ޕެރިސް (އޭޕްރީލް 9) - ޕީއެސްޖީގައި މަޑުކުރަން ކީލިއަން އެމްބާޕޭ ނިންމައިފިނަމަ އޭނާ އަށް ބޯނަހެއްގެ ގޮތުގައި 150 މިލިއަން ޕައުންޑް (195 މިލިއަން ޑޮލަރު) ދޭން އެ ކްލަބްގެ މެނޭޖްމަންޓުން ނިންމާފައިވާ ކަމަށް ސްޕެއިނުގެ ކުޅިވަރު އެނަލިސްޓް ގިލެމް ބަލަގޫ ބުނެފި އެވެ.
އުމުރުން 23 އަހަރުގެ އެމްބާޕޭ، ޕީއެސްޖީގެ ކޮންޓްރެކްޓްގައި ހުރީ މި ސީޒަނުގެ ނިޔަލަށެވެ. ޕީއެސްޖީން އެމްބާޕޭ ލައްވައި އާ ކޮންޓްރެކްޓެއްގައި ސޮއިކުރުވަން ކުރި ހުރިހާ މަސައްކަތެއް މިހާތަނަށް ވަނީ ނާކާމިޔާބުވެފަ އެވެ.
ސްޕެއިނުގެ މީޑިއާތަކުން ރިޕޯޓްކުރާ ގޮތުގައި އެމްބާޕޭ ވަނީ ރެއާލް މެޑްރިޑަށް ބަދަލުވާން އަނގަބަހުން އެއްބަސްވެފަ އެވެ. އެކަމަކު، ފްރާންސްގެ ނޫހަކަށް ދާދި ފަހުން ދިން އިންޓަވިއުއެއްގައި އެމްބާޕޭ ބުނީ މުސްތަގުބަލާ ބެހޭގޮތުން ގޮތެއް ނިންމައި އަންނަ ސީޒަނުގައި ކުޅޭނެ ވަކި ކްލަބެއް އަދި ނުނިންމާ ކަމަށެވެ.
ސްކައިސްޕޯޓްސްގެ ސްޕެނިޝް ފުޓްބޯޅަ އެނަލިސްޓް، ބަލަގޫ ބުނީ ޕީއެސްޖީން މިހާރު ވަނީ އެމްބާޕޭ ލައްވައި އާ ކޮންޓްރެކްޓެއްގައި ސޮއިކުރުވަން ބޮޑު ބޯނަހެއް ހުށަހަޅަން ނިންމައިފަ އެވެ. އެ ގޮތުން އެ ބޯނަހުގެ ޖުމްލަ ޕެކޭޖްގެ އަގު 195 މިލިއަން ޑޮލަރަށް އަރާނެ ކަމަށް ވެސް ބަލަގޫ ވަނީ ބުނެފަ އެވެ.
އެމްބާޕޭ، ޕީއެސްޖީގައި މަޑުކުރުވަން ފްރާންސްގެ ސަރުކާރުން ވެސް ބާރުއަޅަ އެވެ. އަދި ފްރާންސްގެ ގައުމީ ފުޓްބޯޅަ ޓީމުގެ ކޯޗު ޑިޑިއޭ ޑެޝޯމްޕްސް ވެސް ދެކޭގޮތުގައި ފްރާންސަށް އެންމެ ރަނގަޅު ގޮތަކީ އެމްބާޕޭ ޕީއެސްޖީގައި މަޑުކުރުން ކަމަށް ބުނެފަ އެވެ.
ރެއާލްގެ ރައީސް ފްލޮރެންޓީނޯ ޕެރޭޒާ ހަވާލާދީ ސްޕެއިނުގެ ނޫސްތަކުން މީގެ ކުރިން ރިޕޯޓްކޮށްފައިވާ ގޮތުގައި އެމްބާޕޭ އަށް ރެއާލްގެ ހުށަހެޅުން މިދިޔަ ޖެނުއަރީ މަހު ވަނީ ފޮނުވައިފަ އެވެ.
ރެއާލްގެ އެ ޕްރޮޕޯސަލްގައިވާ ގޮތުން އަންނަ ޖުލައި މަހު އެއް ވަނަ ދުވަހު ރެއާލާ ގުޅެން އެމްބާޕޭ ނިންމާފައިވަނީ ހަތަރު އަހަރުގެ ކޮންޓްރެކްޓެއްގަ އެވެ. އަދި އެ ކޮންޓްރެކްޓްގައިވާ ގޮތުން އިސްތިހާރާއި އެކި ޑީލްތަކާ އެކު އެމްބާޕޭ އަށް އަހަރަކު 55 މިލިއަން ޑޮލަރު ލިބޭނެ ކަމަށް ވެސް ވަނީ ރިޕޯޓްކޮށްފަ އެވެ. އެ ގޮތަށް އެ ޑީލް އެއްކޮށް ކުރިއަށް ގޮސްފިނަމަ އެމްބާޕޭ އަށް ލިބޭ އާމްދަނީ ވެގެންދާނީ ކްލަބެއްގެ ޕެކޭޖްގެ ތެރެއިން ރަސްމީކޮށް ކުޅުންތެރިއަކަށް ދޭނެ އެންމެ ބޮޑު މުސާރަ އަށެެވެ.
ޕީއެސްޖީން އެމްބާޕޭ ލައްވައި، ސޮއިކުރުވަން ބޭނުންވަނީ ދެ އަހަރުގެ ކޮންޓްރެކްޓެއްގަ އެވެ. އެއީ އަހަރަކު 27 މިލިއަން ޑޮލަރަޑެވެ.
މި ސީޒަނަކީ އެމްބާޕޭގެ ކެރިއަރުގައި އެންމެ ރަނގަޅު ފޯމުގައި ހުރި އަހަރެވެ. އޭނާ ވަނީ މުޅި ސީޒަނުގައި މިހާތަނަށް ކުޅުނު 38 މެޗުގެ ތެރެއިން 28 ގޯލު ޖަހައި، 20 ގޯލު ޖަހަން ފުރުސަތު ތަނަވަސްކޮށްދީފަ އެވެ.
