އިންޑިއާގެ އިރުމަތީ ސިޓީއެއް ކަމަށްވާ ކޮލްކަޓާގައި ބޭއްވި ދީނީ ފެސްޓިވަލެއްގެ ތެރޭގައި މީހުން ފިތިގެން ހިނގި ހާދިސާއެއްގައި މަދުވެގެން 17 މީހުން މަރުވެ، އެތައް ބަޔަކު ޒަޚަމްވެފައިވާ ކަމަށް އެ ގައުމުގެ މީޑިއާތަކުން ރިޕޯޓްކޮށްފި އެވެ.
ވެސްޓް ބެންގާލް ސްޓޭޓްގައި ކޮންމެ އަހަރަކު ބާއްވާ ހިންދޫންގެ ދީނީ ފެސްޓިވަލެއް ކަމަށްވާ "ދުރުގާ ޕޫޖާ" އަކީ ގިނަ ދުވަސްތަކަކަށް ދެމިގެންދާ ހަރަކާތެކެވެ. މި ފެސްޓިވަލަށް ޚާއްސަކޮށްގެން ހަދާފައިވާ ވަގުތީ ފޭލިގެތަކަށް ކޮންމެ އަހަރަކު ވެސް ގިނަ އަދަދެއްގެ ބަޔަކު އެއްވެ އެވެ.
އިންޑިއާގެ ޓީވީ ޗެނަލްތަކުން ރިޕޯޓްކޮށްފައިވާ ގޮތުގައި، މި ހާދިސާ ހިނގާފައިވަނީ ކޮލްކަޓާގެ ގިރިޝް ޕާކް ސަރަހައްދުގައި ހުރި ފޭލިގެއަކުން މީހުން ނުކުންނަ ދޮރު ކައިރީގަ އެވެ. މި ހާދިސާ ހިނގަން މެދުވެރިވީ ބޯކޮށް ވާރޭ ވެހުމުގެ ސަބަބުން އެއްފަހަރާ ގިނަ އަދަދެއްގެ ބަޔަކު އެ ތަނުން ނުކުންނަން މަސައްކަތް ކުރުމުގެ ތެރޭގައި މީހުން ތޮއްޖެހިގެންނެވެ.
މި ހާދިސާއާ ގުޅިގެން އިންޑިއާގެ ބޮޑުވަޒީރު ނަރެންދުރަ މޯދީގެ އޮފީހުން އެކްސްގައި ކުރި ޕޯސްޓެއްގައި ބުނެފައިވަނީ، މަރުވި މީހުންގެ އާއިލާތަކަށް ބަދަލުގެ ގޮތުގައި 200،000 ރުޕީޒް (2،106.15 ޑޮލަރު) އަދި އަނިޔާވި ކޮންމެ މީހަކަށް 50،000 ރުޕީޒް ދިނުމަށް ނިންމާފައިވާ ކަމަށެވެ.
