ހދ. ނޭކުރެންދޫގައި ނާސަރީ އުސޫލުން ގަސް އިންދުމުގެ މަސައްކަތް ކުރަމުންދާ ލޭންޑްސްކޭޕިން ސޮލިއުޝަން ކުންފުނިން ގަވާއިދާ ހިލާފަށް އެ ރަށުން ގަސް ބޭރުކުރާ ކަމަށް ބުނެ ރަށު ކައުންސިލުން ކަންބޮޑުވުން ފާޅުކޮށްފި އެވެ.
ނޭކުރެންދޫ ކައުންސިލްގެ ރައީސް މުހައްމަދު ތޯހިރު ވިދާޅުވީ ލޭންޑްސްކޭޕިން ސޮލިއުޝަން ކުންފުނިން އެ ރަށުން ގަސް ބޭރުކުރަމުންދަނީ ގިނަ އަދަދެއްގެ ކަޅު ވެލި ބަނދެގެން ކަމަށާއި އެއީ ގާނޫނާ ހިލާފަށް ކުރަމުންދާ ކަމެއް ކަމަށެވެ.
"ގަސްކަރަ ގާނޫނު ބުނާގޮތުންވިއްޔާ ރޫޓް ބޯލްގައި ހުންނަ ވެލި ފިޔަވައި ވެއްޔެއް ބޭރެއް ނުކުރެވޭނެ. އެހެންނަމަވެސް ގާތްގަނޑަކަށް ވަށަމިނުގައި އަށް އިންޗިއާއި 12 އިންޗިއާ ހުންނަވަރުގެ ކޮތަޅުގައި ކަޅު ވެލީގައި 18 ލީޓަރުގެ ކުލަ ޓައްޕުގައި ކަޅު ވެލި ބަނދެގެން ވެއްޔާ އެކީގައި ބޭރުކުރަނީ،" އޭނާ ވިދާޅުވި އެވެ.
އެ ކުންފުނިން ވަނީ ރަށުގެ އެކި ސަރަހައްދުން ގަސްތައް އުފުރާފައި ކަމަށް ކައުންސިލުން ބުންޏެވެ.
"އަޅުގަނޑުމެންގެ އޮތް އެންމެ ބޮޑު އެއް ކަންބޮޑުވުމަކީ ރަށުގެ އެކި ސަރަހައްދުތަކުގައި ހުންނަ ނިކަ، މިދިލި ދެން އަޅުގަނޑުމެން އެބޭފުޅުންނަށް ދިން ބިމުގައި ހުރި ބޮޑެތި ގަސް ވެސް އުފުރައިގެން ވެލި ބަނދެގެން ބޭރުކުރާ މައްސަލަ،" އޭނާ ވިދާޅުވި އެވެ.
މީގެއިތުރުން ލޭންޑްސްކޭޕިން ސޮލިއުޝަނަށް ދޫކޮށްފައިވާ ނާސަރީން ހައްދާ ގަސް ބޭރުކުރުމުގެ ހުއްދަ މިދިޔަ އަހަރު ހަމަވެފައިވާއިރު، އެ ކުންފުނިން ގަސް ބޭރުކުރަމުންދަނީ ހުއްދަވެސް ނެތިކަން ތޯހިރު ފާހަގަކުރެއްވި އެވެ.
މައުލޫމާތު ލިބޭ ގޮތުގައި ނޭކުރެންދޫއިން ގަސް ބޭރުކުރާ ކޮންމެ ފަހަރަކު ގާތްގަނޑަކަށް 5،000 ވަރަކަށް ގަސް ބޭރުކުރެ އެވެ. މަހެއްގެ މައްޗަށް އެކި ފަހަރު މަތިން ގަސް ބޭރުކުރާ ކަމަށް ވެސް މައުލޫމާތު ލިބެ އެވެ.
މި މައްސަލަ އެންވަޔަރަމަންޓް ރެގިއުލޭޝަން އޮތޯރިޓީ (އީއާރްއޭ) އަށް ނޭކުރެންދޫ ކައުންސިލުން ހުށަހެޅުމުން އެ މައްސަލަ އެ އޮތޯރިޓީން އަންނަނީ ތަހުގީގު ކުރަމުންނެވެ. އަދި މައްސަލަ ފުލުހަށް ހުށަހެެޅުމުން ފުލުހުން ވެސް އަންނަނީ މައްސަލަ ބަލަމުންނެވެ.
އީއާރްއޭގެ ޗީފް އެގްޒެކެޓިވް ހަސަން މުހައްމަދު އަދަދު އަށް ވިދާޅުވީ ނޭކުރެންދޫ ކައުންސިލުން ހުށަހަޅާފައިވާ މައްސަލަ ބެލުމުގެ ގޮތުން ފުލުހުންނާ ވާހަކަ ދައްކައިގެން ގަވާއިދާ ހިލާފަށް ކަޅު ވެލި ބޭރުކުރިތޯ ބަލަމުންދާ ކަމަށެވެ.
