނުގެ ބިމު ކުލިން ލިބޭ 1.6 ބިލިއަން ރުފިޔާއަށް ބަލާނަމަ 36.8 ޕަސެންޓުގެ ދަށްވުމެކެވެ.
މި އިސްލާހުގެ ސަބަބުން ގެއްލުންވި ނަމަވެސް ސަރުކާރުން ބުނަނީ މިއީ ޓެކްސް އާމްދަނީ އިތުރުވާނެ ފިޔަވަަޅެއް ކަމަށެވެ.
މިއަދުގެ ކޮމިޓީ ބައްދަލުވުމުގައި ވެސް ޓޫރިޒަމް މިނިސްޓަރު އަބްދުﷲ މައުސޫމް ދެއްކެވީ އެ ވާހަކަތަކެވެ.
އަދި ވިދާޅުވީ، މިއީ ޓޫރިޒަމް އިންވެސްޓްމަންޓުތަކަށް ފަހިކޮށްދޭން ސަރުކާރުން ގެންނަ ބަދަލެއް ކަމަށެވެ.
ކޮމިޓީގައި މިހެން ވިދާޅުވި ނަމަވެސް، މިހާރު މަޖިލިހަށް ހުށަހަޅާފައިވާ ބިލުގައި، ބިމު ކުލި ކުޑަކުރަން ހުށަހަޅާ މަގުސަދުގެ ގޮތުގައި ވަނީ މިނިމަމް ވޭޖާ ގުޅިގެން ޓޫރިޒަމް ވިޔަފާރިތަކަށް ކުރާ އަސަރު ކުޑަކުރުމެވެ.
