ހޮނިހިރު ދުވަހު އއ. އުކުޅަހުގައި ފަށާ, ސާކް ގައުމުތަކުގެ ހޭނައްތާ ޑޮކްޓަރުންގެ ޖަމިއްޔާ (ސާކް-އޭއޭ)ގެ 15 ވަނަ ކޮންގްރެސްގެ އިބްތިދާއީ ވޯކްޝޮޕެއް މާދަމާ ޓްރީ ޓޮޕްގައި ބޭއްވުމަށް ނިންމައިފި އެވެ.
"އެޑްވާންސްޑް އިންޓަވެންޝަންސް އިން ކްރޮނިކް ޕެއިން މެނޭޖްމަންޓް" ނުވަތަ ދިގު މުއްދަތަކަށް ދެމިގެންދާ ތަދުތަކަށް ފަރުވާދިނުމާ ގުޅޭގޮތުން ބާއްވާ މި ވޯކްޝޮޕުގައި ބައިނަލްއަގުވާމީ ފެންވަރުގެ މާހިރުންނާއި ސިއްހީ ދާއިރާގެ ގިނަ އަދަދެއްގެ މުވައްޒަފުން ބައިވެރިވާ ކަމަށް ޓްރީ ޓޮޕް ހޮސްޕިޓަލުން ބުނެ އެވެ.
މި ވޯކްޝޮޕުގެ މައިގަނޑު މަގުސަދަކީ އެންމެ ފަހުގެ ސިއްހީ ހޯދުންތަކާއި އީޖާދުތަކުގެ މައްޗަށް ބިނާކޮށް، ސިއްހީ ހިދުމަތްތެރިންނަށް އަމަލީ ތަމްރީނުތަކެއް ފޯރުކޮށްދިނުމެވެ.
ޓްރީ ޓޮޕް ހޮސްޕިޓަލުގެ ސީއީއޯ ޑރ. ސްރިވަތުސަން ސްރީދަރް ޖީ ވިދާޅުވީ، މިފަދަ ބައިނަލްއަގުވާމީ ވޯކްޝޮޕެއް ބޭއްވުމުގެ ފުރުސަތު ލިބުމަކީ އެ ހޮސްޕިޓަލަށް ލިބުނު ވަރަށް ބޮޑު ޝަރަފެއް ކަމަށެވެ. އަދި މީގެ ސަބަބުން ސަރަހައްދީ ފެންވަރުގައި ތަޖުރިބާ ހިއްސާކުރުމަށާއި، ބަލިމީހުންނަށް ދެވޭ ހިދުމަތުގެ ފެންވަރު މަތިކުރުމަށް ބޮޑު މަގުފަހިކަމެއް ލިބިގެންދާނެ ކަމަށްވެސް އޭނާ ފާހަގަކުރެއްވިއެވެ.
މި ވޯކްޝޮޕް ހާއްސަކޮށްފައިވަނީ ޑޮކްޓަރުންނާއި، ނަރުހުންގެ އިތުރުން ސިއްހީ ދާއިރާގެ އެހެނިހެން ފަންނީ މުވައްޒަފުންނަށެވެ. ވޯކްޝޮޕުގެ މައިގަނޑު ބައިތަކުގެ ތެރޭގައި ހިމެނެނީ:
- ދިގު މުއްދަތަކަށް ތަދު ތަހައްމަލުކުރާ ބަލިމީހުންނަށް ލުއި ހޯދައިދިނުމަށް ބޭނުންކުރާ ޒަމާނީ ވަސީލަތްތަކާއި ގޮތްތައް.
- ބަލިމީހާއަށް އެންމެ ފައިދާހުރި އަދި ރައްކާތެރި ގޮތުގައި ފަރުވާ ފޯރުކޮށްދިނުމުގެ ސިސްޓަމްތައް.
- ސިއްހީ ފަރުވާ ދިނުމުގައި އެންމެ ފަހުން ތައާރަފުވެފައިވާ ޓެކްނޮލޮޖީގެ ބޭނުން ހެޔޮގޮތުގައި ހިފާނެ ގޮތްތައް.
އުކުޅަހުގައި ހޮނިހިރު ދުވަހު ފަށާ ދެ ދުވަހުގެ ކޮންފަރެންސް ބާއްވަނީ ވޯލްޑް ފެޑަރޭޝަން އޮފް ސޮސައިޓީސް އޮފް އެނެސްތީސިއޮލޮޖިސްޓްސް (ޑަބްލިއުއެފްއެސްއޭ) ގެ އެންޑޯސްމަންޓާއެކުގަ އެވެ.
މި ކޮންގްރެސްގައި ދެކުނު އޭޝިއާ އާއި ދުނިޔޭގެ އެކި ކަންކޮޅުތަކުން އެނެސްތީސިއޮލޮޖިސްޓުންނާއި، ކްރިޓިކަލް ކެއާގެ އިތުރުން ތަދަށް ފަރުވާދޭ މާހިރުން ބައިވެރިވެ އެވެ.
