މަގުބޫލުކަން ހޯދާފައިވާ "އެވެޓާ: ދަ ލާސްޓް އެއާބެންޑާ" ފްރެންޗައިޒްގެ ދުނިޔެ އިތުރަށް ފުޅާވެ، އާ ސީރީޒެއް އުފައްދަން ނިންމައިފި އެވެ.
މި ސީރީޒްގައި ފެނިގެންދާނީ ގުދުރަތީ ބާރުތައް ކޮންޓްރޯލް ކުރުމުގެ ގާބިލުކަން ލިބިފައިވާ، ނުކިޔަމަންތެރި ފުރާވަރުގެ އެވެޓާއެއްގެ ވާހަކަ އެވެ.
މި ފްރެންޗައިޒް އުފެއްދި މައިކަލް ޑާންޓޭ ޑިމާޓީނޯ އާއި ބްރަޔަން ކޮނިއެޓްޒްކޯ، "އެވެޓާ ކުރުކް: ވޭވް އޮފް ކޭއޯސް" ގެ ނަމުން ނަންދީފައިވާ މި އެނިމޭޓެޑް ސީރީޒް އިއުލާން ކުރީ މިދިޔަ ހުކުރު ދުވަހު ނިއުޔޯކް ކޮމިކް ކޮންގަ އެވެ. މި ހަފުލާގެ ބައިވެރިންނަށް ކުރުކް އާއި އޭނާގެ ގެންގުޅޭ ޖަނަވާރު "ނިކިކް" ފުރަތަމަ ފަހަރަށް ވަނީ ދައްކާލާފަ އެވެ.
ޕެރަމައުންޓް ޕްލަސް މެދުވެރިކޮށް ދެއްކުމަށް ހަމަޖެހިފައިވާ މި ސީރީޒް ރިލީޒްކުރާނެ ވަކި ތާރީޚެއް އަދި އިއުލާނެއް ނުކުރެ އެވެ.
"އެވެޓާ: ދަ ލާސްޓް އެއާބެންޑާ" ފްރެންޗައިޒްގައި ދައްކުވައިދެނީ ގުދުރަތީ ހަތަރު ބާރަކަށް ބެހިފައިވާ ދުނިޔެއެކެވެ. މި ދުނިޔޭގެ ހަމަޖެހުން ގާއިމުކުރުމަށްޓަކައި ފެނާއި، އަލިފާނާއި، ބިމާއި، ވައިގެ ބާރު އެކަނި ކޮންޓްރޯލް ކުރެވެނީ އެވެޓާއަށެވެ.
މި ފްރެންޗައިޒްގެ އަސްލު ސީރީޒަށް ފަހު، "ދަ ލެޖެންޑް އޮފް ކޯރާ" އަދި "އެވެޓާ: ސެވަން ހޭވަންސް" ގެ ނަމުގައި އިތުރު ދެ ސީރީޒެއް ވަނީ އުފައްދާފަ އެވެ.
ސްކައިޑޭންސްގެ ބަޔާނުގައި ބުނެފައިވާ ގޮތުގައި "ސެވަން ހޭވަންސް" ގެ އިތުރު ދެ ސީޒަނެއް އުފެއްދުމަށް މިހާރު ވަނީ ނިންމާފަ އެވެ.
ޑިމާޓީނޯ އާއި ކޮނިއެޓްޒްކޯ ކުރިން ވަނީ ނެޓްފްލިކްސްއާ ގުޅިގެން "އެވެޓާ" ގެ ލައިވް-އެކްޝަން ސީރީޒެއް އުފެއްދުމުގެ މަސައްކަތް ކޮށްފަ އެވެ. ނަމަވެސް، އުފެއްދުންތެރިކަމުގެ ވިސްނުން ތަފާތުވުމުގެ ސަބަބުން 2020 ވަނަ އަހަރު އެ ދެމީހުން ވަނީ އެ މަޝްރޫއުން ވަކިވެފަ އެވެ. އޭގެ ފަހުން 2021 ވަނަ އަހަރު، އެ ދެމީހުން ވަނީ ނިކަލޯޑިއަންއާ ގުޅިގެން "އެވެޓާ ސްޓޫޑިއޯސް" އުފައްދައި، އާ ފިލްމުތަކާއި ޓީވީ ސީރީޒްތަކުގެ ޒަރީއާއިން މި ފްރެންޗައިޒް އިތުރަށް ފުޅާކުރުމުގެ މަސައްކަތް ފަށާފަ އެވެ.
