ބޮލީވުޑްގެ މިއުޒިކީ ދުނިޔޭގައި ބޮޑު މަގުބޫލުކަމެއް ހޯދާފައިވާ ލެޖެންޑަރީ ލަވަކިޔުންތެރިޔާ އާޝާ ބޯސްލޭ، އުމުރުން 92 އަހަރުގައި މަރުވެއްޖެ އެވެ.
އިންޑިއާގެ ޕްލޭބެކް ސިންގިންގެ ރާނީގެ ގޮތުގައި ބެލެވޭ އާޝާ މަރުވީ ހާޓް އެޓޭކެއް ޖެހިގެން މުމްބާއީގެ ހޮސްޕިޓަލެއްގައި ފަރުވާ ދެމުން ދަނިކޮށެވެ.
އަށް ދަހަރަށްވުރެ ދިގު މުއްދަތަކަށް ދެމިގެންދިޔަ އޭނާގެ މިއުޒިކީ ހަޔާތުގައި 12،000 އަށްވުރެ ގިނަ ލަވަ ކިޔާފައިވާއިރު، އޭނާގެ ވަކިވެދިއުމަކީ ބޮލީވުޑް މިއުޒިކްގެ ރަންޒަމާނެއް ނިމުމަކަށް އައުމެވެ.
އާޝާގެ ތަފާތު އަޑުން ކިޔާފައިވާ ހިތްގައިމު ލަވަތަކަށް ފިލްމީ ތަރިން އެކްޓްކޮށްފައިވާއިރު، އެ ލަވަތަކަކީ ގިނަ ބައެއްގެ ހިތްތަކުން ޖާގަ ހޯދާފައިވާ އުފެއްދުންތަކެކެވެ.
ލޯބީގެ މަޑުމައިތިރި ލަވަތަކުން ފެށިގެން ފޯރިގަދަ ނެށުންތަކުގެ ލަވަތަކާ ހަމައަށް އާޝާ ދައްކުވައިދިން ހުނަރުގެ ސަބަބުން، އޭނާ ވެފައިވަނީ މިއުޒިކް ކޮމްޕޯޒަރުންގެ ވެސް އެންމެ ފުރަތަމަ އިހްތިޔާރަށެވެ.
2022 ވަނަ އަހަރު މި ދުނިޔެއާ ވަކިވި އޭނާގެ ދައްތަ ލަތާ މަންގޭޝްކަރާ ތަފާތު، އަމިއްލަ ވަކި މަގަކުން އާޝާ ވަނީ މިއުޒިކީ ދުނިޔޭގައި ކުރިއަށް ގޮސްފައެވެ.
ލަތާ މަންގޭޝްކަރަކީ ކްލެސިކަލް މިއުޒިކްގެ ފުރިހަމަކަމާއި މަޑުމައިތިރިކަމުގެ ނަމޫނާއަކަށް ވާއިރު، އާޝާ ބޯސްލޭ ކޮންމެ ލަވައަކަށް ވެސް ގެނެސްދީފައިވަނީ ހަކަތައިން ފުރިގެންވާ ގޮތްގަނޑެކެވެ.
