ރާއްޖޭގައި އުފެދުނު އެންމެ ހުނަރުވެރި ފުޓްބޯޅަ ކުޅުންތެރިޔާ އަލީ އަޝްފާގު (ދަގަނޑޭ)، އޭނާގެ ފިޓްނަސް ލެވަލް ރަނގަޅުކުރަން ކުރަމުން އަންނަ މަސައްކަތުގައި ރާއްޖޭގައި އެންމެ ފާހަގަކޮށްލެވޭ އެއް ދުވާ ޓީމު، މެރަތަން ރަނާސްއާ ގުޅިއްޖެ އެވެ.
އުމުރުން 36، ދަގަނޑޭ، މި ސީޒަނުގައި ހިމަނާފައިވަނީ ކްލަބް ވެލެންސިއާ ސްކޮޑުގަ އެވެ. މިދިޔަ ޑިސެމްބަރު މަހު އެފްއޭ ޗެރިޓީ ޝީލްޑް މެޗުގައި މާޒިޔާ ސްޕޯޓްސް އެންޑް ރެކްރިއޭޝަނާ ދެކޮޅަށް ވެލެންސިއާ ކުޅުނު މެޗުގައި ދަގަނޑޭ ކުޅުނެވެ. އެކަމަކު، އޭގެ ފަހުން ރަސްމީ މެޗެއްގައި އޭނާ ނުކުޅެ އެވެ.
މިދިޔަ މަހު ގައުމީ ފުޓްބޯޅަ ޓީމުން ބަންގްލަދޭޝާ ދެކޮޅަށް ކުޅުނު މެޗަށް ނެގި ސްކޮޑަށް ދަގަނޑޭ ހިމަނާފައިނުވަނީ އޭނާ އެ ގޮތަށް އެދުމުން ކަމަށް ގައުމީ ކޯޗު އިޓަލީގެ ފްރެންޗެސްކޯ މޮރިއޭރޯ ވަނީ ބުނެފަ އެވެ.
މޮރިއޭރޯ ބުނީ ދަގަނޑޭ ޓީމަށް ނުނަގަން އަމިއްލަ އަށް އެދުނީ އޭނާގެ ފިޓްނަސް ލެވަލް އެކަށޭނެ މިންވަރަށް ނެތުމުން ކަމަށެވެ.
ރާއްޖޭގައި މި ވަގުތު ތިބި އެންމެ ފާހަގަކޮށްލެވޭ ދިގު ރާސްތާ ދުވުންތެރިން ތަމްރީން ކުރަމުން އަންނަނީ ކޯޗު ނަސްރުﷲ އަހުމަދު (ނަސްރު)ގެ، މެރަތަން ރަނާސް ޓީމުންނެވެ. ނަސްރުގެ މެރަތަން ރަނާސް ޓީމާ އެކު ދަގަނޑޭ ވަނީ މިހާތަނަށް ވެސް ސެޝަންތަކެއްގައި ބައިވެރިވެފަ އެވެ.
ދަގަނޑޭގެ ބައިވެރިވުމާ ބެހޭގޮތުން ނަސްރު "އަދަދު" އަށް ބުނީ ފުޓްބޯޅަ ކުޅުމުގެ އާދަޔާހިލާފު ހުނަރުހުރި ތަރި ދަގަނޑޭގެ ކިބައިގައި ދުވުމުގެ ކަންކަމުގައި ވެސް ކުރިއަށް ދެވޭނެ ގާބިލުކަން އެބަހުރި ކަމަށެވެ. އަދި ދަގަނޑޭ ބޭނުންވާ ލެވަލަށް ފިޓްނަސް ރަނގަޅުކުރަން އެހީތެރިވެދޭން ތައްޔާރަށް ހުރި ކަމަށް ނަސްރު ވަނީ ބުނެފަ އެވެ.
މެރަތަން ރަނާސްގެ ސެޝަނެއް ނިންމާލުމަށް ފަހު ދަގަނޑޭ (މ.ކ.4) އެތުލީޓުންނާ އެކު ފޮޓޯ އަކަށް ހުއްޓިލައިގެން.
ރާއްޖޭގެ ދުވުންތެރިންގެ ތެރެއިން ބައިނަލްއަގުވާމީ އެންމެ ގިނަ މެރަތަން ދުވުމުގެ ރެކޯޑް އޮތް ނަސްރު އަކީ ގިނަ ދުވުންތެރިންނަށް ތަމްރީން ދީ ކުރިއަރަން އެހީތެރިވަމުން އަންނަ ކޯޗެކެވެ.
ދަގަނޑޭ ވަނީ މީގެ ކުރިން 2020 ވަނަ އަހަރު ކޮވިޑް ތެރޭގައި ފިޓްނަސް ރަނގަޅުކުރަން ގައުމީ ސްޕްރިންޓް ކޯޗު އަހުމަދު ފާއިލް ކައިރިން ވެސް ޓްރެއިނިންތަކެއް ކުރިއަށް ގެންގޮސްފަ އެވެ. އެ ފަހަރު ދަގަނޑޭގެ އިތުރުން މަޝްހޫރު އެހެން ފުޓްބޯޅަ ކުޅުންތެރިން ވެސް ވަނީ ފާއިލްއާ އެކު ޓްރެއިނިންތަކެއް ކުރިއަށްގެންގޮސްފަ އެވެ.
