ކުރީގެ ރައީސް މުހައްމަދު ނަޝީދު އަވަހާރަކޮށްލަން ދިން ހަމަލާގެ ތުހުމަތުގައި މިއަދު ހައްޔަރުކުރި ދެ މީހުންގެ ވަނަވަރު ފުލުހުން މިއަދު ހާމަކޮށްފި އެވެ.
މީގެ ތެރެއިން އެކަކު ހައްޔަރުކުރީ އަލިކިލެގެފާނު މަގުގައި ހުރި ގެއެއްގައި ފުލުހުން ހިންގަމުން އަންނަ އޮޕަރޭޝަނުގަ އެވެ. އޭނާ ހައްޔަރުކުރީ ގަލޮޅު ފެހިދޯދިގޭގެ ކުއްޔަށް ދީފައިވާ ބަޔަކުންނެވެ. އެ ސަރަހައްދުން ސައިކަލެއް ވެސް ވަނީ ފުލުހުންގެ ބެލުމުގެ ދަށަށް ގެންގޮސްފަ އެވެ.
އަނެކަކު ހައްޔަރުކުރީ ހުޅުމާލެ ރަބަރުގަސްމަގު ހަތަރު ނަމްބަރު ގޯޅިންނެވެ.
އެކަމާ ގުޅިގެން ފުލުހުންގެ ފަރާތުން ކުރިއަށްދާ ނޫސްވެރިންގެ ބައްދަލުވުމުގައި އެސިސްޓެންޓް ކޮމިޝަނާ އޮފް ޕޮލިސް މުހައްމަދު ރިޔާޒު ވިދާޅުވި ގޮތުގައި، މިއަދު ހައްޔަރުކޮށްފައިވަނީ މުޖާޒް އަހުމަދު، މއ. ފޭރުގެ، 21އ އާއި ތަހުމީން އަހުމަދު، ފޮޅޭމާ ގއ. ކޮނޑޭ، 32އ ކަމެވެ.
ރިޔާޒް ވިދާޅުވި ގޮތުގައި އެ ދެ މީހުންނަކީ ވެސް ކުށުގެ ރެކޯޑު އޮތް ދެ މީހުން ކަމަށެވެ. ނަމަވެސް، އެ މީހުން ޝާމިލުވި ކުށުގެ ބާވަތެއް ވިދާޅެއްނުވެ އެވެ.
އެ ބައްދަލުވުމުގައި ޕްރޮސެކިޔުޓާ ޖެނެރަލް ހުސެއިން ޝަމީމް ވިދާޅުވީ ޕީޖީ އޮފީހުން ފުލުހުންނާއެކު މަސައްކަތް ކުރަމުންދަނީ މި މައްސަލައިގެ ސީރިއަސްކަމުން ކަމަށެވެ.
އެގޮތުން، ވަރަށް ގިނަ މައުލޫމާތު ތަހުގީގަށް ފުލުހުން އެއްކޮށްފައިވާ ކަމަށާއި، ތަހުގީގުގެ އިޖުރާއަތްތަކާއި ހެކި ހޯދުމުގެ ކަންކަން ވެސް ވަރަށް ރަނގަޅަށް ކުރިއަށްދާ ކަމަށެވެ.
މިއަދުގެ ނޫސްވެރިންގެ ބައްދަލުވުމުގައި ޕީޖީ ހުސެއިން ޝަމީމް. -ފޮޓޯ: ހުސެއިން ވަހީދު / އަދަދު
ޝަމީމް މިއަދު ވިދާޅުވި ގޮތުގައި، މިހާތަނަށް ހައްޔަރުކުރި ދެ މީހުންނަކީ ހަރުކަށި ފިކުރާ ގުޅުން އޮތް ދެ މީހުން ކަމަށް ފެންނަ ކަމަށެވެ.
"މި މައްސަލައިގެ ތެރެއިން ހަރުކަށި ފިކުރާ ގުޅޭ ކަންކަން އެބަ ފެނޭ. މިހާތަނަށް ހައްޔަރުކުރި މީހުންނާއި ލިބިފައިވާ މައުލޫމާތަށް ބަލާއިރު ހަރުކަށި ފިކުރާ ގުޅުން އޮތް ކަމަށް ފެނޭ،" ޝަމީމް ވިދާޅުވި އެވެ.
ނަމަވެސް، ދީނީ ގޮތުން ހަރުކަށި ފިކުރަކީ އޮންނަ އެއްޗެއް ނޫން ކަމަށް ވިދާޅުވަމުން، ހަރުކަށި ފިކުރުގެ ބާވަތެއް ސީދާ ވިދާޅުވާން ޕީޖީ ދެކޮޅު ހެއްދެވި އެވެ.
އެ ބައްދަލުވުމުގައި ޕޮލިސް ކޮމިޝަނަރު މުހައްމަދު ހަމީދު ވިދާޅުވީ ހައްޔަރުކުރި މީހުން ވަކި ޓެރަރިސްޓު ޖަމާއަތަކަށް ނިސްބަތްވާކަމެއް އަދި ހޯދިފައިނުވާ ކަމަށެވެ.
ރައީސް ނަޝީދަށް ދިން ހަމަލާއާ ގުޅިގެން ޝައްކުކުރެވޭ ހަތަރު މީހަކު ތިބި ކަމަށް އިއްޔެ ފުލުހުން ބުނެފައިވާއިރު، މިއަދު ހައްޔަރުކުރި ދެ މީހުންގެ އިތުރުން، ތިން ވަނަ މީހަކު ހޯދަން އާއްމުންގެ އެހީތެރިކަމަށް ފުލުހުން ވަނީ އެދިފަ އެވެ.
ހަމަލާގައި ބައިވެރިވިކަމަށް ތުހުމަތުކުރެވޭ މީހެއް. އޭނާ ހޯދަން އާއްމުންގެ އެހީތެރިކަމަށް ވަނީ އެދިފަ.
ރިޔާޒް ވިދާޅުވި ގޮތުގައި، މި މީހާއަކީ މި މައްސަލާގައި ފުލުހުން ތުހުމަތުކުރާ އެންމެ މުހިއްމު މީހާ ކަމަށެވެ. އެހެންކަމުން އެ މީހާއާ ގުޅޭ އެއްވެސް މައުލޫމާތެއް އެނގޭނަމަ ލަސްނުކޮށް ފުލުހުންނާ ހިއްސާކުރުމަށް ރިޔާޒް އެދިވަޑައިގެންނެވި އެވެ.
