އައްޑޫގައި މަސްތުވާތަކެތީގެ ވިޔަފާރި ފުޅާ ދާއިރާއެއްގައި ކުރާ ކަމަށް ފުލުހުން ތުހުމަތުކުރާ އަބްދުﷲ އިބްރާހިމް (އަބުޗާ) ޝަރުތުތަކާއެކު ޕެރޯލް ބޯޑުން މިނިވަންކުރި މައްސަލަ ރައްޔިތުންގެ މަޖިލިސް މެދުވެރިކޮށް ތަހުގީގުކޮށްދިނުމަށް ގަލޮޅު އުތުރު ދާއިރާގެ މެންބަރު މުހައްމަދު އިބްރާހިމް (ކުޑޫ) ހުށަހަޅުއްވައިފި އެވެ.
ޕެރޯލް ބޯޑުން އަބުޗާ ދޫކޮށްލުމުގައި ބަލަންޖެހޭ ބައެއް ކަންކަން ބަލާފައި އޮތީ ރަނގަޅަށް ކަމަށް ނުވާތީ އެ ނިންމުން ބަދަލުކުރަން ހޯމް މިނިސްޓަރު އެންގެވި އެވެ. އެހެންވެ, އިއްޔެ ހަވީރު އަބުޗާ ވަނީ އަލުން ހައްޔަރުކޮށްފަ އެވެ. ޕެރޯލަށް ބޯޑަށް މެންބަރުން އައްޔަނުކުރަނީ ރައީސުލްޖުމްހޫރިއްޔާ އެވެ.
އެ މައްސަލައިގައި ޕެރޯލް ބޯޑުން އަމަލުކުރި ގޮތުގެ އިދާރީ ފައިލް މަޖިލީހުން ހޯދައި ދިރާސާކުރުމަށް ކުޑޫ ވަނީ އެދިފަ އެވެ. އެ މައްސަލައިގައި ހޯމް މިނިސްޓްރީގެ އިސްވެރިން މަޖިލީހަށް ހާޒިރުކޮށް މައުލޫމާތު ސާފުކުރަން ވެސް ކުޑޫ ހުށަހެޅުއްވި އެވެ.
އެ މައްސަލައާ ގުޅިގެން ޕެރޯލް ބޯޑުގެ ހަ މެންބަރުން ވަނީ މަގާމުން ވަކިކޮށްފަ އެވެ. މިހާތަނަށް ބެލި ބެލުމުން އަބުޗާ ދޫކޮށްލުމުގައި ގަސްދުގައި ކަމެއް ގޯސްކޮށް ކުރުމުގެ އެއްވެސް ނިޔަތެއް ޕެރޯލް ބޯޑުގައި އޮތް ކަމަށް ނުފެންނާތީއާއެކު، ވަކިކުރަން ނިންމި ބޭފުޅުންގެ ނަންތައް ހާމައެއް ސަރުކާރުން ހާމައެއް ނުކުރެ އެވެ.
އެ ނިންމުން ނިންމިއިރު ޕެރޯލް ބޯޑުގައި ތިބި ހުރިހާ މެންބަރުން މަޖިލީހަށް ހާޒިރުކޮށް ކަން ހިނގައިދިޔަ ގޮތް ސާފުކުރުމަށް ކުޑޫ ވަނީ ހުށަހަޅުއްވާފަ އެވެ.
ދިވެހިރާއްޖެއަށް 98 ކިލޯގެ މަސްތުވާތަކެތި އެތެރެކުރަން އުޅުނު މައްސަލައިގައި 25 އަހަރަށް އަބުޗާ ޖަލަށް ލާން ހުކުމް ކުރީ މިދިޔަ އަހަރުގެ މެއި 19، ގަ އެވެ. އެ މައްސަލައިގައި އޭނާގެ މައްޗަށް ކޮށްފައި ވަނީ 12.5 އަހަރުގެ ތިން ހުކުމެވެ. ޕެރޯލަށް އޭނާ ޝަރުތު ހަމަވީ 6.5 އަހަރު ޖަލުގައި ހޭދަ ކުރި ކަމަށް ބުނެ އެވެ. ނަމަވެސް އެ މުއްދަތު އޭނާ ހަމައެއްނުކުރެ އެވެ.
ޖަލުތަކާއި ޕެރޯލްގެ ގާނޫނުގެ 125 ވަނަ މާއްދާގައި ބަޔާންކޮށްފައި އޮންނަނީ މަސްތުވާތަކެތި ވިއްކުމާއި ވިޔަފާރިކުރުމާއި އެ ތަކެތި ދިވެހިރާއްޖެއަށް އެތެރެކުރުމުގެ ކުށް ސާބިތުވެފައިވާ މީހަކަށް ޕެރޯލްގެ ފުރުސަތު ލިބޭނީ އެ މީހަކަށް ކޮށްފައިވާ އެންމެ ދިގު ހުކުމުގެ ދެބައިކުޅަ އެއްބައި ތަންފީޒުކޮށް ނިމުމުން ކަމަށެވެ.
