ކުޑަކުދިންގެ ކެންސަރު ބަލީގެ މާހިރެއް ކަމަށްވާ ޕްރޮފެސަރު ބޮބް ފިލިޕްސް ވިދާޅުވާ ގޮތުގައި، ގިނަ ދުވަހަށް ދެމިގެންދާ، ނުވަތަ ހާލަތު ގޯސްވަމުންދާ ނުވަތަ ބޮޑުވަމުންދާ އަލާމާތްތަކަށް ބެލެނިވެރިން ސަމާލުވުމަކީ ވަރަށް މުހިންމު ކަމެކެވެ.
ތިރީގައިވާ ކަންކަން ފާހަގަކުރެވޭނަމަ ޑޮކްޓަރެއްގެ ލަފާ ހޯދުމަށް އޭނާ އިރުޝާދު ދެއްވަ އެވެ.
- އާދަޔާ ހިލާފަށް ވަރުބަލިވުން
- މާބޮޑަށް މޫނުމަތި ދޮންވެ، ފަނޑުވުން
- ސަބަބެއް ނޭނގި ހަށިގަނޑުގެ އެކި ތަންތަން ނޫފައިގަތުން
- ހަށިގަނޑުގައި އުފެދޭ ގަނޑުތަކާއި ދުޅަތައް ނުފިލައި ގިނަ ދުވަސްވުން ނުވަތަ ވަގުތާއެކު ބޮޑުވަމުންދިއުން
ބޮޑެތި މީހުންނާ އަޅާބަލާއިރު ކުޑަކުދިންގެ ހަށިގަނޑުގައި ކެންސަރު ފެތުރޭ މިންވަރު މާ އަވަހެވެ. މީގެ މައިގަނޑު ސަބަބަކީ ކުޑަކުދިން ހެދިބޮޑުވަމުންދާ ދުވަސްވަރު ކަމަށްވާތީ، ހަށިގަނޑުގެ ސެލްތައް އިތުރުވާ މިންވަރު އަވަސްވުމެވެ.
ކުޑަކުދިންނާއި ޒުވާނުންގެ ކެންސަރު ބައްޔާ ބެހޭ އިނގިރޭސި ޖަމިއްޔާ (ސީސީއެލްޖީ) ގެ މާހިރުން، ޕްރޮފެސަރު ފިލިޕްސް ހިމެނޭހެން ބާރުއަޅުއްވަނީ، މި ބައްޔަށް ހޭލުންތެރިކަން އިތުރުކުރުމަށާއި ބަލި ދެނެގަންނަ ވަގުތު އަވަސްކުރުމަށެވެ.
އެގޮތުން ސިއްހީ މާހިރުންނަށް ހާއްސަ "ތިނެއްގެ އުސޫލެއް" ވަނީ ކަނޑައަޅާފަ އެވެ. އެއީ ކުއްޖެއްގެ ކިބައިން ތިން އަލާމާތެއް މެދުނުކެނޑި ފެންނަނަމަ، ނުވަތަ އެއް މައްސަލައެއްގައި ތިން ފަހަރު ޑޮކްޓަރަށް ދައްކާފައިވާނަމަ، ނުވަތަ ސަބަބެއް ނޭނގޭ އަލާމާތްތަކެއް ފެންނަތާ ތިން ހަފުތާ ވެފައިވާނަމަ، އެ ކުއްޖަކު އިތުރު ތަހުލީލުތަކަށް ރިފަރަލް ފޮނުވުމެވެ.
ނުރައްކާތަކެއް ހުރި ނަމަވެސް، 1970 ގެ އަހަރުތަކާ އަޅާބަލާއިރު ކެންސަރު ބަލިން ސަލާމަތްވާ ކުދިންގެ ނިސްބަތް މިހާރު ވަނީ ވަރަށް ބޮޑަށް އިތުރުވެފަ އެވެ. ތަފާސްހިސާބުތަކުން ދައްކާ ގޮތުގައި، ބަލި ދެނެގަނެވޭ ކުދިންގެ ތެރެއިން ކޮންމެ 10 ކުއްޖަކުން އަށް ކުދިން، ބަލި ދެނެގަންނަތާ ފަސް އަހަރާއި 10 އަހަރަށް ވުރެ ގިނަ ދުވަހު ދުނިޔޭގައި ދެމިތިބެ އެވެ.
މައުލޫމާތު: ބީބީސީ
