ނުވަދިހަ އަށް ކިލޯގެ މަސްތުވާތަކެތީގެ މައްސަލައިގައި 25 އަހަރަށް ޖަލަށް ލާފައި ހުރި އަބްދުﷲ އިބްރާހިމް (އަބުޗާ) ޕެރޯލްގެ ދަށުން މުޖުތަމައަށް ދޫކޮށްލި މައްސަލައާ ގުޅިގެން، ޕެރޯލް ބޯޑު ރައްޔިތުންގެ މަޖިލީހަށް ހާޒިރުކުރަން އިއްޔެ ނިންމައިފި އެވެ.
އަބުޗާ ދޫކޮށްލި މައްސަލަ މަޖިލީހަށް ހުށަހެޅުއްވީ ގަލޮޅު އުތުރު ދާއިރާގެ މެންބަރު މުހައްމަދު އިބްރާހިމް އެވެ. ޕެރޯލް ބޯޑު ކޮމިޓީއަށް ހާޒިރުކޮށް މިކަން ހިނގާދިޔަގޮތް އިތުރަށް ސާފުކުރުމަށް ފާސްކޮށްފައިވަނީ އިއްޔެ ބޭއްވި ޖުޑިޝަރީ ކޮމިޓީގެ ބައްދަލުވުމުގައި ބައިވެރިވެވަޑައިގެންނެވި މެންބަރުންގެ އިއްތިފާގުންނެވެ.
ކޮމިޓީ ބައްދަލުވުމުގައި ޕީއެންސީއަށް ނިސްބަތްވާ ހުޅުދޫ ދާއިރާގެ މެންބަރު މުހައްމަދު ޝާހިދު ވިދާޅުވީ، ކުށްވެރިޔާ މުޖުތަމައަށް ދޫވެގެން ދިޔައީ ކިހިނެއްކަން ސާފުކުރަން ޖެހޭ ކަމަށެވެ. މައްސަލަ ފެންމަތިވުމާއެކު ސަރުކާރުން ޕެރޯލް ބޯޑުގެ މެންބަރުން މަގާމުން ވަކިކޮށްފައިވީ ނަމަވެސް، އެއީ މީގެ ހައްލެއް ނޫން ކަމަށް އޭނާ ވިދާޅުވި އެވެ.
ޕެރޯލް ބޯޑުގެ މެންބަރުން ގާނޫނާ ހިލާފު ކުށެއް ކޮށްފައިވާނަމަ އެކަންވެސް ބަލައި ދިވެހި ރައްޔިތުންނަށް ހާމަކުރުމަކީ ކޮމިޓީގެ ޒިންމާއެއްކަމަށް ވެސް އޭނާ ވިދާޅުވި އެވެ.
"އެ ސްއޫލިއްޔަތު އަދާކުރާ ފަރާތް އެ މަސްއޫލިއްޔަތު އެކަހެރިކުރުން ނުވަތަ އެ ވަޒީފާ އަދާކުރާ ފަރާތް ވަޒީފާއިން ވަކިކުރުމަކުން މިކަމެއް ހައްލެއް ނުވޭ،" ޕެރޯލް ބޯޑުގެ މެންބަރުން ވަކިކުރި ކުރުމަށް އިޝާރާތް ކުރައްވައި ޝާހިދު ވިދާޅުވި އެވެ.
މި މައްސަލައާ ގުޅޭގޮތުން ކަންބޮޑުވުންފާޅުކުރައްވައި ކުރެންދޫ ދާއިރާގެ މެންބަރު ޝާމިން ހަބީބު ވިދާޅުވީ، މުޖުތަމައަށް ނުރައްކާތެރި މީހަކު ދޫކޮށްލުމަށްފަހު އަލުން ހައްޔަރުކުރުމުން އެނގެނީ އޭނާ ދޫކޮށްލުމުގައި ގޯސްތަކެއް ހަދާފައިވާކަން ކަމަށެވެ. އަދި ބޮޑު ގޯހެއް ހެދުމުން ހަމައެކަނި އިސްތިއުފާ ދިނުމުން ނުވަތަ ވަޒީފާއިން ވަކިކުރުމުން މައްސަލަ ނުނިމޭނެކަން ފާހަގަކުރައްވައި، މީގެ ކުރިންވެސް އެ ބޯޑުން ގަވާއިދާ ހިލާފަށް ކިތައް މީހުން ދޫކޮށްލާފައިވޭތޯ ބަލަންޖެހޭ ކަމަށް ޝާމިން ވިދާޅުވިއެވެ.
ކަނޑިތީމު ދާއިރާގެ މެންބަރު އަމީން ފައިސަލް ވިދާޅުވީ އަބުޗާ އަލުން އަނބުރާ ޗަލަށް ގެންދިޔުމުންނާއި، ޕެރޯލް ބޯޑުގެ މެންބަރުން ވަކިކުރުމަކުން އެ އެ ބޯޑުން ހެދި ގޯސް ރަނގަޅު ވެގެން ނުދާ ކަމަށެވެ.
އަބުޗާ ދޫކޮށްލި މައްސަލަ ބަލައި ޕެރޯލް ބޯޑުގެ މެންބަރުންނަށް އެންމެ ހަރުކަށި އަދަބު ދޭންޖެހޭ ކަމަށް ވެސް އޭނާ ވިދާޅުވި އެވެ.
ދިވެހިރާއްޖެއަށް 98 ކިލޯގެ މަސްތުވާތަކެތި އެތެރެކުރަން އުޅުނު މައްސަލައިގައި 25 އަހަރަށް އަބުޗާ ޖަލަށް ލާން ހުކުމް ކުރީ މިދިޔަ އަހަރުގެ މެއި 19، ގަ އެވެ. އެ މައްސަލައިގައި އޭނާގެ މައްޗަށް ކޮށްފައި ވަނީ 12.5 އަހަރުގެ ތިން ހުކުމެވެ. ޕެރޯލަށް އޭނާ ޝަރުތު ހަމަވީ 6.5 އަހަރު ޖަލުގައި ހޭދަ ކުރި ކަމަށް ބުނެ އެވެ. ނަމަވެސް އެ މުއްދަތު އޭނާ ހަމައެއްނުކުރެ އެވެ.
ޖަލުތަކާއި ޕެރޯލްގެ ގާނޫނުގެ 125 ވަނަ މާއްދާގައި ބަޔާންކޮށްފައި އޮންނަނީ މަސްތުވާތަކެތި ވިއްކުމާއި ވިޔަފާރިކުރުމާއި އެ ތަކެތި ދިވެހިރާއްޖެއަށް އެތެރެކުރުމުގެ ކުށް ސާބިތުވެފައިވާ މީހަކަށް ޕެރޯލްގެ ފުރުސަތު ލިބޭނީ އެ މީހަކަށް ކޮށްފައިވާ އެންމެ ދިގު ހުކުމުގެ ދެބައިކުޅަ އެއްބައި ތަންފީޒުކޮށް ނިމުމުން ކަމަށެވެ.
އަބުޗާ ދޫކޮށްލުމުގައި ގޯސްތަކެއް ހުރިކަން ފާހަގަކޮށް އޭނާ އަލުން ހައްޔަރުކޮށް، އަދި ޕެރޯލް ބޯޑުގެ މެންބަރުން ވަކިކުރި އެވެ. ނަމަވެސް ޕެރޯލް ބޯޑުގައި ތިއްބަވާ މެންބަރުންގެ ނަމެއް ސަރުކާރުން ހާމައެއް ނުކުރެ އެވެ.
