އިދިކޮޅު މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) އިން މިދިޔަ މަހު މާލޭގައި ކުރި މުޒާހަރާއެއްގެ ތެރެއިން ބަންދުކޮށްފައި ހުރި ސަރަހައްދަކަށް ވަން މައްސަލައިގައި ހައްޔަރުކުރި އެ ޕާޓީގެ އެކްޓިވިސްޓު މުހައްމަދު ޝާމިން މިއަދު ދޫކޮށްލައިފި އެވެ.
މި މަހުގެ 8 ވަނަ ދުވަހު ޝާމިން ހައްޔަރުކުރީ، މިދިޔަ މަހުގެ 28 ގައި، އެމްޑީޕީން ކުރި މުޒާހަރާގައި ޗާންދަނީ މަގާއި ދީދީ ގޯޅިއާ ގުޅޭ ކަންމަތީގައި މަގު ބަންދުކުރުމަށް ފުލުހުން ޖަހާފައި ހުރި ބެރިކޭޑު ހުރަސްކުރި ކަމަށް ތުހުމަތުކޮށެވެ.
އެ މައްސަލައިގައި ޝާމިންގެ މައްޗަށް ކުރަނީ ތިން ތުހުމަތެކެވެ. އެއީ މުދަލަށް ގެއްލުންދިނުގެ ތުހުމަތާއި ފުލުހުންގެ ވާޖިބަށް ހުރަސްއެޅުމުގެ ތުހުމަތުގެ އިތުރުން އަމުރަށް ނުކިޔަމަންތެރިވުމުގެ ތުހުމަތެވެ.
ޝާމިން ހައްޔަރުކޮށްގެން ގެންގޮސް ކްރިމިނަލް ކޯޓަށް ހާޒިރުކުރުމުން ބަންދުކރުީ 10 ދުވަހުގެ މުއްދަތަކަށެވެ. އެ ފަހަރު އޭނާ ބަންދުކުރީ، ފުލުހުންގެ ވާޖިބަށް ހުރަސްއެޅުމަކީ ބޮޑު ކުށަކަށްވާތީ، މުޖުތަމައުގެ ސަލާމަތަށް ނުރައްކަލެއް ކުރިމަތިވެދާނެ ކަމަށް ކޯޓުން ނިންމާފަ އެވެ.
ފުރަތަމަ ބަންދު އަމުރުގައި މިހެން އޮތް ނަމަވެސް، ޝާމިން ދޫކޮށްލަން ނެރުނު އަމުރުގައި ވަނީ އޭނާގެ މައްޗަށް ތުހުަމަތުކުރެވެނީ ޖިނާއީ ބޮޑު ކުށަކަށް ނޫން ކަމަށެވެ. އަދި، އޭނާ ކުރި ކަމެއްގެ ސަބަބުން މުަދަލަކަށް ލިބުނު ގެއްލުމެއް ނޫނީ ފުލުހަކަށް ލިބުނު އަނިޔާއެއް ނުވާ ކަމަށް ވެސް ގާޒީ ފާހަގަކުރެއްވި އެވެ.
"މީނާގެ މައްޗަށް ކުރެވިފައި ވަނީ ޖިނާއީ ބޮޑު ތުހުމަތަކަށް ނުވުމާއި މީނާގެ ތުހުމަތުގައި ތަހުގީގުގައި މި ވަގުތު ނުނިމިވަނީ ހަމައެކަނި ސީސީޓީވީ ފުޓޭޖު އެނަލައިސް ކުރުން ކަމަށް ފުލުހުން ބުނެފައި ވާތީ އާއި މި މައްސަލައިގައި މީނާގެ އަމަލަކުން މުދަލަކަށް، ފުލުހަކަށް ޖިސްމާނީ އަނިޔާއެއް ވެފައި ނުވާ ކަން ހުށަހެޅިފައިވާ ކަންކަމުން ސާފު ވާން އޮންނާތީ" ބަންދުން ދޫކޮށްލާ ސަބަބު ކަމަށް އަމުރުގައި ބަޔާންކޮށްފައި އޮތެވެ.
ޝާމިން ދޫކޮށްލީ ފުރަތަމަ މުއްދަތު ހަމަވީ ފަހުން، ދެ ވަނަ ފަހަރަށް ބަންދުގެ މުއްދަތު ޖަހާފައި ވަނިކޮށެވެ.
މީގެ ކުރިން މެއި މަހުގެ ތެރޭގައި ވެސް ފުލުހުން އޭނާ ހައްޔަރުކޮށް ބަންދުގައި ބެހެއްޓި އެވެ. އެފަހަރު އޭނާ ހައްޔަރުުކުރީ ނޫސްވެރިންގެ ހައްގުގައި މާލޭގައި ކުރި މުޒާހަރާތަކުގެ ތެރެއިންނެވެ. އެ މައްސަލަ ވެސް ފުލުހުން ދަނީ ތަހުގީގު ކުރަމުންނެވެ.
