ރާއްޖޭގައި ފެނާ ނަރުދަމާގެ ހިދުމަތް ނެތް 39 ރަށުގައި އެ މަސައްކަތް ކުރުމަށް ބަޔަކާ ހަވާލުކޮށްފި އެވެ.
"ފެނާއި ނަރުދަމާގެ ގާނޫނު" ރައީސް އިބްރާހިމް މުހައްމަދު ސޯލިހު ތަސްދީގު ކުރައްވާފައި ވަނީ މިދިޔަ އަހަރުގެ އޮގަސްޓް ފަސް ވަނަ ދުވަހު އެވެ.
އެ ގާނޫނަށް އަމަލުކުރާ ތާރީހުން ފެށިގެން ފަސް އަހަރުގެ ތެރޭގައި މީހުން ދިރިއުޅޭ ހުރިހާ ރަށެއްގައި ސާފު ބޯފެނާއި ރައްކާތެރި ނަރުދަމާގެ ނިޒާމް ގާއިމްކުރަން ޖެހެ އެވެ. އެކަމުގެ މަސައްކަތްތައް ކުރަން، ކުރިއަށް އޮތް ފަސް އަހަރުގެ ސްޓްރެޓެޖިކް ޕްލޭނެއް ތައްޔާރުކުރަން ވެސް ޖެހެ އެވެ.
ރައީސް ސޯލިހް ވެރިކަމާ ހަވާލުވި އިރު، އެ އަހަރުގެ ނޮވެމްބަރު 17އާ ހަމައަށް ރާއްޖޭގައި މީހުން ދިރިއުޅޭ 188 ރަށުގެ ތެރެއިން ފެނުގެ ނިޒާމް ގާއިމް ކުރެވި އޮޕަރޭޓް ކުރެވިފައި ވަނީ 37 ރަށެއްގަ އެވެ. ނަރުދަމާގެ މަސައްކަތް ކުރެވި ބޭނުން ކުރެވެމުން ދިޔައީ 69 ރަށެއްގަ އެވެ.
2019 ވަނަ އަހަރުން ފެށިގެން މިހާތަނަށް 48 ރަށެއްގައި ނަރުދަމާ ގާއިމް ކުރުމުގެ އަމަލީ މަސައްކަތް ކުރިއަށްދެ އެވެ. ފެނުގެ ނިޒާމު ގާއިމް ކުރުމުގެ މަސައްކަތް 60 ރަށެއްގައި ކުރިއަށްދެ އެވެ.
މީގެ އިތުރުން ދައުލަތުގެ ބަޖެޓުން ހަރަދުކޮށްގެންނާއި އިންޑިއަން އެގްޒިމް ބެންކް ކްރެޑިޓް ލައިން އާއި އޯޕެކް ފަންޑްގެ އެހީގައި 32 ރަށެއްގައި ނަރުދަމާ ގާއިމް ކުރުމާއި 53 ރަށެއްގައި ފެނުގެ ނިޒާމް ގާއިމް ކުރުމުގެ މަސައްކަތް ކޮންޓްރެކްޓް ކުރެވި އެކި މަރުހަލާ ތަކުގައި ކުރިއަށްދެ އެވެ.
ކޮވިޑާ އެކުވެސް މަޝްރޫތައް ހުއްޓާ ނުލާ ކުރިއަށް ގެންދިއުމުން މިހާތަނަށް ނުވަ ރަށެއްގައި ނަރުދަމާގެ ނިޒާމް ގާއިމް ކުރުމާއި އަށް ރަށެއްގައި ފެނުގެ ނިޒާމް ގާއިމްކޮށް އަންނަނީ ބޭނުން ކުރަމުންނެވެ.
މިއަދު ސޮއިކުރި އެއްބަސްވުންތަކުގެ ދަށުން ރާއްޖޭގެ 188 ރަށުގެ ތެރެއިން މިހާތަނަށް ބަޔަކާ ހަވާލުކޮށްފައި ނުވާ 16 ރަށުގެ ނަރުދަމާގެ މަސައްކަތާއި 23 ރަށެއްގައި ފެނުގެ ނިޒާމް ގާއިމް ކުރުމަށް ހަވާލު ކުރި އެވެ. އެ ކޮންޓްރެކްޓްތަކުގެ ޖުމްލަ އަދަދު 920 މިލިއަން ރުފިޔާ އެވެ.
އެއާއެކު 2018 ވަނަ އަހަރުން ފެށިގެން މިހާތަނަށް ފެނާއި ނަރުދަމާގެ ގާއިމް ކުރުމަށް ވެވުނު އެއްބަސްވުންތަކުގެ އަގު 5.8 ބިލިއަން ރުފިޔާއަށް އަރަ އެވެ.
އެހެން ކަމުން މި ސަރުކާރުގެ ތިން އަހަރު ތެރޭ ރާއްޖޭގައި މީހުން ދިރިއުޅޭ ރައްތަކުގެ ތެރެއިން ފެނާއި ނަރުދަމާގެ ހިދުމަތް ނެތް 141 ރަށެއްގައި ވަނީ އެ ނިޒާމު ގާއިމް ކުރުމަށް ފެށިފަ އެވެ.
