ޒިއުރިކް (މެއި 7) - ރަސްމީ ފެޑެރޭޝަންތަކާ ދެކޮޅަށް ގެންނަން އުޅުނު ޔޫރަޕިއަން ސުޕަ ލީގުގެ ފައުންޑަރު ކްލަބްތަކުގެ ތެރޭގައި ހިމެނުމަށް ފަހު އެ ލީގުން ވަކިވި ކްލަބްތައް ސަސްޕެންޑްކުރުމުގެ ބަދަލުގައި ޖޫރިމަނާ ކުރަން ޔުއެފާ އިން ނިންމައިފި އެވެ.
މިދިޔަ މަހު 18 ވަަނަ ދުވަހު 12 ކްލަބާ އެކު ސުޕަ ލީގު އިއުލާނުކުރި ނަމަވެސް އެކި ފިއްތުންތަކާ ހުރެ 72 ގަޑިއިރު ވެސް ނުވަނީސް އޭގެ ތެެރެއިން ނުވަ ޓީމެއް ވަނީ އެ ލީގުން ވަކިވެފަ އެވެ. އެ ކްލަބްތަކަކީ މެންޗެސްޓާ ޔުނައިޓެޑާއި މެންޗެސްޓާ ސިޓީ، ލިވަޕޫލް، އާސެނަލް، ޓޮޓެންހަމް، އިޓަލީގެ އޭސީ މިލާނާއި އިންޓަ މިލާން އަދި ސްޕެއިނުގެ އެތުލެޓިކޯ މެޑްރިޑް އެވެ. ލީގުން ވަކިނުވެ އޮތީ ސްޕެއިނުގެ ރެއާލް މެޑްރިޑާއި ބާސެލޯނާ އަދި އިޓަލީގެ ޔުވެންޓަސް އެވެ.
ސުޕަ ލީގު ގެންނަން އުޅުނީ ޗެމްޕިއަންސް ލީގުގެ ބަދަލުގަ އެވެ. އެކަމަކު ގައުމުތަކުގެ ފުޓްބޯޅަ އެސޯސިއޭޝަންތަކާއި ޔުއެފާ އަދި ފީފާގެ އިންޒާރާ އެކު ކްލަބްތަކުން އެ ލީގުން ވަކިވާން ނިންމީ އެވެ. ޔުއެފާގެ ރައީސް އަލެކްސަންޑަ ކެފެރިން ވަނީ ސުޕަ ލީގުން ވަކިވެ، ކުރެވުނު ކުށަށް މައާފަށް އެދޭން ކްލަބްތަކަށް ގޮވާލައިފަ އެވެ. ސުޕަ ލީގުން ވަކިވި ގިނަ ކްލަބްތަކުން ޔުއެފާގެ ބަދަލުގައި މާފަށް އެދުނީ ސަޕޯޓަރުންގެ ކިބައިންނެވެ.
އެންމެ ފުރަތަމަ ބެލެވުނީ ސުޕަ ލީގުގައި ބައިވެރިވި ހުރިހާ ކްލަބްތަކަށް ބޮޑެތި އަދަބުތަކެއް އަންނާނެ ކަމަށެވެ. އެކަމަކު ޔުއެފާ އިން މިއަދު ނިންމި ގިނަ ނިންމުންތައް ހުރީ ޖޫރިމަނާތަކާ އެކު އެވެ.
އެ ގޮތުން ސުޕަ ލީގުން ވަކިވި މި ޓީމުތަކުން 13.4 މިލިއަން ޕައުންޑް އެއްކޮށް ޔުއެފާގެ ގްރާސްރޫޓް ޕްރޮގްރާމަށް ފަންޑް ކުރަން އެންގުމާއި އެއް ސީޒަން ވަންދެން މި ކްލަބްތަކަށް ލިބޭ ފައިސާގެ ފަސް ޕަސެންޓް ޔުއެފާ އަށް ނެގުމުގެ އިތުރުން ކުރިއަށް އޮތްތަނުގައި ސުޕަ ލީގު ފަދަ ޔުއެފާގެ އުސޫލާ ހިލާފު މުބާރާތެއްގައި ބައިވެރިވެއްޖެނަމަ 100 މިލިއަން ޕައުންޑްގެ ޖޫރިމަނާއެއް ދައްކަން އެއްބަސްވުމާއި ޔުއެފާގެ އެ ނޫން ވެސް އެހެން ކޮންމެ އުސޫލަކާ ހިލާފުވެއްޖެނަމަ އެ ކްލަބެއް 50 މިލިއަން ޕައުންޑްގެ ޖޫރިމަނާ އެއް ދެއްކުމެވެ. މި ކަންތައްތަކަށް ރަސްމީކޮށް ކްލަބްތަކުން އެގްރީމެންޓެއްގައި ސޮއިކުރަން ޖެހޭނެ އެވެ.
ފީފާގެ ރައީސް ޖިއާނީ އިންފަންޓީނޯ ދާދި ފަހުން ވަނީ ސުޕަ ލީގުގައި ބައިވެރިވި ޓީމުތަކަށް އަދަބު ދިނުމަކީ ހައްލެއް ނޫން ކަމަށް ވިދާޅުވެފަ އެވެ. އެއީ ކްލަބަކަށް އަދަބު ދިނުމުން އޭގެއިން ކުޅުންތެރިންނާއި އެ ނޫން ވެސް ސްޓާފުން އަދި ސަޕޯޓަރުންނަށް ގެއްލުންވާނެތީ އެވެ.
ޔުއެފާގެ ރައީސް ކެފެރިން ވިދާޅުވީ ވަކިވި ޓީމުތަކުގެ ނިންމުމަށް މަރުހަބާ ކިޔާ ކަމަށެވެ. އެކަމަކު ސުޕަ ލީގުން ވަކިނުވެ އޮތް ޓީމުތަކާ މެދު އަމަލުކުރާނެ ގޮތެއް ކުރިއަށް އޮތް ދުވަސްތަކުގެ ތެރޭގައި ޔުއެފާގެ ކޮމިޓީން ނިންމާނެ ކަމަށެވެ.
ސްޕެއިންގެ ނޫސްތަކުން ރިޕޯޓްކުރާގޮތުގައި ސުޕަ ލީގުގައި މި ވަގުތު އޮތް ރެއާލާއި ބާސެލޯނާ އަދި ޔުވެންޓަސް އަށް އެ ލީގުން ވަކިވާން ރަސްމީކޮށް ވަކި މުހުލަތެއް ދޭން ޔުއެފާ އިން ވަރަށް އަވަހަށް ނިންމާނެ އެވެ. އެ ތިން ކްލަބުން އެ ގޮތަށް އަމަލުނުކޮށްފިނަމަ ޔޫރަޕްގެ މުބާރާތްތަކުން ދެ އަހަރުގެ ސަސްޕެންޑް ކުރަން ނިންމާނެ ކަމަށް ރިޕޯޓްތައް ބުނެ އެވެ.
ސުޕަ ލީގުގެ ޗެއާމަން ރެއާލްގެ ރައީސް ފްލޮރެންޓީނޯ ޕެރޭޒް ދާދި ފަހުން ސްޕެއިނުގެ ރޭޑިއޯ އަކަށް ދިން އިންޓަވިއުއެއްގައި ވަނީ ސުޕަ ލީގުގެ މަސައްކަތްތައް ހުއްޓައިނުލާނެ ކަމަށް ވިދާޅުވެފަ އެވެ.
