އުތުރު ކޮރެއާގެ ލީޑަރު ކިމް ޖޮންގް އުން، އަލަށް ހުޅުވި ބްރިޖެއް މެދުވެރިކޮށް އަވަށްޓެރި ޗައިނާއަށް ވަޑައިގެންފައިވާ ކަމަށް ދެކުނު ކޮރެއާ ސަރުކާރުގެ އޮފިޝަލަކު ވިދާޅުވެއްޖެ އެވެ.
މިކަމާ ގުޅޭ ގޮތުން ރަސްމީކޮށް ވާހަކަދެއްކުމުގެ ހުއްދަ ނެތުމުން ނަން ހާމަނުކުރުމަށް އެދިވަޑައިގެން އެ އޮފިޝަލް ވިދާޅުވީ، ކިމް ޗައިނާގެ ދަންޑޮންގަށް ވަޑައިގަތީ އުތުރު ކޮރެއާ އާއި ޗައިނާ ގުޅުވައިދޭ "ނިއު ޔާލޫ ރިވާ ބްރިޖް" ހުރަސްކުރައްވައި ކަމަށެވެ.
މި ދަތުރާ ގުޅޭ ގޮތުން ދެކުނު ކޮރެއާގެ ޔުނިފިކޭޝަން މިނިސްޓްރީގެ ތަރުޖަމާނު ވަގުތުން ވަކި އެއްޗެއް ވިދާޅެއް ނުވެ އެވެ. އަދި ޗައިނާގެ ފޮރިން މިނިސްޓްރީން ވެސް މިކަމާ ގުޅޭ ގޮތުން މައުލޫމާތު ސާފުކުރުމަށް އެދުމުން ޖަވާބެއް ދީފައެއް ނުވެ އެވެ.
ދިގު މުއްދަތެއްގެ މެދުކެނޑުމަކަށް ފަހު، ދެ ގައުމުގެ ދެމެދުގައި އޮތް ގުޅުން ހީނަރުވެފައި އޮތް އޮތުމާއި ކޮވިޑް-19 އާ ގުޅިގެން ކުރިމަތިވި ހުރަސްތަކަށް ފަހު، ވިޔަފާރި އާއި އިގްތިސާދު އާލާކުރުމުގެ މަގްސަދުގައި ތިން ކިލޯމީޓަރުގެ ދިގު މި ބްރިޖް ހުޅުވާފައިވަނީ މި މަހުގެ ތެރޭގަ އެވެ. މިއީ މި ދެ ގައުމުގެ އެއްގަމު ބޯޑަރު ހުރަސްކުރުމަށް ބޭނުންކުރާނެ އެންމެ މުހިންމު މަގެވެ.
ޗައިނާގެ ސަރުކާރުގެ ތިންކް-ޓޭންކެއް ކަމަށްވާ ލިއޯނިންގް އެކަޑަމީ އޮފް ސޯޝަލް ސައިންސަސްގެ މާހިރެއް ކަމަށްވާ ލޫ ޗާއޯ ވިދާޅުވީ، ކިމް މިހާރު ކުރައްވާ މި ދަތުރަކީ ޗައިނާ އާއި އުތުރު ކޮރެއާއާ ދެމެދު އިގްތިސާދީ ގުޅުން ބަދަހިވެ، މަތީ ފަންތީގެ މުއާމަލާތްތައް އިތުރުވަމުންދާ ދަނޑިވަޅެއްގައި ކުރައްވާ މުހިއްމު ދަތުރެއް ކަމަށެވެ.
ރޮއިޓާސްއަށް މައުލޫމާތު ދެއްވަމުން ލޫ ވިދާޅުވީ، މި ބްރިޖް ހުޅުވުމާއެކު ޗައިނާ އާއި އުތުރު ކޮރެއާގެ ވިޔަފާރީގެ މުދާ އުފުލުމަށް ކުރިމަތިވެފައި އޮތް ބޮޑު ހުރަސް ނެތިގެން ގޮސްފައިވާ ކަމަށެވެ. އަދި މުދާ އުފުލުމުގެ ނިޒާމަށް ލިބުނު މި ލުޔާއެކު، ދެ ގައުމުގެ ދެމެދުގައި ކުރެވޭ ވިޔަފާރި އިތުރަށް ފުޅާވާނެ ކަމަށް ވެސް އޭނާ ވިދާޅުވި އެވެ.
މި ބްރިޖްގެ ސަބަބުން އުތުރު ކޮރެއާގެ ތަރައްގީއަށް ބޭނުންވާ ބަރު މެޝިނަރީ އާއި، ރޯ މެޓީރިއަލްސް އަދި ހަކަތައިގެ ބާވަތްތައް އުފުލުމަށް ފަސޭހަވެގެންދާނެ ކަމަށް ބެލެވެ އެވެ. ވޭތުވެދިޔަ 13 މަސް ދުވަހުގެ ތެރޭގައި ދެ ގައުމުގެ ލީޑަރުން ދެ ފަހަރެއްގެ މަތިން ބައްދަލުކުރައްވާފައިވާ އިރު، މި ބްރިޖް ހުޅުވުމަކީ ބެއިޖިންގް އާއި ޕިޔޮންގްޔަންގްގެ ގުޅުން ބަދަހިވަމުންދާކަމުގެ ހެއްކެކެވެ.
ކިމް އެންމެ ފަހުން ޗައިނާއަށް ކުރެއްވި ދަތުރަ 2025 ވަނަ އަހަރުގެ ސެޕްޓެމްބަރު މަހު ބެއިޖިންގްގައި ބޭއްވި 80 ވަނަ ވިކްޓްރީ ޑޭ ފާހަގަކުރުމުގެ ރަސްމިއްޔާތަށް ކުރެއްވި ދަތުރެކެވެ. އެ ދަތުރުގައި އޭނާ ވަނީ ޗައިނާގެ ރައީސް ޝީ ޖިންޕިންއާ ބައްދަލުކުރައްވާފަ އެވެ. އަދި ރައީސް ޝީ ވަނީ މިދިޔަ ޖޫން މަހު އުތުރު ކޮރެއާއަށް ފުރަމާނަ ދަތުރެއް ކުރައްވާފަ އެވެ.
