30 މާރިޗު 2022 - 15:39 0
ހުސެއިން އަރުބާން ފައްވާޒް
ސްޓޭޓް މިނިސްޓަރު ސޯލިހް ޝަރީއަތުގެ މަޖިލީހުގައި އިންނަވަނިކޮށް: އޭނާގެ މައްޗަށް ކުރި ދައުވާ ސާބިތުނުވާ ކަމަށް ކްރިމިނަލް ކޯޓުން ނިންމި -- ފޮޓޯ: ސްރީން ކެޕްޗާ/އަދަދު ފައިލް
30 މާރިޗު 2022 - 15:39 0
ޓޫރިޒަމް މިނިސްޓްރީގެ ސްޓޭޓް މިނިސްޓަރު ޑރ. އަހުމަދު ސޯލިހުގެ މައްޗަށް އުފުލި ރަސްމީ ހައިސިއްޔަތު ނަހަމަ ގޮތުގައި ބޭނުން ކުރުމުގެ ދައުވާ ސާބިތު ނުވާ ކަމަށް ކްރިމިނަލް ކޯޓުން މިއަދު ހުކުމްކޮށްފި އެވެ.
ޑރ. ސޯލިހުގެ މައްޗަށް ދައުވާ ކޮށްފައި ވަނީ ރައީސް އިބްރާހިމް މުހައްމަދު ސޯލިހުގެ ގަރާރަކުން އުފައްދަވާފައިވާ ރިޔާސީ ކޮމިޝަނުން ވަކި ރަށްތަކާ ގުޅޭ ތަހުގީގު ކުރިއަށް ގެންދާކަން އަންގާފައިވަނިކޮށް އެ މައުލޫމާތު އެނގިހުރެ، އެފަދަ ތަހުގީގެއް ކުރިއަށް ނުދާ ކަމަށް ބުނެ ބައެއް ފަރާތްތަކަށް ފޮނުވާފައިވާ ސިޓީތަކަކާ ގުޅިގެންނެވެ. ދައުލަތުން އެ ފާހަގަކުރާ ސިޓީތަކަކީ ކ. އަތޮޅުގެ ދެ ފަޅަކާއި ވ. ފޮއްތެޔޮބޮޑުފުއްޓާ ގުޅޭ ގޮތުން މިނިސްޓްރީން ދޫކޮށްފައި ހުރި ސިޓީތަކެކެވެ.
އޭނާގެ މައްޗަށް ދައުވާ ސާބިތު ނުވީ ދައުލަތުން ހުށަހެޅި ހެކިބަހުން ވެސް އޭނާގެ ދިފާއުއަށް ބާރު ލިބުމުންނެވެ.
އެގޮތުން، ރިޔާސީ ކޮމިޝަނުގެ އެންގުމުގައި ބުނެފައި އޮތީ އެމްއެމްޕީއާރުސީ މެދުވެރިކޮށް ދޫކޮށްފައިވާ ރަށެއް ނުވަތަ ފަޅެއްގެ ހެޑްލީސް ރައިޓް ބަދަލުކުރަން ނުވަތަ މަޑުޖައްސާލުމަށެވެ. ނަމަވެސް، އޭނާ ސޮއިކޮށް ފޮނުވި ސިޓީތަކަކީ އެ ހައްގުތައް ބަދަލުކުރުމާ ގުޅުންހުރި ސިޓީތަކެއް ނޫން ކަމަށް ގާޒީ އަލީ އާދަމް ވިދާޅުވި އެވެ.
އެފަދައިން ފަނޑިޔާރު ނިންމެވީ އެ ސިޓީ ފޮނުވި ފަރާތްތަކުން ވެސް ހެޑްލީސް ރައިޓް ނުވަތަ ހިއްސާ ބަދަލުކުރުމަށް އެދިފައި ނުވާކަން ދައުލަތުން ހުށަހެޅި ހެކިން ހެކިބަސް ދެމުން ބުނެފައި ވާތީ އެވެ.
ރިޔާސީ ކޮމިޝަނުގެ ނިންމުމާ ގުޅިގެން ރަށްތަކުގެ ލީސް ބަދަލުކުރުން މަޑުޖައްސާލަން އޭރުގެ ޓޫރިޒަމް މިނިސްޓަރު އަލީ ވަހީދު ފުރަތަމަ އެންގެވިޔަސް، ފަހުން އެ ނިންމުން ބާތިލްކުރި ކަމަށް ހެކިން ބުނެފައި ވެއެވެ.
ޖިނާއީ ކުށެއް ސާބިތު ކުރުމުގެ މިންގަނޑަކީ އެކަށީގެންވާ ޝައްކެއް ނެތް މިންވަރު ކަމުގައި ވާއިރު، ދައުލަތުގެ ހެކިތަކުން އެ މިންވަރަށް ދައުވާ ސާބިތުކޮށްދެވިފައި ނުވާ ކަމަށް ގާޒީ ވިދާޅުވި އެވެ.
Comment