ޑިސެމްބަރު 2025، ގައި ރައީސް މުހައްމަދު މުއިއްޒުގެ ގަރާރަކުން ފަޅުރަށެއްގެ ގޮތުގައި ކަނޑައެޅި ހދ. ހިރިމަރަދޫގައި ވަޒީފާ އަދާކުރަން ޖެހޭ ގޮތަށް ދެ ޕޮލިޓިކަލް ޑިރެކްޓަރުންނަށް ވަޒީފާ ދީފި އެވެ.
އަދަދުއަށް ލިބިފައިވާ ލިޔެކިޔުމުން އެނގޭ ގޮތުގައި ހިރިމަރަދޫގެ އައިޝަތު ޖުވައިރިޔާ އަދި ޖުވައިރިޔާ އުސްމާނަށް ވަނީ 20،000ރ. ގެ މުސާރަ ލިބޭ ޕޮލިޓިކަލް ޑިރެކްޓަރެއްގެ މަގާމު ދީފަ އެވެ. އޭގެ ތެރެއިން ޖުވައިރިޔާ އުސްމާނަށް މަގާމު ދިނީ އޮގަސަްޓު 27، ގައި ކަމަށްވާއިރު އައިޝަތު ޖުވައިރިޔާއަށް މަގާމު ދިނީ ސެޕްޓެމެްބަރު 6، ގަ އެވެ.
އެ ދެ މީހުން ވެސް އައްޔަނުކުރީ ޔޫތު މިނިސްޓްރީއަށެވެ. ނަމަވެސް، ވަޒީފާ އަދާކުރަން ޖެހޭ ތަނެއް ކަމަށް ވަޒީފާ ދިންކަމުގެ ލިޔުމުގައި އޮތީ ހިރިމަރަދޫ އެވެ.
އެ ރަށުގެ އެހެން މީހަކަށް ވެސް މިފަދަ މަގާމެއް ދިންކަން ވަނީ އެނގިފަ އެވެ. ނަމަވެސް އޭނާގެ މައުލޫމާތެއް މިހާތަނަށް ކަށަވަރު ކުރެވިފައެއް ނުވެ އެވެ. މައުލޫމާތު ލިބޭ ގޮތުގައި މި ތިން މީހުންނަކީ ވެސް ވެރިކަން ކުރާ ޕީޕަލްސް ނެޝަނަލް ކޮންގްރެސް (ޕީއެންސީ) ގެ ހަރަކާތްތެރިންނެވެ.
ރާއްޖޭގެ މީހުން ދިރިއުޅޭ ކޮންމެ ރަށެއްގައި ކައުންސިލެއް އޮންނައިރު މި އަހަރު ބޭއްވި ކައުންސިލް އިންތިހާބުގައި ހިރިމަރަދޫއަށް ކައުންސިލެއް އިންތިހާބެއް ނުކުރެ އެވެ. އެއީ މުއިއްޒުގެ ގަރާރަކުން އެ ރަށުގެ ކައުންސިލް އުވާލުމުންނެވެ. ހިރިމަރަދޫ ކައުންސިލް އުވާލުމުން، އެ ރަށުގެ ރައްޔިތުން ވޯޓުލާން ޖެހުނީ ހަނިމާދޫ ކައުންސިލަށް މީހުން އިންތިހާބު ކުރުމަށެވެ.
ހިރިމަރަދޫ ކައުންސިލް އުވާލާފައިވާތީ އެ ރަށުގެ އަސާސީ އަދި ރަށްވެހި ހިދުމަތްތައް ދިނުމަށް ހަރަދު ކުރަން ޖެހެނީ ހަނިމާދޫ ކައުންސިލުންނެވެ. ސަރުކާރުން ނިންމީ ހިރިމަރަދޫ މީހުން ހަނިމާދޫއަށް ބަދަލުކުރުމަށެވެ. ބޯހިމެނުން 2022 އިން ދައްކާ ގޮތުގައި ހިރިމަރަދޫގައި ދިރިއުޅެނީ 260 މީހުންނެވެ.
ދ. މީދޫ ރައްޔިތުން ދަތުރުދާނެ ރަށެއްގެ ގޮތުގައި ކަނޑައެޅި އެ އަތޮޅު އުއްދޫ ބެލެހެއްޓުމަށް ޑެޕިއުޓީ މިނިސްޓަރެއް ވެސް މި ސަރުކާރުން އައްޔަނުކުރި އެވެ.
