އަސްހަދު އަލީ, ޔޫތު މިނިސްޓަރު މަހުލޫފާއެކު: ޖަލު ހުކުމާއެކު އަސްހަދު ވަނީ މަގާމުން ވަކިކޮށްފައި --
ކޯޓުގެ ހުރުމަތް ކެނޑި ކަމުގެ ކުށް ސާބިތުވުމާ ގުޅިގެން ޔޫތު މިނިސްޓްރީގެ ސްޓޭޓް މިނިސްޓަރުގެ މަގާމުން އަސްހަދު އަލީ ވަކިކޮށްފި އެވެ.
އަސްހަދުގެ މައްޗަށް 15 ދުވަހުގެ ޖަލު ހުކުމެއް ކުރިމިނަލް ކޯޓުން މިއަދު އިއްވީ ކުރީގެ ޓޫރިޒަމް މިނިސްޓަރު އަލީ ވަހީދު ރާއްޖޭން ބޭރަށް ފުރައިގެން ދިޔުމަށް ކޯޓުގައި ޖާމިނުވެ އެ އެއްބަސްވުމާ އެއްގޮތަށް އަމަލުނުކޮށް, ކޯޓުގެ އެންގުތަކާ ހިލާފުވެފައިވާ ކަމަށް ބުނެ އެވެ.
ރައީސް އޮފީހުގެ ޗީފް ކޮމިއުނިކޭޝަންސް ސްޓްރެޓަޖިސްޓް އިބްރާހިމް ހޫދު "އަދަދު"އަށް މިއަދު ވިދާޅުވި ގޮތުގައި އަސްހަދުގެ މައްޗަށް އައި ޖަލު ހުކުމާއެކު އޭނާ މަގާމުން ވަކިކުރުމަށް ރައީސް އިބްރާހިމް މުހައްމަދު ސޯލިހު ނިންމާވާފައިވާ ކަމަށެވެ.
ޔޫތު މިނިސްޓްރީގެ ސްޓޭޓް މިނިސްޓަރު ކަމުން އަސްހަދު ވަކިކުރިއިރު, ޔޫތު މިނިސްޓަރު އަހުމަދު މަހުލޫފްގެ މައްޗަށް ވެސް ވަނީ އެމްއެމްޕީއާރްސީގެ ކޮރަޕްޝަންގެ މައްސަލައެއްގައި ދައުވާ އުފުލާފަ އެވެ. ނަމަވެސް, މިހާތަނަށް އޭނާއާމެދު ސަރުކާރުން ފިޔަވަޅެއް އަޅާފައެއް ނުވެ އެވެ.
އަލީ ވަހީދުގެ މައްސަލާގައި މިއަދު ކުރިމިނަލް ކޯޓުގައި އޮތް އަޑުއެހުމަށް އަސްހަދު ހާޒިރުވާން އެންގި އެވެ. އެކަމަކު, ޗިޓް ރައްދުވެފައިވީ ނަމަވެސް އޭނާ މިއަދު ކޯޓަށް ހާޒިރެއް ނުވެ އެވެ. އެހެންވެ, މައްސަލަ ބައްލަވާ ގާޒީ ހަސަން ސައީދު ކަނޑައެޅުއްވީ އެއީ ކޯޓުގެ ހުރުމަތް ކެނޑުމުގެ އަމަލެއްގެ ގޮތުގަ އެވެ.
ގާޒީ ހަސަން ސައީދު މިއަދު ކޯޓުގައި ވިދާޅުވި ގޮތުގައި އަލީ ވަހީދު ރާއްޖެ ގެންނަން މުހުލަތެއް ދިނުމުން އެ މުހުލަތުގައި އޭނާ ރާއްޖެ ގެނައުމަށް އަސްހަދު ކުރި މަސައްކަތެއް ފެންނަން ނެތެވެ. އަދި އެކަމުގެ ގަސްދެއް އޭނާގެ ނެތް ކަމާއި ކޯޓަށް އަލީ ވަހީދު ފިލައިގެން އުޅޭ އުޅުމަށް އަސްހަދު ވާގިވެރިވެފައިވާ ކަމަށް ގާޒީ ވިދާޅުވި އެވެ.
މީގެކުރިން ބޭއްވި އަޑުއެހުމުގައި އަސްހަދު ވިދާޅުވެފައިވަނީ އޭނާ ޖާމިނުވީ ހަތަރު މަސް ދުވަސް ތެރޭ އަލީ ވަހީދު ކޯޓަށް ހާޒިރުކޮށްދިނުމަށް ކަމަށެވެ. އެގޮތުގެ މަތިން ހަތަރު މަސްވުމުން އޮންލައިންކޮށް އަލީ ވަހީދު ކޯޓަށް ހާޒިރުކޮށްދީފައިވާނެ ކަމަށެވެ. އެހެންވެ, މިހާރު އަލީ ވަހީދު ކޯޓަށް ހާޒިރު ނުވުމަކީ އޭނާ ޒިންމާވާން ޖެހޭ ކަމެއް ނޫން ގޮތުގައި ފާހަގަ ކުރެއްވި އެވެ.
ނަމަވެސް, އެކަމަށް ރައްދު ދެއްވައި ގާޒީ ހަސަން ސައީދު ވިދާޅުވީ ރާއްޖޭން ބޭރުގައި ހުރެ އޮންލައިންކޮށް ހާޒިރުވެގެން ޝަރީއަތް ކުރިއަށް ނުގެންދެވޭނެ ސުޕްރީމް ކޯޓުން އަންގާފައިވާއިރު, އެގޮތަށް އަލީ ވަހީދު ކޯޓުގެ އަޑުއެހުމަކަށް ހާޒިރުވެފައިވުން އެއީ ސައްހަ ހާޒިރުވުމެއް ކަމަށް ނުބުލެވޭނެ ކަމަށެވެ. އަދި ހަތަރު މަސް ދުވަހަށް ޖާމިނުވެ ހުރެ, އެ މުއްދަތުގައި އިސްތިއުނާފީ ކޯޓުތަކުގައި ކުރިއަށް ދިޔަ މައްސަލަތަކަށް ވެސް އަލީ ވަހީދު ހާޒިރުކޮށް ދީފައިނުވާ ކަމާއި އެއީ އަސްހަދު ޒިންމާވާން ޖެހޭނެ ކަމެއްގެ ގޮތުގައި ގާޒީ ފާހަގަ ކުރެއްވި އެވެ.
ގާޒީ ވިދާޅުވި ގޮތުގައި އަލީ ވަހީދަށް ފުރުމުގެ ހުއްދަ ދިނީ އަސްހަދު ޔަގީންކަން ދިނުމާއެކު ކަމަށްވާތީ, އޭނާ ކޯޓަށް ހާޒިރުނުކޮށް ދިނުމަކީ އަދުލު އިންސާފަށް ހުރަސްއެޅުމެވެ. އަދި, ޝަރުއީ ދާއިރާއާމެދު ނުބައި ތަސައްވުރެއް ދިނުމުގައި އަސްހަދު, އަލީ ވަހީދާ ވާގިވެރިވެފައިވާ ކަމަށް ގާޒީ ވިދާޅުވި އެވެ. މި ހުރިހާ ކަމަކީ ވެސް ކޯޓުގެ ހުރުމަތް ކެނޑުން ކަމަށް ބަލައި, އެ ކުށުގެ އަދަބެއްގެ ގޮތުގައި އަސްހަދު 15 ދުވަހަށް ޖަލަށްލުމަށް ގާޒީ ނިންމެވީ އެވެ.
ކޯޓުގެ ހުރުމަތް ކެނޑުމުގެ ކުށުން 15 ދުވަހުގެ ޖަލު ހުކުމެއް އަސްހަދަށް އިއްވިއިރު, އެ ހުކުމް ތަންފީޒުކުރުމަށް ކަމާބެހޭ މުއައްސަސާތަކުގެ މައްޗަށް އަމުރު ވެސް ގާޒީ ނެރުއްވި އެވެ.
ޖާމިނުވުމުގެ އެއްބަސްވުމާ އަސްހަދު ހިލާފުވެފައިވާ ކަމަށް ގާޒީ ހަސަން ސައީދު ކަނޑައެޅުއްވި ނަމަވެސް, އެކަމަށް ޖިނާއީ އިޖުރާއަތުގެ ގާނޫނުގައި ކަނޑައަޅާފައިވާ އަދަބެއް ނުދެއްވަ އެވެ. ހަމައެކަނި އަދަބު ކަނޑައެޅީ ކޯޓުގެ ހުރުމަތް ކެނޑުމުގެ ކުށަށެވެ. އެ ކުށަށް ގާނޫނުގައި ކަނޑައަޅާފައިވާ ޖަލު އަދަބަކީ 15 ދުވަހަށް ޖަލަށްލުމެވެ.
Comment