ފަނޑިޔާރަށް ފެނިއްޖެ ހިނދެއްގައި ހެކި ހާމަނުކުރަން އެންގުމުގެ އިހުތިޔާރު ދިނުމަކީ ސިޔާސީ ދައުވާކުރަން ހުޅުވޭ ދޮރެއް ކަމަށް ވައިކަރަދޫ ދާއިރާގެ މަޖިލިސް މެންބަރު، ހުސެއިން ޒިޔާދު (ފިއްޓޭ) ވިދާޅުވެއްޖެ އެވެ.
މަޖިލީހުގައި މިއަދު ވާހަކަދައްކަވަމުން ފިއްޓޭ ވިދާޅުވީ މީގެ ކުރިން، 2015 އާއި 2018 އާ ދެމެދު ކުރެވުނު ޝަރީއަތްތަކުގައި ސިއްރު ހެކި ހުށަހަޅައިގެން އެތައް ބައެއްގެ މައްޗަށް ސިޔާސީ ދައުވާ އުފުލި ކަމަށެވެ.
"އިއްޒަތްތެރި ރައީސް ވެސް ހަނދުމަފުޅު ހުންނަވާނެ 2015 އިން 2018 އާ ދޭތެރޭގައި ރާއްޖޭގައި ކުރެވުނު ޝަރީއަތްތަކުގައި ސިއްރު ހެކި ހުށަހެޅިގެން ވަރަށް ބައިވަރު ސިޔާސީ ދައުވާތަކެއް ކުރެވުނު، މީގެ ތެރެއިން އަޅުގަނޑު ގަބޫލުކުރަނީ އެކަމަށް އެބަ ފުރުސަތު ހުޅުވިގެންދެޔޭ،" ފިއްޓޭ ވިދާޅުވި އެވެ.
"އެހެން އެކަން އޮންނަ އޮތުމަކީ އަޅުގަނޑު ކަންބޮޑުވާކަމެއް. އަޅުގަނޑު ގަބޫލުކުރާ ގޮތުގައި ދިފާއީ ހެއްކަކީ ކޮބައިކަން އެ ދައުވާ ލިބޭ ފަރާތަށް އެނގުން މުހިންމު ކަމަށް އަޅުގަނޑު ދެކެން."
ޖިނާއީ އިޖުރާއަތުގެ ގާނޫނަށް ހުށަހަޅާފައިވާ އިސްލާހުގެ 131 ވަނަ މާއްދާގައި ބަޔާންކޮށްފައި ވަނީ ފަނޑިޔާރަށް ގަބޫލުކުރެވިއްޖެ ހިނދެއްގައި އެ ހެއްކެއް ހާމަނުކުރުމަށް ނުވަތަ ހާމަކުރުން ފަސްކުރުމަށް ނުވަތަ ކަނޑައެޅޭ ވަކި ޝަރުތުތަކެއްގެ މަތިން ހާމަކުރުމަށް އެންގުމުގެ އިހުތިޔާރު ކޯޓަށް ލިބިގެންވާ ކަމަށެވެ.
އަދި، އެގޮތަށް ނިންމުމުގައި ރިއާޔަތްކުރަންޖެހޭ ސަބަބުތަކުގެ ގޮތުގައި އެ އިސްލާހުގައި ހިމަނާފައި ވަނީ ވަރަށް ފުޅާކޮށް މާނަކުރެވޭނެ ސަބަބުތަކެކެވެ. އޭގެ ތެރޭގައި ހިމެނެނީ އެ ހެއްކެއް ހާމަކުރުމުގެ ސަބަބުން އިތުރު ކުށެއް ކުރުމަށް މަގުފަހިވުމާއި ކޯޓުގެ ހުރުމަތް ކެނޑޭ ފަދަ އަމަލު ހިންގުމުގެ އިތުރުން އެ ހެއްކެއް ހާމަކުރުމުގެ ސަބަބުން ދައުވާ ލިބޭ ފަރާތް ނޫން ތިންވަނަ ފަރާތެއްގެ ޒާތީ މައުލޫމާތެއް ހާމަވެދާނެ ފަދަ ހާލަތެއް މެދުވެރިވުމެވެ.
ނަމަވެސް، ތިންވަނަ ފަރާތެއްގެ ޒާތީ މައުލޫމާތު ހާމަވުން ނުވަތަ ކުށަކަށް މަގުފަހިވުން ފަދަ ކަންކަން ވަޒަންކުރާނެ މިންގަނޑެއް އެ އިސްލާހުގައި ބަޔާންކޮށްފައެއް ނުވެ އެވެ.
މިފަދަ އިސްލާހެއް މަޖިލީހަށް ހުށަހެޅިފައި މިވަނީ ރައީސް މުހައްމަދު މުއިއްޒުއަށް ގަޒުފުކުރި ކަމުގެ ދައުވާ އަދަދު ނޫހުގެ ސީއީއޯ، ހުސެއިން ފިޔާޒު މޫސާ އާއި މެނޭޖިން އެޑިޓަރު، ހަސަން މުހައްމަދުގެ އިތުރުން ރައީސް އޮފީހުގައި ކުރިން މަސައްކަތް ކުރި މުވައްޒަފެއްގެ މައްޗަށް އުފުލާފައި ވަނިކޮށެވެ.
އެ މައްސަލައިގެ ޝަރީއަތް ފެށުމަށް ތާވަލުކޮށްފައި ވަނީ މި މަހުގެ 22، ވަނަ ދުވަހުގެ ހެނދުނު 10:00 އަށެވެ.
