އައްޑޫ ސިޓީގެ 107 ކިލޯ މީޓަރުގެ މަގު ހެދުމުގެ މަޝްރޫއު އާއި ފެން ހިންދާ ނިޒާމް ގާއިމް ކުރުމުގެ އަމަލީ މަސައްކަތް މިއަދު ފަށައިފި އެވެ.
އެ މަޝްރޫއުތަކުގެ އަމަލީ މަސައްކަތް މިއަދު ފައްޓަވައިދެއްވީ ރައީސް އިބްރާހިމް މުހައްމަދު ސޯލިހާއި އިންޑިއާގެ އެކްސްޓާނަލް އެފެއާޒް މިނިސްޓަރު އެސް ޖައިޝަންކަރު އަދި ފޮރިން މިނިސްޓަރު އަބްދުالله ޝާހިދެވެ.
އެ މަޝްރޫއުތަކަކީ, އިންޑިއަން އެގްޒިމް ބޭންކުގެ 800 މިލިއަން އެމެރިކާ ޑޮލަރުގެ ލައިން އޮފް ކްރެޑިޓް ފެސިލިޓީގެ ދަށުން ކުރިޔަށް ގެންދާނެ މަޝްރޫއުއެކެވެ. މަޝްރޫއުގެ ދަށުން ޖުމްލަ 107 ކިލޯ މީޓަރުގެ މަގުގައި ތާރު އަދި ގާ އަޅައިގެން ތަރައްގީ ކުރާނެ އެވެ. އޭގެ ތެރޭ ހިމެނެނީ ހިތަދޫ, މަރަދޫ, ފޭދޫ, މަރަދޫފޭދޫ, މީދޫ އަދި ހުޅުދޫގެ މަގުތަކެވެ.
އައްޑޫ ސިޓީއަށް ދިމާވެފައިވާ ފެން ބޮޑުވުމުގެ މައްސަލައަށް ހައްލު ހޯދުމުގެ ގޮތުން ހުރިހާ ރަށެއްގައި ވެސް މި މަޝްރޫއުގެ ދަށުން ފެން ހިންދާ ނިޒާމް ގާއިމް ކުރާނެ އެވެ. އެއާއެކު, 67 ކިލޯ މީޓަރުގެ މަގުގައި ސިމެންޓް ސްޓެބިލައިޒްޑް ބޭސް (ސީއެސްބީ) ލޭޔާ އެޅުމަށް ވަނީ ހަމަޖެހިފަ އެވެ.
މި ލޭޔަރުގެ މަގުސަދަކީ, ޕްލޭނިން މިނިސްޓްރީން މައުލޫމާތު ދިން ގޮތުގައި ފެން ހިންދާ ނިޒާމްގެ ތެރެއަށް ވެލި އެޅި އެ ނިޒާމަށް ދިމާވެދާނެ މައްސަލަތަކުން ރައްކާތެރިކުރުމެވެ. އަދި, ލޭޔަރު އެޅޭ މަގުތައް ތާރު ނުވަތަ ޕޭވާ ބްލޮކް މަގުތަކެއްގެ ގޮތުގައި އިތުރަށް ތަރައްގީ ކުރާނެ އެވެ.
މަޝްރޫއުއަށް ޖުމްލަ 77.36 މިލިއަން ޑޮލަރު ހަރަދުކުރާއިރު, މިއީ އައްޑޫގައި ހިންގޭ އެންމެ ބޮޑު އެއް މަޝްރޫއު އެވެ. މި މަޝްރޫއުގެ މަސައްކަތްތައް ނިމޭއިރު, ޕްލޭނިން މިނިސްޓްރީން ބުނި ގޮތުގައި އައްޑޫގައި މިހާރު ތަރައްގީ ކޮށްފައިވާ މަގުތަކުގެ ތެރެއިން 3.4 ކިލޯމީޓަރުގެ މަގުގެ ރީސާފޭސިން މަސައްކަތް ކުރުމަށާއި މަގު ބައްތި އާއި ސީސީޓީވީ ކެމެރާ އާއި އެހެން ސެކިއުރިޓީ ފިޔަވަޅުތައް ގާއިމް ކުރާނެ އެވެ.
އައްޑޫގައި ކުރިއަށްދާ މަޝްރޫއުތައް:
- ހަތަރު ރަށުގެ މަގު ހެދުން
- އައްޑޫ ސިޓީ ރީޖަނަލް ވޭސްޓް މެނޭޖްމަންޓް ފެސިލިޓީ
- ކަސްޓަމްސް ސައުތް ރީޖަން ހެޑް އޮފީސް އިމާރާތް
- އައްޑޫ ސިޓީ ފެނުގެ ނިޒާމް އަޕްގްރޭޑްކުރުން
- އައްޑޫސިޓީ ޑިސްޓްރިކްޓް ކޯޓު އިމާރާތްކުރުން
- އައްޑޫސިޓީ ޑިސްޓްރިކްޓް ކޯޓު އިމާރާތްކުރުން
- އައްޑޫ ހައި ސްކޫލް 12 ކްލާސްރޫމް އިމާރާތް
