ރައީސްކަމާއި މެމްބަރަކަމުގެ ޝަރުތުތައް އިސްލާހުކުރަން ޔާމީން ގޮވާލައްވައިފި

ރައިސުލްޖުމްހޫރިއްޔާ އާއި ރައްޔިތުން މަޖިލީހުގެ މެމްބަރުކަމަށް ކުރިމަތިލުމުގެ ޝަރުތުތައް އަލުން ކަނޑައެޅުމަށް ކުރީގެ ރައީސް އަދި އިދިކޮޅު ޕީޕީއެމްގެ ލީޑަރު، އަބްދުﷲ ޔާމީން ގޮވާލައްވައިފި އެވެ.

އދ. މަހިބަދޫގައި އިއްޔެ ބޭއްވި އިންޑިއާ އައުޓް ހަރަކާތުގައި ވާހަކަދައްކަވަމުން އެމަނިކުފާނު ވިދާޅުވީ ގާނޫނު ހަދާ މަޖިލީހަށް ކުރިމަތިލާ މެމްބަރުންނާއި، އެ ގާނޫނުތައް ތަންފީޒު ކުރާ ބާރުގެ އިސްވެރިއަކަށް އައްޔަން ކުރާ ރައީސުލްޖުމްހޫރިއްޔާ ކަމަށް އައުމަށް މިހާރު އޮތް ޝަރުތުތައް ޒަމާނަށް ނުފެތޭ ކަމަށެވެ.

އެހެންވެ، ގާނޫނުއަސާސީގެ އެ ފޮޅުވަތްތަކަށް އިސްލާހު ގެންނަން ހުށަހެޅުމަށް އިދިކޮޅު ޕީޕީއެމް އަދި ޕީއެންސީގެ ޓިކެޓުގައި މަޖިލީހުގައި ތިއްބެވި މެމްބަރުންނަށް ދަންނަވާނެ ކަމަށް ޔާމީން ވިދާޅުވި އެވެ.

"ދިވެހިރާއްޖޭގެ ރައިސުލްޖުމްހޫރިއްޔާ ކަމަށް ކުރިމަތިލާ މީހުން، އަދި ދިވެހި ރާއްޖޭގެ ރައްޔިތުން މަޖިލީހަށް ކުރިމަތިލާ މެމްބަރުގެ ޝަރުތުތައް ލިޔަން ކިޔަން އެނގުން އެކަނި އޮތުން މިހާރު ޝަރުތަކަށް ނުފުދޭ ނޫންތޯ؟," ޔާމީން ވިދާޅުވި އެވެ.

އެކަމާ ގުޅިގެން ޕީއެންސީގެ ޕީޖީ ލީޑަރު، އަދި ރައްޔިތުން މަޖިލީހުގެ މަޑުއްވަރީ ދާއިރާގެ މެމްބަރު އާދަމް ޝަރީފު "އަދަދު" އަށް ވިދާޅުވީ އެ އިސްލާހު މަޖިލީހަށް ވެއްދުމުގެ މަސައްކަތް ކުރިއަށް ގެންދާނެ ގޮތުގެ އިރުޝާދު ޔާމީން މާލެއަށް ވަޑައިގެންނެވުމަށްފަހު ދެއްވާނެ ކަމަށެވެ.

އަދި ގާނޫނުއަސާސީއަށް އިސްލާހު ގެނެވޭނީ މަޖިލީގައި ތިބި މެމްބަރުންގެ ތިންބައިކޮޅު ދެބައިގެ އަގުލަބިއްޔަތު ލިބިގެން ކަމަށްވާއިރު، އެ އިސްލާހު ފާސްވާނެ ކަމުގެ ޔަގީންކަން ނެތް ކަމުގައި ވީނަމަވެސް، އެ އިސްލާހު ތަޅަމަށް ވެއްދުމަށް މަސައްކަތް ކުރާނެ ކަމަށް އޭނާ ވިދާޅުވި އެވެ.

"އެމްޑީޕީއަކީ ވަރަށް ތަފާތުކޮށް ހިންގާ ޕާޓީއެއް، އެހެންވީމަ އެބޭފުޅުން ވޯޓު ދެއްވާނެއޭ ބުނާކަށް އަދި ނޭނގޭ، އެކަމަކު ގައުމުދެކެ ލޯބިވާ ކޮންމެ މީހަކުވެސް [އެ އިސްލާހަށް] ވޯޓު ދޭނެ ކަމަށް އަޅުގަނޑު ގަބޫލުކުރަނީ، އެއީ ގިނަ ރައްޔިތުން އެދޭ ކަމަކަށް އެކަން [މެމްބަރުންނާއި ރައީސްގެ ތައުލީމީ ފެންވަރުގެ ޝަރުތު] ވީމަ،" އާދަމް ޝަރީފް ވިދާޅުވި އެވެ.

titledesc

ގާނޫނު އަސާސީއަށް އިސްލާހު ގެނެވޭނީ މަޖިލީހުގެ މެމްބަރުންގެ ތިން ބައިކޮޅު ދެބައި މެމްބަރުންގެ ތާއީދު ލިބިގެންނެވެ. އިދިކޮޅު ޕީޕީއެމް ޕީއެންސީ ހިމެނޭ ކޯލިޝަނުން އެ އިސްލާހު މަޖިލީހަށް ވައްދާއިރު، އެ ޕާޓީގެ ޓިކެޓުގައި މަޖިލީހުގައި މިވަގުތު ތިބީ ޖުމްލަ ނުވަ މެމްބަރެކެވެ. އެ އިސްލާހު ފާސްކުރަން 58 މެމްބަރުންގެ ވޯޓު މަދުވެގެން ބޭނުންވާނެ އެވެ.

މަޖިލީހުގެ ދަފްތަރުގައި މެމްބަރުން ހިމެނޭ ގޮތް:

• އެމްޑީޕީ - 65 މެމްބަރުން
• ޕީޕީއެމް - ހަ މެމްބަރުން
• ޕީއެންސީ - ތިން މެމްބަރުން
• ޖުމްހޫރީ ޕާޓީ - ތިން މެމްބަރުން
• އެމްއެންޕީ - ތިން މެމްބަރުން
• އެމްޑީއޭ - ދެ މެމްބަރުން
• ވަކި ޕާޓީއަކަށް ނިސްބަތްނުވާ ފަސް މެމްބަރުން