އެފްއޭއެމްގެ ރައީސްކަމަށް މިދިޔަ އަހަރުގެ ޖުލައި މަހު ދެ ވަނަ ދައުރަކަށް އިންތިހާބުވެވަޑައިގަތް ދުވަހު އެސޯސިއޭޝަންގެ ރައީސް ބައްސާމް އަދީލް ޖަލީލް ވަނީ މުޅި ރާއްޖެ އަށް ދިވެހި ލީގު ފުޅާކޮށްގެން ކުރިއަށް ގެންދިއުމަށް މަސައްކަތް ކުރައްވާނެ ކަމަށް ވިދާޅުވެފަ އެވެ. މިދިޔަ އަހަރު އެކަމަށް ކޮމިޓީއެއް އެކުލަވާލައި 2023/2024 ވަނަ އަހަރުގެ ދިވެހި ޕްރިމިއާ ލީގު މުޅި ރާއްޖެ އަށް ހުޅުވާލައިގެން ބޭއްވޭތޯ ވަނީ މަސައްކަތް ފަށައިފަ އެވެ.
މުޅި ރާއްޖެ އަށް ލީގު ފުޅާކޮށްގެން ކުރިއަށްދާއިރު ބޮޑެތި ގޮންޖެހުންތަކެއް ކުރިމަތިވާނެ އެވެ. އެ ކަންތައްތަކަށް ބަލާއިރު ދަތުރުފަތުރު ކޮށްގެން ގިނަ މެޗުތަކެއް ކުޅެން ޖެހުމުން އެ ކުރިމަތިވާ ތަކުލީފުތަކާއި މާލީ ގޮތުން ބަލާއިރު މިއީ ކުރެވިދާނެ ހަރަދުތަކެއްތޯ ވެސް ބަލަން ޖެހެ އެވެ. ލީގުގެ ޕްލޭން އެފްއޭއެމުން ހަދަނީ އެ ހުރިހާ ކަމަކަށް ވެސް އަލި އަޅުވާލައިގެން ކަމަށް މީގެ ކުރިން ވަނީ ބުނެފަ އެވެ.
"އަދަދު" އަށް ދެއްވި އިންޓަވިއުއެއްގައި ބައްސާމް ވިދާޅުވީ ކޮމިޓީ ލެވަލްގައި މަސައްކަތް ކުރަމުންދާއިރު އެންމެ އިސްކަމެއް ދޭނެ އެއް ކަމަކީ ޖަޒީރާކޮށް ރާއްޖެ އޮތުމުން ދަތުރުފަތުރު ކޮށްގެން މެޗުތައް ކުޅެވޭނެ ގޮތާ މެދު ކަމަށެވެ.
"މުބާރާތްތައް ބޭއްވޭނެ ރަށްތަކާއި އަތޮޅުތައް މި ދަނީ މަޝްވަރާކުރަމުން މި ބަލަނީ ވީހާވެސް ލުއި ގޮތަކަށް ދަތުރުފަތުުރު ކުރެވޭނެ ގޮތަކަށް ރޭވިގެންދިއުން. އެއާ އެކީގައި އެންމެ އުނދަގޫ ކަމަކަށް ދިމާވާނީ މެޗު އޮފިޝަލުން ރެފްރީން ތަކަށް އެކި ސަރަހައްދުތަކަށް ދިއުން. ދެން އެކަމަށް ވެސް އަޅުގަނޑުމެން ވިސްނުމަށް ފަހު ސަރަހައްދުތަކުގައި ރެފްރީން ޑިވެލޮޕް ކުރަމުންދާނީ،" ބައްސާމް ވިދާޅުވި އެވެ.
"އިރާދަކުރެއްވިއްޔާ ކުރިއަށް އޮތް ދެ އަހަރު ވެގެންދާނީ ވަރަށް ބައިވަރު ރެފްރީންނާއި ކޯޗުން ތަމްރީން ކުރެވި ފެސިލިޓީސް ނުވަތަ ދަނޑުތައް ތަރައްގީ ކުރެވޭނެ އަހަރުތަކަކަށް،"
ބައްސާމް ވިދާޅުވީ އޭނާގެ ވިސްނުމަކީ މުޅި ރާއްޖެ އަށް ހުޅުވާލައިގެން 2023/2024 ވަނަ އަހަރުގެ ޕްރިމިއާ ލީގު ފުޅާވެގެންދާއިރުގައި އެކަން ވީ އެންމެ ފުރިހަމަކޮށް ކުރުމަށެވެ. އެ ގޮތުން ލީގަށް އެކުލަވާލެވޭ ވަކި ހާއްސަ ބޯޑެއް ވެސް އޮންނާނެ ކަމަށާއި އެ ބޯޑުގެ ފަރާތުން މުބާރާތުގެ ހުރިހާ ކަމެއް އިންތިޒާމްކުރެވިގެންދާނެ ކަމަށެވެ. ބައްސާމް ވިދާޅުވީ މިހާރު ކުރިއަށްދަނީ ލީގުގެ ފޯމެޓް ފައިނަލްކުރުމުގެ މަސައްކަތް ކަމަށެވެ.
"ވިސްނުމަކީ މި އަހަރު ތެރޭ މުބާރާތަށް ތައްޔާރުވުމަށްޓަކައި ބައެއް ކަހަލަ މުބާރާތް ފެށިގެންދާން ޖެހޭ. މި ގެންނަ ފޯމެޓް ބަދަލާ އެކީގައި ކުރަން ޖެހޭ ކަންކަން ހުންނާނެ. ވަރަށް ކުޑަކުޑަކޮށް ދަންނަވާކަމަށްވަންޏާ އަޅުގަނޑުމެން ބޭނުންވަނީ މާލޭގައި މި އޮތް ފޯމެޓަށް ހުރިހާ ޒޯންތަކެއް ބަދަލުވެގެންދިއުން. އޭގެ މާނަ އަކީ ތާޑް ޑިވިޝަން، ސެކަންޑް ޑިވިޝަން އަދި ޕްރިމިއާ ލީގު އައުން. އެ ގޮތަށް ވިސްނުމަށް ފަހު މި ބަދަލު ގެންނަން މި ބަލަނީ،" ބައްސާމް ވިދާޅުވި އެވެ.
ރާއްޖޭގެ ފުޓްބޯޅަ ކުރިއެރުވުމަށް މި ވަގުތު އޮތް އެންމެ ބޮޑު ގޮންޖެހުމަކީ އެއް ދަނޑެއްގައި ލީގު ކުޅެން ޖެހުމެވެ. ޒަމާނުއްސުރެ ހައްލެއް ނުލިބި އޮތް މިކަމަށް ދުރު ވިސްނުމަކަށް ބަލާއިރު އޮތް ހައްލަކީ ރާއްޖެ އަށް ލީގު ފުޅާކުރެވި އެކި ރަށްރަށުގައި ވެސް މެޗު ކުޅެވޭނެ ގޮތްވުން ކަމަށް ބައްސާމް ގަބޫލުކުރައްވަ އެވެ.
"ބައެއް ރަށްރަށުގައި އައްޑޫގައި ނޫނީ ކުޅުދުއްފުށީގައި ވިޔަސް ނެޗުރަލް ގްރާސް ސްޓޭޑިއަމްތަކެއް އެބަހުރި. އަޅުގަނޑުމެންގެ ވިސްނުމަކީ ފީފާ އެޕްރޫވް ޓާފް ދަނޑުތަކެއް އެޅިގެން ދިއުން އެއާ އެކީގައި އަތޮޅު ތެރޭގައި ގިނަ ދަނޑުތަކެއް ހެދިގެންދާނެ. އެ އަށް ފަހު އަޅުގަނޑުމެން ނަށް ފުޓްބޯޅަ ކުޅެން ލިބޭ ވެނިއުތައް އިތުރުވެގެންދާނެ އިންޓަނޭޝަނަލް މެޗުތައް މާލެ ނޫން ސަރަހައްދެއްގައި ކުޅެވޭތަން ފެނިގެންދާނެ،" ބައްސާމް ވިދާޅުވި އެވެ.
މުޅި ރާއްޖެ އަށް ލީގު ފުޅާކުރުމުގެ ޕްލޭން އެކުލަވާލުމުގައި އެންމެ އިސްކޮށް ހަރަކާތްތެރިވަނީ އެފްއޭއެމްގެ ސީނިއާ ނައިބް ރައީސް އަލީ އުމަރާއި ގައުމީ ޓީމުގެ އެސިސްޓަންޓް ކޯޗު އަލީ ސުޒޭން ކަމަށް މިދިޔަ އަހަރު ބައްސާމް ވިދާޅުވި އެވެ.
ހޯމް އެންޑްް އަވޭ ސިސްޓަމަށް ލީގު ބަދަލުކުރުމުގެ މަސައްކަތަށް ލިބޭ އެންމެ ބޮޑު ފަސޭހައަކީ ދެކުނު ކޮރެއާ ކުންފުންޏެއް ކަމަށްވާ ސްކައިވިންޑް ގްލޯބަލްއާ އެކު މިދިޔަ އަހަރު ވެވުނު އެއްބަސްވުމުގެ ތެރެއިން ރާއްޖޭގައި އަޅާ 20 ޓާފް ދަނޑާއި ސަރުކާރުގެ ފަރާތުން މި ފަސް އަހަރު ތެރޭގައި މުޅި ރާއްޖޭގައި އަޅަން ނިންމާފައިވާ ޓާފްދަނޑުތަކެވެ. ސަރުކާރުގެ ޕްލޭނަކީ ފަސް އަހަރު ތެރޭ 100 ދަނޑު އެޅުމެވެ.
