ޖެފްރީ އެޕްސްޓީންގެ މަރުގެ މައްސަލައިގައި ފޮރެންސިކް މާހިރަކު ކުރި ދިރާސާތަކަކަށް ފަހު، އެއީ އަމިއްލައަށް މަރުވުމެއް ނޫން ކަމަށާއި މީހަކު އޭނާ މަރާލީ ކަމަށް ފޮރެންސިކް ތަހުލީލުތަކުގެ މާހިރަކު ބުނެފި އެވެ.
މި މައްސަލައިގައި ވާހަކަދައްކަވަމުން ފޮރެންސިކް މާހިރު ޕްރޮފެސަރު މައިކަލް ފްރީމަން ވިދާޅުވީ، ނިއުޔޯކް ސިޓީގެ މެޑިކަލް އެގްޒެމިނަރުގެ ފައިލްތައް ދިރާސާކުރުމުން އެޕްސްޓީން މަރުވެފައިވަނީ ކަރުގައި ހިފާ ނޭވާ ހާސްކޮށްލައިގެން ކަމަށް ބެލެވޭ ކަމަށެވެ.
ބީބީސީ ނިއުސްނައިޓް އަށް ދެއްވި އިންޓަވިއުއެއްގައި ފްރީމަން ވިދާޅުވީ، އެޕްސްޓީންގެ ހަށިގަނޑުން ފެންނަން ހުރި ނިޝާންތަކަށް ބަލާއިރު އޭނާ މަރާލާފައިވަނީ ފަހަތުން އައިސް ކަރުގައި އެއްޗެއް އޮޅައިގެން ކަމަށް ބޮޑަށް ބެލެވޭ ކަމަށެވެ. އޭނާގެ ދިރާސާތަކުން ދައްކާ ގޮތުގައި އެޕްސްޓީންގެ ކަރުގައި ހުރި ނިޝާންތަކުގެ މަތީގައި ނިޔަފަތީގެ ނިޝާންތަކެއް ހުއްޓެވެ. މިއީ ކަރުގައި އޮޅާފައިވާ އެއްޗެއް ނައްޓާލުމަށް އޭނާ މަސައްކަތް ކޮށްފައިވާ ކަމުގެ ހެއްކެއް ކަމަށް ފްރީމަން ފާހަގަކުރެއްވި އެވެ. މީގެ އިތުރުން، އެޕްސްޓީންގެ ކޮނޑަށާއި މޫނަށް އަނިޔާވެފައިވާ ކަމުގެ ނިޝާންތައް ފޮޓޯތަކުން ފެންނަން ހުރި ކަމަށްވެސް އޭނާ ވިދާޅުވި އެވެ.
ނަމަވެސް، 2019 ވަނަ އަހަރު އެޕްސްޓީންގެ ހަށިގަނޑުގެ އޮޓޯޕްސީ ހެދި މެޑިކަލް އެގްޒެމިނަރު ޑރ. ބާބަރާ ސެމްޕްސަން ވަނީ އެއީ އަމިއްލައަށް މަރުވުމެއް ކަމަށް ނިންމަވާފަ އެވެ. ސެމްޕްސަން ވިދާޅުވެފައިވަނީ އެޕްސްޓީންގެ ހަށިގަނޑުން ފެނުނު އަނިޔާތަކަކީ ދަންޖެހިގެން މަރުވާ މީހުންގެ ހަށިގަނޑުން ފެންނަ ފަދަ އަނިޔާތަކެއް ކަމަށާއި، މީހަކު އޭނާ މަރާލަން އުޅުމުން ދިފާއުގައި މަސައްކަތް ކޮށްފައިވާ ކަމުގެ އެއްވެސް ހެއްކެއް ފެންނަން ނެތް ކަމަށެވެ. ސެމްޕްސަން އަދިވެސް ހުންނެވީ އެ ނިންމެވުމުގެ މަތީގަ އެވެ.
އެޕްސްޓީން މަރުވެފައި އޮއްވާ ފެނުނީ އޮގަސްޓް 10، 2019 ގައި، އޭނާގެ މައްޗަށް އުފުލާފައިވާ ޖިންސީ ވަގުފާރީގެ ދައުވާތަކުގެ ޝަރީއަތް ނިމެންދެން ނިއުޔޯކްގެ ޖަލެއްގައި ބަންދުކޮށްފައި ހުއްޓަ އެވެ. ފްރީމަން މި ދިރާސާ ކުރިއަށް ގެންދިޔައީ އެޕްސްޓީންގެ ބޭބެ މާކް އެޕްސްޓީން ފޯރުކޮށްދިން މެޑިކަލް ފައިލްތަކާއި ފޮޓޯތަކުގެ އެހީގައެވެ. މާކް އެޕްސްޓީން އަބަދުވެސް ތުހުމަތު ކުރަމުން އަންނަނީ އޭނާގެ ކޮއްކޮ މަރާލާފައިވާ ކަމަށެވެ.
ފްރީމަން އަކީ އެމެރިކާގެ އެކި ސްޓޭޓްތަކުގެ އެޓާނީ ޖެނެރަލުންނަށް މަރުގެ މައްސަލަތަކުގައި ލަފާދޭ ތަޖުރިބާކާރެކެވެ. އޭނާ ވަނީ މަޝްހޫރު ޖޯޖް ފްލޮއިޑްގެ މަރުގެ މައްސަލައިގައިވެސް މަސައްކަތް ކޮށްފައެވެ. އޭނާ ވިދާޅުވީ އޭނާގެ މި ދިރާސާއަކީ އެއްވެސް ފަރާތަކުން ފައިސާ ދީގެން ކުރުވާފައިވާ ކަމެއް ނޫން ކަމަށާއި، މިއީ މިނިވަން ދިރާސާއެއް ކަމަށެވެ.
މި މައްސަލައިގައި އިތުރަށް ވާހަކަދައްކަވަމުން ފްރީމަން ވިދާޅުވީ، ޖަލުގައި ދަންޖެހިގެން މަރުވާ މީހުންގެ ތަހުގީގުތަކުގައި ހަށިގަނޑު ތިރިކުރުމުގެ ކުރިން ފޮޓޯ ނަގަންޖެހޭނެ ކަމަށާއި، ނަމަވެސް މި މައްސަލައިގައި އެފަދަ ފޮޓޯއެއް ނެތް ކަމަށެވެ. އެޕްސްޓީން މަރާލީ ކާކުތޯ ސުވާލުކުރުމުން އޭނާ ވިދާޅުވީ އެއީ އޭނާގެ ދިރާސާގެ ބައެއް ނޫން ކަމަށާއި، އެކަމާ ބެހޭގޮތުން އެއްޗެއް ބުނަން ނޭނގޭ ކަމަށެވެ.
އެޕްސްޓީން އަކީ 2008 ވަނަ އަހަރު ކުޑަކުދިން ލައްވާ ހަށިވިއްކުވި މައްސަލައެއްގައި ކުށްވެރިވެފައިވާ މީހެކެވެ. އޭނާ މަރުވިއިރު، ގިނަ އަދަދެއްގެ ކުޑަކުދިން ބޭނުންކޮށްގެން ޖިންސީ ވަގުފާރީގެ ބޮޑު ނެޓްވޯކެއް ހިންގި ކަމުގެ ތުހުމަތުގައި ޝަރީއަތް ދިޔައީ ކުރިއަށެވެ. އޭނާގެ މަރާ ގުޅިގެން ދުނިޔޭގެ އެކި ކަންކޮޅުތަކުގައި ތަފާތު ތިއަރީތައް ފެތުރިފައިވާއިރު، ފްރީމަން ވިދާޅުވީ އޭނާގެ ހޯދުންތަކަށް ފާޑުކިޔާ މީހުންނަށް އޭނާގެ ދިރާސާ ބަލައި، އޭނާއަށް ގޯހެއް ހެދިފައިވާނަމަ އެކަން ދެއްކުމުގެ ފުރުސަތު އެބައޮތް ކަމަށެވެ.







