ޔޫރަޕިއަން ޖާނަލް އޮފް ޕްރިވެންޓިވް ކާޑިއޮލޮޖީގައި ޝާއިއުކުރި ދިރާސާއަކުން ދައްކާ ގޮތުގައި، ނިދުމާއި ކަސްރަތު ކުރުމުގެ އިތުރުން ކެއިންބުއިމުގެ އާދަތަކަށް ގެންނަ ކުދިކުދި ބަދަލުތަކުން ވެސް ހިތުގެ ދުޅަހެޔޮކަމަށް ބޮޑެތި ފައިދާތަކެއް ކުރެ އެވެ.
މި ދިރާސާއާ ގުޅޭގޮތުން މީޑިއާތަކުން ރިޕޯޓްކޮށްފައިވަނީ، ނިދާ ވަގުތަށް އިތުރުކުރާ 11 މިނެޓުގެ ސަބަބުން ހިތުގެ ބަލިތަކާއި ސްޓްރޯކް ޖެހުމުގެ ފުރުސަތު 10 އިންސައްތަ ދަށްކޮށްދޭ ކަމަށެވެ. ނަމަވެސް، މިއީ ކަން އޮތްގޮތް އޮޅޭ ފަދަ ސުރުހީއެކެވެ.
މި ދިރާސާގައި މައިގަނޑު ގޮތެއްގައި ބަލާފައިވަނީ އިތުރަށް ނިދުމާއި، ގަވާއިދުން ކަސްރަތު ކުރުމާއި އަދި ސިއްހަތަށް ފައިދާހުރި ކެއުންބުއިމުގެ އާދަތައް އެއްކޮށްލުމުން ކުރާ އަސަރުތަކަށެވެ.
ހަމައެކަނި ނިދުމުގެ ސަބަބުން ހިތުގެ ބަލިތަކުގެ ނުރައްކާ 10 އިންސައްތަ ދަށްކުރަން ބޭނުންނަމަ، ކޮންމެ ރެއަކުވެސް އިތުރު ބައިގަޑިއިރު ނިދަން ޖެހޭނެ ކަމަށް މި ދިރާސާއިން ދައްކަ އެވެ. މީގެއިތުރުން، އެ ބުނާ 10 އިންސައްތައަކީ އަމިއްލަ ފަރުދެއްގެ ހިތުގެ ބަލި ޖެހުމުގެ ފުރުސަތު 10 އިންސައްތަ ދަށްވުމެއް ނޫނެވެ.
އަށް އަހަރުގެ މުއްދަތަށް ކުރިއަށްގެންދިޔަ މި ދިރާސާގައި 53،000 މީހުން ބައިވެރިވިއިރު، އެ މުއްދަތުގެ ތެރޭގައި ހިތާއި ލޭހޮޅިތަކާ ގުޅުންހުރި 2،000 އަށްވުރެ ގިނަ މައްސަލަ ރިޕޯޓްކޮށްފައިވެ އެވެ. މިއީ ދިރާސާގައި ބައިވެރިވި މީހުންގެ 3.8 އިންސައްތަ އެވެ.
މި ހުރިހާ އެންމެންނަކީ ވެސް އިތުރަށް ނިދައިގެން 10 އިންސައްތައިގެ ކުރިއެރުމެއް ހޯދި ބައެއް ނަމަ، މި އަދަދު ދިރާސާގެ ބައިވެރިންގެ 3.4 އިންސައްތައަށް ދަށްވީހެވެ.
ކަން މިހެން އޮތް ނަމަވެސް، މި ދިރާސާގެ މައިގަނޑު މެސެޖަކީ ރަނގަޅު މެސެޖެކެވެ. އެއީ ހިތުގެ ދުޅަހެޔޮކަމަށްޓަކައި ރޭގަނޑު ހަމަނިދި ހޯދުމަކީ ނުހަނު މުހިންމު ކަމެއް ކަމެވެ. މީގެ އެއް ސަބަބަކީ ރޭގަނޑު ނިދާފައި އޮންނައިރު ހަށިގަނޑުގެ ކޯޓިސޯލް ލެވެލް ދަށްވުމުގެ ސަބަބުން، އާންމު އުސޫލުން ލޭގެ ޕްރެޝަރު ދަށްވުމެވެ.
ހަމަނިދި ނުލިބޭނަމަ ލޭގެ ޕްރެޝަރު އެންމެ އެކަށީގެންވާ މިންވަރަށް ދަށްވުމަށް ހުރަސްއެޅެ އެވެ. މީގެ ސަބަބުން ލޭހޮޅިތަކަށް ބާރުބޮޑުވެ، ލޭހޮޅިތައް ހަރުވުމަށް (އެތެރޯސްކްލެރޯސިސް) މެދުވެރިވެ އެވެ.
ހަށިގަނޑު ހޭލަން ތައްޔާރުވުމުގެ ކުރިން ހޭލަން ޖެހުމަކީ، ހަށިގަނޑުގެ ނާރުތަކުގެ ނިޒާމަށް ސްޓްރެސް ހޯމޯންތައް ކުއްލިއަކަށް ދޫކޮށްލާ ކަމެކެވެ.
ނިދިން ހޭލާއިރު އެލާމް "ސްނޫޒް" ކޮށްލުމަކީ ވަގުތުން ފުރާނަ ސަލާމަތްކޮށްދޭނެ ކަމަކަށް ނުވި ނަމަވެސް، ދިގު މުއްދަތަކަށް ބަލާއިރު މިއީ އުމުރު ދިގުކޮށްދިނުމަށް އެހީތެރިވެދޭ ކަމަކަށްވުން އެކަށީގެންވެ އެވެ.
މައުލޫމާތު: ބީބީސީ ސައިންސް ފޯކަސް
