ރައްޔިތުންގެ މަޖިލީހުގެ އިދާރާއިން ކަރަންޓު ކެނޑުމުން މިއަދަށް ތާވަލު ކުރި މަޖިލީހުގެ ޖަލްސާ 11:00 ޖަހާއިރަށް ފަސްކޮށްފި އެވެ.
މަޖިލީހުގެ އިދާރާއިން ބުނީ އެ އިދާރާއިން ކަރަންޓު ދިޔުމާ ގުޅިގެން 9:00 ޖަހާއިރަށް ތާވަލުކޮށްފައި އޮތް ޖަލްސާ 11:00 ޖަހާއިރަށް ފަސްކޮށްފައިވާ ކަމަށެވެ.
"މަޖިލީހުގެ އިދާރާއިން ކަރަންޓު ދިޔުމާ ގުޅިގެން މިއަދުގެ ޖަލްސާ 11:00 އަށް ފަސްކުރެވިފައިވާ ވާހަކަ ދަންނަވަން،" މަޖިލީހުގެ އިދާރާއިން މީޑިއާތަކަށް ފޮނުވި މެސެޖެއްގައި ބުންޏެވެ.
މަޖިލީހުގެ މިއަދުގެ ޖަލްސާއަށް އެޖެންޑާ ކޮށްފައި އޮތީ ޔައުމިއްޔާ ފާސްކުރުމާއި ސަރުކާރުގެ ފަރާތުން، ފުނަދޫ ދާއިރާގެ މެންބަރު މުހައްމަދު މަމްދޫހް ހުށަހަޅުއްވާފައިވާ ޖިނާއީ އިޖުރާއަތުގެ ގާނޫނަށް އިސްލާހު ގެނައުމުގެ ބިލުގެ ބަހުސް ކުރިއަށް ގެންދިޔުމެވެ.
މީގެއިތުރުން ދުވަހުގެ މަސައްކަތުގެ ތެރެއިން ވޯޓުން ނިންމާ ހިސާބަށް ގޮސްފައިވާ ކަންކަމަށް ވޯޓަށް އެހުމަށްވެސް ޖަލްސާއަށް ވަނީ އެޖެންޑާ ކޮށްފަ އެވެ.
މީގެކުރިންވެސް މަޖިލީހުގެ ޖަލްސާ އޮންނަ ދުވަހު މަޖިލީހުގެ އިދާރާއިން ކަރަންޓު ކެނޑިފައިވެ އެވެ. އެގޮތުން ބައެއް ފަހަރު މަޖިލީހުގެ ޖަލްސާ ކުރިއަށްދަނިކޮށްވެސް ކަރަންޓު ކެނޑިފައިވެ އެވެ.
