އިނގިރޭސިވިލާތުގެ އަމީރު ހެރީގެ އަނބިކަނބަލުން މޭގަން މާކަލް އަލުން އެކްޓިންގެ ދާއިރާއަށް އެނބުރި ވަޑައިގަންނަވަނީ ނެޓްފްލިކްސްގެ ސީރީޒް "ދަ ޖެންޓްލްމެން" އިން ކަމަށް މީޑިއާ ރިޕޯޓުތަކުން މިދިޔަ ހުކުރު ދުވަހު ބުނެފި އެވެ.
ހޮލީވުޑް ރިޕޯޓާ އިން ބުނި ގޮތުގައި، މަޝްހޫރު ޑައިރެކްޓަރު ގައި ރިޗީ އުފައްދާފައިވާ މި ސީރީޒްގެ ތިންވަނަ ސީޒަނުން ފުރުސަތު ހޯއްދެވުމަށް ޑަޗެސް އޮފް ސަސެކްސް މޭގަން ގެންދަވަނީ ފަހު މަރުހަލާގެ މަޝްވަރާތައް ކުރައްވަމުންނެވެ.
ނަމަވެސް، ހޮލީވުޑްގެ "ޑެޑްލައިން" މަޖައްލާއިން ބުނެފައިވަނީ، މި ސީރީޒްގެ ތިންވަނަ ސީޒަނެއް އުފައްދާނެކަން އަދި ރަސްމީކޮށް އިއުލާނުކޮށްފައި ނުވާތީ، މޭގަންއާ އެކު ކުރެވޭ މަޝްވަރާތަކަކީ ހަމައެކަނި އުންމީދީ ވާހަކަތަކެއް ކަމަށެވެ.
"ދަ ޖެންޓްލްމެން" ގެ ދެވަނަ ސީޒަން އަންނަ މަހު ރިލީޒް ކުރުމަށް ވަނީ ތާވަލުކޮށްފަ އެވެ.
މީގެ އިތުރުން ޑެޑްލައިން އިން ރިޕޯޓުކޮށްފައިވާ ގޮތުގައި، 2011 އިން 2018 އަށް އެމެރިކާގެ މަޝްހޫރު ޑްރާމާ ސީރީޒް "ސޫޓްސް" އިން ފެނިގެންދިޔަ މޭގަންއަށް މި ސީރީޒްއިން އަދި ވަކި ހާއްސަ ރޯލެއް ކަނޑައަޅާފައެއް ނުވެ އެވެ.
މިކަމާ ގުޅޭގޮތުން ރޮއިޓާސް އިން ސުވާލު ކުރުމުން، ނެޓްފްލިކްސް އާއި ހެރީ އަދި މޭގަންގެ ތަރުޖަމާނު ވެސް ވަނީ އެއްވެސް އެއްޗެއް ބުނަން އިންކާރުކޮށްފަ އެވެ.
މި ހަބަރުތައް ފެންމަތިވެފައި މިވަނީ، 2020 ވަނަ އަހަރު ޝާހީ އާއިލާގެ ރަސްމީ ޒިންމާތަކުން ވަކިވެވަޑައިގެންނެވި ހެރީ، މިހާރު ދިރިއުޅުއްވާ ކެލިފޯނިއާ ދޫކުރައްވައި، އަނބިކަނބަލުން މޭގަން އާއި ދެ ދަރިކަލުންނާއެކު އަލުން އިނގިރޭސިވިލާތަށް ދިރިއުޅުން ބަދަލުކުރައްވަން ނިންމެވިކަން ކުއްލި ގޮތަކަށް އިއުލާނުކުރެއްވި ދަނޑިވަޅެއްގަ އެވެ.
ތިއޯ ޖޭމްސް މުހިންމު ރޯލަކުން ފެނިގެންދާ "ދަ ޖެންޓްލްމެން" ސީރީޒް ބިނާވެފައިވަނީ، އާއިލީ ބޮޑު މުއްސަނދިކަމެއް ކުއްލި ގޮތަކަށް ވާރުތަވާ މީހެއްގެ މައްޗަށެވެ. ނަމަވެސް އެކަން ގުޅިފައި ވަނީ އިނގިރޭސިވިލާތުގެ ކުށްވެރިންގެ ނެޓްވޯކަކުން ހިންގާ ބޮޑު ކެނަބިސް ވިޔަފާރިއެއްގެ މަރުކަޒުކަން އޭނާއަށް ފަހުން އެނގިގެންދެ އެވެ.
