ރައީސް މުހައްމަދު މުއިއްޒުގެ ކެބިނެޓަށް ބޮޑެތި ބަދަލުތަކެއް ގެނެސް، މިނިސްޓްރީތަކުގެ އަދަދު މަދުކޮށް އަލުން މިނިސްޓްރީތައް އެކުލަވާލިއިރު ހަތަރު ބޭފުޅަކަށް މި ސަރުކާރުގައި އަލަށް މިނިސްޓަރުކަން ދީފައިވެ އެވެ. ތިރީގައި މި ވަނީ އެ ބޭފުޅުންގެ ކުރު ޕްރޮފައިލްއެކެވެ.
ހީނާ ވަލީދު
އާޓްސް، ކަލްޗާ އެންޑް ހެރިޓޭޖު މިނިސްޓަރު ކަމަށް މިއަދު އައްޔަނުކުރި، ހީނާ ވަލީދަކީ ރައީސް އޮފީހުގެ އިސް ތަރުޖަމާނުގެ އިތުރުން ނޭޝަނަލް ސޯޝަލް ޕްރޮޓެކްޝަން އެޖެންސީގެ މެނޭޖިން ޑިރެކްޓަރެވެ.
ކުރީގެ ރައީސް ޔާމީންގެ ޕީޕީއެމް ސަރުކާރުގެ ދުވަސްވަރުގެ ސިޔާސީ ދާއިރާއަށް ވެދެވަޑައިގަތުމުގެ ކުރިން ހީނާއަކީ ނޫސްވެރިއެކެވެ. އޭނާ ގިނަ ދުވަސްތަކެއް ވަންދެން ޓީވީއެމް އާއި ޕީއެސްއެމްގައި މަސައްކަތްކުރެއްވި އެވެ. ޓީވީގައި މަސައްކަތް ކުރެއްވި ދުވަސްވަރު، ހެޑް އޮފް ނިއުސް އަދި އެގްޒެކެޓިވް އެޑިޓަރުގެ މަގާމު ފުރުއްވި އެވެ.
ހީނާގެ މިނިސްޓްރީގެ ދަށުން ހިންގާ ތަންތަނުގެ ތެރޭގައި ދިވެހިބަހުގެ އެކެޑަމީ އާއި ގައުމީ ދާރުލްއާސާރު ފަދަ މުހިންމު މުއައްސަސާތައް ހިމެނެ އެވެ.
ގީލާ އަލީ
ހެލްތު އެންޑް ވެލްފެއާ މިނިސްޓަރު ކަމަށް އައްޔަނުކުރި ގީލާ އަލީ ހުންނެވީ، ބެލްޖިއަމްއަށް ކަނޑައަޅާފައި ހުންނަ ސަފީރުގެ އިތުރުން ޔޫރަޕިއަން ޔޫނިއަން (އީޔޫ) އަށް ކަނޑައަޅާފައިވާ މިޝަންގެ އެންމެ އިސްވެރިޔާގެ މަގާމުގަ އެވެ.
ގީލާ ދިވެހި ސަރުކާރުގައި ހިދުމަތް ކުރައްވަން ފެއްޓެވީ، ސިއްހީ ދާއިރާގަ އެވެ. އޭނާ ވަނީ 2010 ގައި އެ މިނިސްޓްރީގެ ޕާމަނަންޓް ސެކްރެޓަރީގެ މަގާމު ފުރުއްވާފަ އެވެ. އެ މަގާމުގައި ހުންނަވާފައި ހާރިޖީ ދާއިރާއަށް ބަދަލުވެވަޑައިގަތީ 2015 ގައި އެވެ.
ގީލާ ވަނީ ލަންޑަން ސްކޫލް އޮފް ހައިޖީން އެންޑް ޓްރޮޕިކަލް މެޑިސިންއިން މާސްޓާޒް އޮފް ޕަބްލިކް ހެލްތު ހާސިލްކުރައްވާފަ އެވެ. އަދި މި ފަހުން އޭނާ ވަނީ އެވިޑް ކޮލެޖުން ޝަރީއާ އެންޑް ލޯއިން ޑިގްރީ ހާސިލްކުރައްވާފަ އެވެ.
އަލީ ޝަރީފު
ކްލައިމެޓް ޗޭންޖް، އެންވަޔަރަންމަންޓް އެންޑް އެނާޖީ މިނިސްޓަރުގެ މަގާމަށް އައްޔަނުކުރެއްވި އަލީ ޝަރީފްއަކީ މި ސަރުކާރުގެ ސްޕެޝަލް އެންވޯއި ފޯ ކްލައިމެޓް ޗޭންޖެވެ.
ރައީސްގެ ހާއްސަ މަންދޫބަށް ވެވަޑައިގަތުމުގެ ކުރިން އަލީ ޝަރީފް ވަނީ އެންވަޔަރަންމަންޓް މިނިސްޓްރީގެ ޑިރެކްޓަރެއްގެ މަގާމުގައި ގިނަ އަހަރުތަކެއް ވަންދެން މަސައްކަތް ކުރައްވާފަ އެވެ.
އަލީ ޝަރީފު ވަނީ ކްލައިމެޓް އެންވޯއީގެ ހައިސިއްޔަތުން ބްރެޒިލްގައި ބޭއްވުނު ކޮޕް30 ކޮންފަރެންސް ފަދަ ބައްދަލުވުންތަކުގައި، ރާއްޖެ ތަމްސީލުކުރައްވާފަ އެވެ. އޭނާއަކީ ކްލައިމެޓް ޗޭންޖް ސްޕެޝަލިސްޓެކެވެ.
އިރުތިޝާމް އާދަމް
ފޮރިން މިނިސްޓަރު އިރުތިޝާމް އާދަމް ހުންނެވީ އިނގިރޭސިވިލާތަށް ކަނޑައަޅާފައި ހުންނަ ސަފީރުގެ މަގާމުގަ އެވެ. އިރުތިޝާމް ގިނަ ދުވަސްތަކެއް ވަންދެން ހާރިޖީ ދާއިރާގައި މަސައްކަތް ކުރެއްވި އެވެ.
ހާރިޖީ ދާއިރާގައި މަސައްކަތް ކުރެއްވުމަށްފަހު، އިރުތިޝާމް ވަނީ ކުރީގެ ރައީސް އަބްދުﷲ ޔާމީންގެ ސަރުކާރުގައި ހެލްތު މިނިސްޓަރު ކަމާއި ޔޫތު އެންޑް ސްޕޯޓްސް މިނިސްޓަރު ކަން ކުރައްވާފަ އެވެ.
އިރުތިޝާމް ހާރިޖީ ދާއިރާގައި މަސައްކަތް ކުރެއްވި ދުވަސްވަރު ރާއްޖެއިން އދ. އަށް ކަނޑައަޅާފައި ހުންނަ ދާއިމީ މަންދޫބުގެ މަގާމު ވެސް ފުރުއްވި އެވެ.
