ވޯލްޑް ކަޕް/ އޭޝިއަން ކަޕް ޖޮއިންޓް ކޮލިފައިންގައި މި މަހު 30 އިން އަންނަ މަހުގެ 15 ދުވަހާ ހަމައަށް ކުޅޭ މެޗުތަކަށް ގައުމީ ފުޓްބޯޅަ ޓީމުގެ ތައްޔާރީތައް މިދަނީ ހީކުރި ވަރަށް ވުރެން މާ އުނދަގޫކޮށް ކަމަށާއި މި ކަންކަމުގެ ތެރެއިން ވެސް ހައްލުތަކެއް ހޯދަން މަސައްކަތް ކުރަމުން އަންނަ ކަމަށް ގައުމީ ކޯޗު ނެދަލެންޑްސްގެ މާޓިން ކޫޕްމަން ބުނެފި އެވެ.

ކޮވިޑް-19ގެ ހާލަތު ރާއްޖޭގައި ގޯސްވެފައިވާތީ ކޮލިފައިން އަށް ޗައިނާ އަށް ފުރަން ތައްޔާރުވުމުގެ ގޮތުން މީގެ ހަތަރު ދުވަސް ކުރިން ގައުމީ ޓީމުގެ ކުޅުންތެރިންނާއި އޮފިޝަލުން ވަނީ ހޮޓެލް ޖެންގައި ކޭމްޕް ކޮށްފަ އެވެ. މާލޭގައި ޕްރެކްޓިސް ކުރަން ހެލްތު ޕްރޮޓެކްޝަން އެޖެންސީ (އެޗްޕީއޭ)ގެ ހުއްދަ ނެތް ނަމަވެސް ޖެންގައި ޓީމު ކޭމްޕްކުރީ ތާވަލުކޮށްފައިވާ ގޮތަށް ބުދަ ދުވަހު ރާއްޖޭން ފުރުމުގެ ކުރިން ކުޅުންތެރިންގެ ރައްކާތެރިކަމަށް ވިސްނުމަށް ފަހު އެވެ.

ގައުމީ ޓީމުގެ ކޯޗުކަމާ ކޫޕްމަން ހަވާލުވި ފަހުން އަދި ރަސްމީކޮށް މެޗެއް ނުކުޅެ އެވެ. ގައުމީ ޓީމާ މިދިޔަ އަހަރު ޖެނުއަރީ މަހު ހަވާލުވި ކޫޕްމަން ފުރަތަމަ މެޗަށް ދިގު އިންތިޒާރެއް ކުރަން ޖެހުނީ ކޮވިޑްގެ ހާލަތާ ހުރެ މެޗުތައް އެކި ފަހަރު މަތިން ފަަސްކުރުމުންނެވެ. މެޗުތައް ކުޅޭނީ ހާލަތު ރަނގަޅުވުން ކަމަށް ކުރިން ބެލެވުނު ނަމަވެސް ކޫޕްމަން ފުރަތަމަ މެޗުތަކަށް ނުކުންނައިރު މި އޮތީ ބޭނުންވި ހާލަތެއް ނޫނެވެ.

އިންސްޓަގްރާމްގައި ކޫޕްމަން މިއަދު ކޮށްފައިވާ ޕޯސްޓް.

މިއަދު ހެނދުނު ކޫޕްމަން އޭނާގެ އިންސްޓަގްރާމްގައި ވަނީ ޖެންގައި ގައުމީ ޓީމުން ކުރިއަށްގެންދާ ފިޒިކަލް ޓްރެއިނިންތަކެއްގެ ފޮޓޯތަކަކާ އެކު ގައުމީ ޓީމުގެ ތައްޔާރީތަކާ ބެހޭގޮތުން ވާހަކަތަކެއް ހިއްސާކޮށްފަ އެވެ.

ކޫޕްމަން ބުނީ ހިތްގައިމު ހޮޓަލެއްގައި ކޭމްޕް ކޮށްގެން ތިބި ނަމަވެސް ފިޓްކޮށް ތިބެން ކުރެވެން ހުރި ކަމެއް ކުރަމުން އަންނަ ކަމަށެވެ. އަދި ކޮވިޑާ ހެދި ރާއްޖޭގެ ހާލަތު ވަރަށް ގޯސްކޮށް އޮތް ނަމަވެސް މިހާރު އޮތްގޮތުން މެޗުތައް ކުޅެން ޖެހޭނެކަމަށް ގަބޫލުކުރާ ކަމަށް ކޫޕްމަން ބުންޏެވެ.

"ވަރަށް ގިނަ ކުޅުންތެރިން އިންފެކްޓްވެއްޖެ. ރަނގަޅު ހާލަތަކަށް ގެނެވޭތޯ އެފްއޭއެމުން ވަރަށް މަސައްކަތް އެބަކުރޭ. އެކަމަކު ފަސް ހަފްތާ ވަންދެން ދަނޑުގައި ޓްރެއިން ނުކޮށް ޗައިނާގައި 10 ދުވަހުން ތައްޔާރުވާން މި ޖެހުނީ. އަހަރެމެން ޓީމެއްގެ ގޮތުގައި ކުރެވެން ހުރި ހުރިހާ މަސައްކަތެއް އެބަކުރަން. އެކަަމަކު މިއީ އަބަދަކު ކުރެވޭނެ ވެސް ކަމެއް ނޫން،" ކޫޕްމަން ލިޔެފައިވެ އެވެ.

ކޮވިޑް އަށް ޕޮޒިޓިވްވުމުންނާއި އަމިއްލަ ސަބަބުތަކާ ހުރެ ގައުމީ ޓީމުގެ ސްކޮޑުން ބައެއް ކުޅުންތެރިން ވަނީ ވަކިވެފަ އެވެ. އަމިއްލަ ސަބަަބަކާ ހުރެ ވަކިވީ މާޒިޔާގެ ނާއިޒު ހަސަން (ދާދު) އާއި އިބްރާހިމް ވަހީދު ހަސަން (އިއްބެ) އަދި ކޮވިޑް އަށް ޕޮޒިޓިވްވުމުން ކޮލިފައިން ގެއްލުނީ ޔުނައިޓެޑް ވިކްޓްރީގެ މިޑްފީލްޑަރު އިސްމާއިލް އީސާ (މެސީ) އަށެވެ.

ކޫޕްމަން ބުނީ ސްކޮޑަށް މި ދިމާވާ ކަންކަމަށް ވެސް ހައްލެއް ހޯދަން މަސައްކަތް ކުރަމުން އަންނަ ކަމަށެވެ.

"ވަރަށް ގިނަ ކުޅުންތެރިން ވެސް ޓީމުން ވަކިވެއްޖެ. އަހަރެމެން ޓީމުގެ ސްޓާފުން މި އަންނަނީ ކެނޑިނޭޅި މި ކަމަށް ވެސް ހައްލެއް ހޯދަން މަސައްކަތް ކުރަމުން،" ކޫޕްމަން ބުންޏެވެ.

"އެކަމަކު މި ވޯލްޑް ކަޕާއި އޭޝިއަން ކަޕް ކޮލިފައިން އަށް މި ކުރިއަށްދާ ތައްޔާރީތަކަކީ އާދައިގެ ގޮތަކަށް ދާ ކަމެއް ނޫން. ދަނޑުމަތީގައި ޓްރެއިނިންތައް ކުރިއަށް ގެންދަން ފުރުސަތު ނުލިބުނަސް އަހަރެމެން ފިޓްކޮށް ތިބެން ކުރެވުނުހާ ކަމެއް މި ކުރަނީ،"

ކޫޕްމަންގެ އެދުމުގެ މަތިން ގައުމީ ޓީމަށް އާ ފިޓްނަސް ކޯޗެއް ވަނީ ގެނެސްފަ އެވެ. އެއީ ނެދަލެންޑްސްގެ ފިޓްނަސް ކޯޗު ގާހާޑް ވާމިންކް އެވެ. ނެދަލެންޑްސްގެ ފުޓްބޯޅަ ފެޑެރޭޝަނާއި ކްލަބްތަކުގެ ގިނަ މަސައްކަތްތަކެއް ކޮށްފައިވާ ވާމިންކް އަންނަނީ ޖެންގައި ކުޅުންތެރިން ކޭމްޕް ކޮށްގެން ތިބިއިރު، ފިޓްނަސް ޓްރެއިނިންތައް ކުރިއަށްގެންދަން އެހީތެރިވަމުންނެވެ.

މި މަހު ހަ ވަނަ ދުވަހު ގައުމީ ޓީމުން ޓްރެއިނިންތައް ފަށަން މަސައްކަތްކުރި އެވެ. އެކަމަކު ކޮވިޑް-19ގެ ހާލަތު ގޯސްވެ، އޭރު ޕްރެކްޓިސް ފެށޭނެ ގޮތެއްނުވި އެވެ. އަނެއް ކޮޅުން މި މަހު މާލޭގައި އޭއެފްސީ ކަޕްގެ ދެކުނު އޭޝިއާ އަށް ހާއްސަ ގްރޫޕްގެ މެޗުތައް ކުޅެން އޮތުމުން ވެސް ދުރާލާ ފުލް ސްކޮޑާ އެކު ޕްރެކްޓިސް ފެށޭނެ ގޮތެއް އޭރު ނެތެވެ.

ކޮލިފައިންގައި ގައުމީ ޓީމަށް ދެން އޮތީ ތިން މެޗެވެ. އެއީ އަންނަ މަހުގެ ތިން ވަނަ ދުވަހު ޗައިނާއާ ދެކޮޅަށް ކުޅޭ މެޗާއި ހަތް ވަނަ ދުވަހު ސީރިއާއާ ދެކޮޅަށް ކުޅޭ މެޗުގެ އިތުރުން 15 ވަނަ ދުވަހު ފިލިޕީންސާ ބައްދަލުކުރާ މެޗެވެ.

ވޯލްޑް ކަޕް ކޮލިފައިން ގްރޫޕް އޭގައި ރާއްޖެ އޮތީ ހަތަރު މެޗުން ހަ ޕޮއިންޓާ އެކު ހަތަރު ވަނައިގަ އެވެ. ގްރޫޕުގެ އެއް ވަނައިގައި އޮތީ ފަސް މެޗުން 15 ޕޮއިންޓާ އެކު ސީރިއާ އެވެ. ޗައިނާ ހަތަރު މެޗުން ހަތް ޕޮއިންޓާ އެކު ދެ ވަނައިގައި އޮތްއިރު، ތިން ވަނައިގައި އޮތީ ފަސް މެޗުން ހަތް ޕޮއިންޓް ހޯދާފައިވާ ފިލިޕީންސެވެ. އެންމެ ފުލުގައި އޮތީ ފަސް މެޗު ކުޅެ ޕޮއިންޓެއް ލިބިފައިނުވާ ގުއާމެވެ.

ގައުމީ ކޯޗަށް ދީފައިވާ ދެ ޓާގެޓަކީ އޭޝިއަން ކަޕަށް ކޮލިފައިވުމާއި މި އަހަރުގެ ސާފް ސުޒުކީ ކަޕް ކާމިޔާބު ކުރުމެވެ.