މި ހިނގާ އޮކްޓޯބަރު މަހު އިންޑިއާއަށް ދައްކަންޖެހޭ 30 ބިލިއަން ރުޕީސްގެ ކަރަންސީ ސްވޮޕު ރޯލްއޯވާކޮށްދޭން އެ ގައުމުގެ ސަރުކާރުން ނިންމައިފި އެވެ.
އިތުބާރު ހުރި މަސްދަރުތަކުން އަދަދު އަށް އެނގިފައިވާ ގޮތުގައި އޮކްޓޯބަރު 22، އަށް ހަމަވާ ކަރަންސީ ސްވޮޕު ރޯލްއޯވާ ކޮށްދޭން އެދުނީ ދިވެހި ސަރުކާރުންނެވެ. ކަރަންސީ ސްވޮޕު ރޯލްއޯވާ ކޮށްދޭން ނިންމާފައިވާކަން "ރޮއިޓާސް" އަށް ފިނޭންސް މިނިސްޓަރު ހަސަން ޒަރީރު ދެއްވި އިންޓަވިއުއެއްގައި އެ ނޫހުން ވަނީ ހާމަކޮށްފަ އެވެ.
އެ ކަރަންސީ ސްވޮޕަކީ، އޮކްޓޯބަރު، 2024، ގައި ނެގި 400 މިލިއަން ޑޮލަރުގެ ކަރަންސީ ސްވޮޕު މިދިޔަ އޭޕްރީލް މަހު ދިވެހި ސަރުކާރުން އަނބުރާ ދެއްކި ދުވަހު ނެގި 30 ބިލިއަން ރުޕީސްގެ ކަރަންސީ ސްވޮޕެކެވެ.
ރުޕީސް އިން އެ ކަރަންސީ ސްވޮޕު އިޝޫ ކުރި ނަމަވެސް ދިވެހި ސަރުކާރަށް ވަނީ އެ ފައިސާ ޑޮލަރަށް ބަދަލުކޮށްފަ އެވެ.
މި އޮކްޓޯބަރު މަހު ދައްކަންޖެހޭ ކަރަންސީ ސްވޮޕު ރޯލްއޯވާ ކޮށްދޭން ނިންމިއިރު، މިދިޔަ ސެޕްޓެމްބަރުގައި ދިވެހި ސަރުކާރުން ވަނީ އިންޑިއާއަށް ދައްކަންޖެހޭ 50 މިލިއަން ޑޮލަރު ދައްކައިފަ އެވެ. އެ ފައިސާ ދައްކަންޖެހުނީ، ދަރަނި ދެއްކުން ފަސްކޮށްދޭން އެދުނު އެދުންތައް ފެއިލްވުމުންނެވެ.
އެ ދަރަނި ދައްކަންޖެހުމުން ރިޒާވް ހުސްވެ، އަސާސީ ބޭނުންތަކަށް ހަރަދު ކުރަން ވެސް ފައިސާ ނުހުންނާނެ ކަމަށް އެމްޑީޕީގެ ޗެއާޕާސަން ރައީސް މުހައްމަދު ނަޝީދު ވަނީ ވިދާޅުވެފަ އެވެ. އޭގެ ފަހުން ރިޒާވް "ދަށްވެފައި ހުރި" ކަމަށް ރައީސް މުހައްމަދު މުއިއްޒު ވެސް ވަނީ އިއުތިރާފްވެވަޑައިގެންފަ އެވެ.
"ރިޒާވް ދަށްވެފައި ހުރި ހުރުން ވެސް، އިރާދަކުރެއްވިއްޔާ މި މަސައްކަތުގެ ތެރެއިން ދެން ދާނީ ރަނގަޅުވަމުން. އެހެންވީމާ، ކުރިއަށް އޮތް ދުވަސްތަކަކީ، މިހާރަށްވުރެ އަޅުގަނޑުމެންގެ ރިޒާވް ރަނގަޅުކުރަމުން ގެންދެވޭނެ ދުވަސްތަކެއް، އަދި ކުރިއަށް އޮތް ހައެއްކަ މަސްދުވަހުގެ ތެރޭގައި، މިހާރު އަޅުގަނޑުމެން މި ކުރަމުންދާ މަސައްކަތްތަކުގެ ނަތީޖާއިން، ކޮންމެ މަހަކުވެސް ރަނގަޅު ކުރެވެމުން ގޮސް، ވަރަށް ބޮޑަށް ރަނގަޅުވާނެ،" ސެޕްޓެމްބަރު 25، ގައި މުއިއްޒު ވިދާޅުވި އެވެ.
