މަޝްހޫރު "ބްރިޖަޓަން" ސީރީޒްގެ ވައިލެޓް ބްރިޖަޓަންގެ ޒުވާން ދުވަސްވަރަށް ބިނާކޮށް އާ ލިމިޓެޑް ސީރީޒްއެއް އުފެއްދުމުގެ މަސައްކަތް ފަށާފައިވާ ކަމަށް ނެޓްފްލިކްސް އާއި ޝޮންޑަލޭންޑުން މިދިޔަ ބުރާސްފަތި ދުވަހު އިންސްޓަގްރާމް މެދުވެރިކޮށް އިއުލާނުކޮށްފި އެވެ.
އެ ދެ ކުންފުނިން ސޯޝަލް މީޑިއާގައި ކުރި ޕޯސްޓެއްގައި ބުނެފައިވަނީ، ބްރިޖަޓަން އާއިލާގެ އެންމެ އިސް މެންބަރު ކަމަށްވާ ވައިލެޓް ބްރިޖަޓަންގެ ވާހަކައަށް ސަމާލުކަން ދޭންޖެހޭ ވަގުތު ޖެހިއްޖެ ކަމަށެވެ. ނެޓްފްލިކްސް އިން މިހާތަނަށް ގެނެސްދީފައިވާ ބްރިޖަޓަންގެ ހަތަރު ސީޒަނުގައި ވެސް ވައިލެޓްގެ ރޯލު ކުޅެފައިވަނީ އިނގިރޭސި ބަތަލާ ރޫތު ގެމެލް އެވެ.
ޒުވާން ދުވަސްވަރުގެ ވައިލެޓް އާއި ވިސްކައުންޓް އެޑްމަންޑް ބްރިޖަޓަންގެ ލޯބީގެ ވާހަކަތައް ކިޔައިދޭ އާ ސީރީޒްއެއް އުފެއްދުމުގެ މަސައްކަތް މިހާރު ކުރިއަށްދާ ކަމަށް ވެސް އެ ޕޯސްޓުގައި ބުނެފައިވެ އެވެ.
އަދި ވަކި ނަމެއް ދީފައިނުވާ މި ލިމިޓެޑް ސީރީޒްއަކީ "ބްރިޖަޓަން" ޔުނިވާސްގެ ތެރެއިން އުފައްދާ އެންމެ ފަހުގެ ސްޕިން-އޮފް ސީރީޒް އެވެ.
މި އާ ސީރީޒްގެ ލިޔުންތެރިން އަދި އެގްޒެކެޓިވް ޕްރޮޑިއުސަރުންގެ ގޮތުގައި މަސައްކަތް ކުރާނީ ޝޮންޑާ ރައިމްސް އާއި ނިކޮލަސް ނާޑިނީ އެވެ. ނާޑިނީ އަކީ މީގެ ކުރިން ގެނެސްދިން ބްރިޖަޓަންގެ ސްޕިން-އޮފް ސީރީޒް "ކުއީން ޝާލޮޓް" ގެ ވެސް ޕްރޮޑިއުސަރެކެވެ.
އިނގިރޭސިވިލާތުގެ ރީޖެންސީ ޒަމާނުގެ ލޯބީގެ ވާހަކަތަކެއްގެ މައްޗަށް ބިނާކޮށްފައިވާ މި ފްރެންޗައިޒް އަކީ ޖޫލިއާ ކުއިން ލިޔެފައިވާ "ބްރިޖަޓަން" ފޮތްތަކުގެ މައްޗަށް އުފައްދާފައިވާ ސީރީޒްތަކެކެވެ. މީގެ ކޮންމެ ބަޔަކުން ވެސް ފެނިގެންދަނީ ބްރިޖަޓަން އާއިލާގެ އެކި ކުދިންގެ ލޯބީގެ ވާހަކަތަކެވެ.
ބްރިޖަޓަންގެ ފަސްވަނަ ސީޒަނުގެ މަސައްކަތް މިހާރު ލަންޑަނުގައި ކުރިއަށްދާއިރު، މި ސީޒަނުގައި މައިގަނޑު ގޮތެއްގައި ފެނިގެންދާނީ ހެނާ ޑޮޑް ކުޅޭ ފްރެންޗެސްކާ ބްރިޖަޓަން އާއި މަސާލީ ބަޑޫޒާ ކުޅޭ މިކޭލާ ސްޓާލިންގެ ވާހަކަތަކެވެ.
"ބްރިޖަޓަން" 2020 ވަނަ އަހަރު ފުރަތަމަ ފަހަރަށް ދައްކަން ފެށުމާއެކު މުޅި ދުނިޔޭގައި ބޮޑު މަގުބޫލުކަމެއް ހޯދިއިރު، އެ ސީރީޒްގައި އެކި ނަސްލުތަކުގެ ތަރިން ހިމަނާފައިވާތީ ގިނަ ބައެއްގެ ތައުރީފު ވަނީ ލިބިފަ އެވެ.
