އިންޑިއާގެ މަޝްހޫރު ފިލްމީ ތަރި ޓައިގާ ޝްރޮފަށް އަމާޒުކޮށް ބަޔަކު ބަޑީގެ ހަމަލާތަކެއް ދީފި އެވެ. ނަމަވެސް، ކާކުކަން ނޭނގޭ ބަޔަކު ދިން މި ހަމަލާއިން އޭނާ ވަނީ އެއްވެސް އަނިޔާއެއް ނުލިބި ސަލާމަތްވެފަ އެވެ.
މުމްބާއީގެ ޖޫހޫ ސަރަހައްދުގައި ހިމެނޭ ޕުޝްޕާ ޕާކް ކައިރީގައި މި ހަމަލާ ދީފައިވަނީ އިއްޔެގެ އިރުއޮއްސި 7:00 އާއި 7:30 އާ ދެމެދުގެ ވަގުތެއްގަ އެވެ. މި ހަމަލާގައި ޓައިގާ ޝްރޮފް ސަލާމަތްވި ނަމަވެސް، އޭނާގެ ޑްރައިވަރަށް ވަނީ އެކިވަރުގެ އަނިޔާތައް ލިބިފަ އެވެ.
އަނިޔާވި ޑްރައިވަރަށް މިހާރު ދަނީ ނަނަވަތީ ހޮސްޕިޓަލުގައި ފަރުވާ ދެމުންނެވެ.
މި ހަމަލާގެ ޒިންމާ ނަގާފައިވަނީ އިންޑިއާގެ ނުރައްކާތެރި ގޭންގު ލީޑަރު ލޯރެންސް ބިޝްނޯއީގެ ގޭންގުން ކަމަށް ރިޕޯޓުތައް ބުނެ އެވެ.
ބިޝްނޯއީ ގޭންގަށް ނިސްބަތްވާ ނުރައްކާތެރި ކުށްވެރިއެއް ކަމަށްވާ އަނިލް ޕަންޑިތު ބުނި ގޮތުގައި، މި ހަމަލާ ދީފައިވަނީ އޭނާ އާއި ހަރްމަން ސަންދޫ ގުޅިގެންނެވެ.
ޖޫހޫ ޕޮލިސް ސްޓޭޝަންގެ އިހުތިސާސް ހިމެނޭ ސަރަހައްދުގައި ހިނގި މި ހާދިސާގައި، ޓައިގާ ޝްރޮފް ދަތުރުކުރި ބީއެމްޑަބްލިއު ކާރަށް އަމާޒުކޮށް ހަތަރު ފަސް ފަހަރަކު ބަޑިޖަހާފައިވެ އެވެ. މުމްބާއީ ފުލުހުން ވަނީ ޓައިގާ ޝްރޮފްގެ ހާލު ރަނގަޅު ކަމަށާއި، މި މައްސަލަ އިތުރަށް ތަހުގީގު ކުރަމުންދާކަން ކަށަވަރުކޮށްދީފަ އެވެ.
މި ހާދިސާ ހިނގާފައިވަނީ ޓައިގާ ޝްރޮފް ފުޓްބޯޅަ ކުޅޭ ދަނޑަކުން ނުކުމެގެން ދަނިކޮށެވެ. މި ހަމަލާ ދޭން މެދުވެރިވި ސަބަބާއި، ހަމަލާ ދިން މީހުންގެ ވަނަވަރު ދެނެގަތުމުގެ މަސައްކަތް ފުލުހުން މިހާރު ދަނީ ކުރަމުންނެވެ.
މީގެ އިތުރުން، ގައުމުން ބޭރުގައި އުޅޭ ކަމަށް ބެލެވޭ ގޭންގްސްޓަރުން ކަމަށްވާ އަނިލް ޕަންޑިތާއި ހަރްމަން ސަންދޫ، މި ހަމަލާގެ ޒިންމާ އުފުލައި ސޯޝަލް މީޑިއާގައި ކޮށްފައިވާ ޕޯސްޓެއްގެ ސައްހަކަން ވެސް މުމްބާއީ ފުލުހުން ދަނީ ބަލަމުންނެވެ.
އެ ޕޯސްޓުގައި ބުނެފައިވާ ގޮތުގައި، މަޝްހޫރު އެކްޓަރު ސަލްމާން ޚާނާއެކު މަސައްކަތް ނުކުރުމަށް ޓައިގާ ޝްރޮފަށް މީގެ ކުރިން އިންޒާރު ދީފައިވެ އެވެ. ނަމަވެސް އޭނާ އެ އިންޒާރުތަކަށް ފަރުވާލެއް ބަހައްޓާފައެއް ނުވެ އެވެ.
މި ހާދިސާއާ ގުޅިގެން ކޮންގްރެސް ޕާޓީގެ ލީޑަރު ސަޗިން ސާވަންތު ވިދާޅުވީ، މިއީ އިންތިހާއަށް ބިރުވެރި ކަމެއް ކަމަށެވެ. އަދި މުމްބާއީގެ އަމާންކަން މީގެ ކުރިން ދުވަހަކުވެސް މިހާ ދަށަށް ގޮސްފައި ނުވާ ކަމަށާއި، މިހާރުގެ ސަރުކާރުގެ ދަށުން ގާނޫނާއި ގަވާއިދު މުޅިން މުގުރިފައިވާ ކަމަށް އޭނާ ތުހުމަތު ކުރެއްވި އެވެ.
"މީގެ ކުރިން ބާބާ ސިއްދީގީ މަރާލައި، ސަލްމާން ޚާންގެ ގެއަށް ބަޑީގެ ހަމަލާދީ، ފިލްމު އުފައްދާ ފަރާތްތަކަށް ދަނީ އިންޒާރުތައް ލިބެމުން. ކުރިން އަހަރެމެން ބުނަމުން އައީ މަހާރާޝްތުރާ މިދަނީ ބިހާރު ފަދަ ނުރައްކާތެރި ތަނަކަށް ވާށޭ، އެކަމަކު މިއަދު މިވަނީ ހަމަ އެ ހާލަތަށް ގޮސްފައި. މިއީ އަހަރެމެން ހަރުކަށި އިބާރާތުން ކުށްވެރިކުރާ ކަމެއް،" ސާވަންތު ވިދާޅުވި އެވެ.
އޭނާ އިތުރަށް ވިދާޅުވީ، މުމްބާއީ އަކީ މުޅި އިންޑިއާގައި ވެސް އޮތް އެންމެ އަމާން ސިޓީ ކަމަށް ކުރިން ބެލެވުނު ނަމަވެސް، މިއަދު ފެންނަމުންދާ މަންޒަރުތަކަކީ ނާމާން އަދި ބިރުވެރި މަންޒަރުތަކެއް ކަމަށެވެ.
