އެއްވެސް ޓޫރިސްޓަކު ނުދާ މ. ދިއްގަރުން ޓޫރިޒަމް މިނިސްޓްރީގެ ޓީމަށް ކީ ހޫނު މަރުހަބާ އާއި މެހެމާންދާރީ އަކީ، އެންމެ ފުރަތަމަ ރަށަކަށް ދިއްގަރުގައި ހޯމްސްޓޭ ތައާފަރުކުރާ މައިގަނޑު އެއް ސަބަބު ކަމަށް ޓޫރިޒަމް މިނިސްޓްރީން ބުނެފި އެވެ.
އެ މިނިސްޓްރީން ބުނީ ޓޫރިޒަމް ޑައިވާސިފިކޭޝަން އެންޑް ލޯކަލައިޒޭޝަން ޕްރޮޖެކްޓުގައި މިނިސްޓްރީގެ ޓީމުތައް 60 ވަރަކަށް ރަށަަށް ދަތުރުކުރިއިރު، އެންމެ ފުރިހަމަ މެހެމާންދާރީއެއް އަދާކުރީ ދިއްގަރުން ކަމެވެ.
ޖެނުއަރީ އެއް ވަނަ ދުވަހު ތައާރަފުކުރާ ހޯމްސްޓޭ، ފަށާ ރަށަކަށް އެ ރަށް ކަނޑައެޅީ އެ ރަށުން ލިބުނު މެހެމާންދާރީ އާއި އެ ރަށުގެ ރައްޔިތުންނާއި ކައުސިލުން އެކަމަށް އެދުނު މިންވަރުން ކަމަށް މިނިސްޓްރީން ބުންޏެވެ.
"ރިސޯޓަކަށް ދިޔައީމަ ލިބޭ މެހެމާންދާރީ ދިއްގަރަށް ދިއުމުން ލިބުނު، އެ ބޭފުޅުންނަކަށް ނޭނގޭނެ އެކަމަށް އުންމީދު ކޮށްގެން ކަމެއް އަޅުގަނޑމެން ތިބީ،" ހޯމްސްޓޭ ތައާރަފު ކުރުމާ ގުޅޭ ގޮތުން ޓޫރިޒަމް މިނިސްޓްރީން އިއްޔެ ބޭއްވި ނޫސްވެރިންގެ ބައްދަލުވުމުގައި ޑެޕިޔުޓީ މިނިސްޓަރު އައްސަދު ރިޒާ ވިދާޅުވި އެވެ.
އޭނާ ވިދާޅުވީ ދިއްގަރުން މިނިސްޓްރީގެ ޓިމަށް މަރުހަބާކީ ބޮޑުބެރުންނެވެ. ބަޓްލާ އެއް ކޮންމެ މީހަކަށް ހަމަޖައްސާފައިވާއިރު، ކޮޓަރިތަކަށް ދިޔައިރު، ޓެގު އަޅުވާފައިވާ ފޮށި ހުރީ ކޮޓަރިއަށް ގެންގޮސްފައި ކަމަށެވެ. ކައުންސިލްގެ ރައީސްގެ މަރުހަބާގެ ނޯޓެއް ކޮންމެ ކޮޓަރި އަކަށް ލާފައި އޮތްއިރު، ފެންވަރައިގެން ނުކުތްއިރު ރޭނގަނޑުގެ ކެއުމާއި ސަގާފީ އައިޓަމް އޮންނަ ތަނަށް ގެންގޮސްދިނުމަށް ބަޓްލާ އިންތިޒާރުގައި ހުރި ކަމަށް އޭނާ ވިދާޅުވި އެވެ.
"ދިއްގަރު ކައުންސިލުން އަޅުގަނޑުމެންނަށް އެދުނީ ތިމަންނަމެންނަށް މިކަން ކުރެވޭނެ މަގެއް ދައްކައިދީފިއްޔާ، ދިއްގަރުން ނަމޫނާ ދައްކާނަމޭ މުޅި ރާއްޖެ އަށް، ބިން ފުރިފައި އޮތް ރަށެއްގަ ވިއަސް އެންމެ ބޮޑު އިގްތިސާދި ފުރުސަތަކަށް ފަތުރުވެރިކަން ވެގެން ދާނެ ކަމަށް،" މިނިސްޓްރީގެ ސީނިއާ އެގްޒެކެޓިވް ޑައިރެކްޓާ އަލީ ރަޒްއާން ވިދާޅުވި އެވެ.
ރަޒްއާން ވިދާޅުވީ 1،436 މީހުން ދިރިއުޅޭ ދިއްގަރުގައި ހޯމްސްޓޭ ފަށާނީ ހަތަރު ގެއަކުންނެވެ. އެ ރަށުގެ ކައުންސިލާއި ހަވާލާދީ އޭނާ ވިދާޅުވީ ޖެނުއަރީ މަހުގެ ތެރޭގައި 50 ކޮޓަރި ހޯމްސްޓޭއަަށް ނެރެން ކައުންސިލުން ބޭނުންވާ ކަމަށާއި ކައުންސިލްގެ ދައުރު 2026 ގައި ނިމުމުގެ ކުރިން 200 ކޮޓަރި ހޯމްސްޓޭއަށް ނެރުމަކީ ކައުންސިލުގެ އަމާޒެއް ކަމަށެވެ.
ރާއްޖޭގައި ރިހާކުރު ކެއްކުމަށް މަޝްހޫރު ދިއްގަރުން، ފުރިހަމަ މެހެމާންދާރީ އެއް ލިބުމުގެ އެންމެ ބޮޑު އެއް ސަބަބަކީ އެ ރަށުގެ ގިނަ ޒުވާނުންނަކީ ޓޫރިޒަމް ދާއިރާގައި އެކިއެކި މަސައްކަތުގައި އުޅޭ ކަމުގެ ވައްޓަފާޅި ހުރި ބަޔަކަށް ވުން ކަމަށް މިނިސްޓްރީން ދެކެ އެވެ.
