އިންސާނުންގެ ސިކުނޑީގެ ދުޅަހެޔޮކަން ދެމެހެއްޓިދާނެ ގޮތްތަކާ ގުޅޭގޮތުން ކުރި އާ ދިރާސާއަކުން ދައްކާގޮތުގައި، އުމުރުން ދުވަސްވީ ނަމަވެސް އާ ކަންތައްތައް ދަސްކޮށް ސިކުނޑީގެ ގާބިލުކަން އިތުރުކުރެވިދާނެ އެވެ.
ގާތްގަނޑަކަށް 4،000 މީހުން ބައިވެރިކޮށްގެން ތިން އަހަރު ދުވަހުގެ މުއްދަތަށް ކުރިއަށްގެންދިޔަ މި ދިރާސާއިން އެނގުނު ގޮތުގައި، ސިކުނޑީގެ މަސައްކަތްތައް ރަނގަޅު ކުރުމަށް ވަކި ލިމިޓެއް ނެތެވެ. އަދި އުމުރުން ދުވަސްވުމަކީ ސިކުނޑީގެ ބާރު ކޮންމެހެން ދެރަވާންޖެހޭ ސަބަބެއް ނޫންކަން ވެސް މި ދިރާސާއިން ވަނީ ހާމަވެފަ އެވެ.
ޔުނިވަސިޓީ އޮފް ޓެކްސަސް އެޓް ޑާލަސްގެ ސެންޓަ ފޯ ބްރެއިން ހެލްތުގެ ދިރާސާވެރިން ވަނީ އުމުރުން 19 އަހަރާއި 94 އަހަރާ ދެމެދުގެ މީހުންގެ ސިކުނޑިއަށް އަންނަ ބަދަލުތައް ދިރާސާކޮށްފަ އެވެ. މި ދިރާސާއިން ހާމަވި ގޮތުގައި، ކޮންމެ ދުވަހަކު ކުރު ވީޑިއޯތައް ބެލުމާއި އަމިއްލަ ނަފްސާ މެދު ފުންކޮށް ވިސްނުން ފަދަ ވަކި އަމާޒެއް އޮތް ކަންތައްތަކެއް މެދުނުކެނޑި ކުރުމުން، ސިކުނޑީގެ މަސައްކަތްތައް ފާހަގަކުރެވޭ މިންވަރަށް ރަނގަޅު ކުރެވިދާނެ އެވެ.
"ސައިންޓިފިކް ރިޕޯޓްސް" ޖާނަލްގައި ޝާއިއުކޮށްފައިވާ މި ދިރާސާގައި ސިކުނޑީގެ ދުޅަހެޔޮކަން ވަޒަންކުރުމަށް ބޭނުންކޮށްފައިވަނީ "ބްރެއިން ހެލްތު އިންޑެކްސް" އެވެ. މިއީ މައިގަނޑު ތިން ދާއިރާއަކަށް ބަލައިގެން ސިކުނޑީގެ ދުޅަހެޔޮކަން މިންކުރާ މިންގަނޑެކެވެ. އެއީ ސިކުނޑީގެ ދުޅަހެޔޮކަން (ހަނދާން ހުރުމާއި އުނދަގޫ ހާލަތްތަކުގައި ވިސްނުންތެރިކަމާއެކު ކަންކަން ނިންމުމުގެ ގާބިލުކަން)، މީހުންނާއި މަގްސަދުތަކާ އޮންނަ ގުޅުން، އަދި ނަފްސާނީ ހަމަޖެހުމެވެ.
މި ދިރާސާއިން ދެއްކި ގޮތުގައި، ސިކުނޑިއަށް ފައިދާހުރި އާދަތައް އަށަގަންނުވައިފި ނަމަ، ހުރިހާ އުމުރެއްގެ މީހުންނަށް ވެސް އޭގެ ފައިދާ ކުރެ އެވެ. އެގޮތުން ޒުވާނުންގެ ސިކުނޑިއަށް އަންނަ ކުރިއެރުންތަކާއި އުމުރުން ދުވަސްވީ މީހުންގެ ސިކުނޑިއަށް އަންނަ ކުރިއެރުންތައް އެއްވަރެއްގައި ހުރިކަން ފާހަގަކުރެވުނެވެ.
ދިރާސާ ފެށިއިރު ސިކުނޑީގެ ދުޅަހެޔޮކަން އެންމެ ދަށްކޮށް ހުރި މީހުންގެ ފަރާތުން އެންމެ ބޮޑު ކުރިއެރުމެއް ފެނިފައިވެ އެވެ. މިއީ ސިކުނޑީގެ ދުޅަހެޔޮކަން އިތުރުކުރުމުގެ މަސައްކަތް ފެށުމަށް ދުވަހަކުވެސް ލަސްނުވާނެކަމުގެ ހެއްކެކެވެ.
ކޮންމެ ދުވަހަކު ކުރު ތަމްރީނުތަކެއް ގަވާއިދުން ހެދުމަކީ ސިކުނޑީގެ ދުޅަހެޔޮކަން އިތުރުވުމާ ސީދާ ގުޅުމެއް އޮތް ކަމެކެވެ. އަދި މި ތަމްރީނުތަކުގައި އެންމެ ގިނައިން ބައިވެރިވި މީހުންނަށް އެންމެ މަތީ ނަތީޖާ ލިބިފައިވާކަން ވެސް ފާހަގަކުރެވުނެވެ.
ސެންޓަ ފޯ ބްރެއިން ހެލްތުގެ ޗީފް ޑައިރެކްޓަރު ޕްރޮފެސަރު ސަންޑްރާ ބޮންޑް ޗެޕްމަން ވިދާޅުވި ގޮތުގައި، އިންސާނުން މިހާރު ވަނީ ދިރިއުޅޭ އުމުރު ދިގުކޮށްފަ އެވެ. އަދި މިހާރު މިވަނީ ސިކުނޑީގެ ގާބިލުކަން ކުރިއަރާ މުއްދަތު ވެސް އިތުރުކޮށްފަ އެވެ. މީގެ ސަބަބުން އާންމުކޮށް އުމުރުން 30 ގެ އަހަރުތަކުގައި ސިކުނޑީގެ ބާރު ދަށްވާން ފަށާ ފެށުމަށް ބަދަލު ގެނެވޭނެ އެވެ.
މި ދިރާސާގައި ސިކުނޑީގެ ދުޅަހެޔޮކަމަށް ގަވާއިދުން ބޭނުންކުރި 5 މިނެޓާއި 10 މިނެޓާ ދެމެދުގެ ތަމްރީނުތަކުގައި ހިމެނެނީ ކުރު ވީޑިއޯތަކާއި، މައުލޫމާތު މިންކުރާ ކުއިޒްތަކާއި، އަމިއްލަ ހަރަކާތްތަކުގެ އިތުރުން ކޮންމެ މަހަކު ވަކި މައުޟޫއަކަށް ބަހާލެވިފައިވާ ފިލާވަޅުތަކެކެވެ.
މީގެ އިތުރުން، އެއްފަހަރާ ގިނަ މަސައްކަތްތަކެއް (މަލްޓިޓާސްކިންގް) ކުރުމުގެ ބަދަލުގައި، އެއްވަގުތެއްގައި އެއް މަސައްކަތަށް ސަމާލުކަން ދިނުން ފަދަ އާދަތައް ދިރިއުޅުމުގައި ހިމެނުމަށް ބައިވެރިންގެ ކިބައިން އެދުނެވެ. އަދި ސިކުނޑީގެ ދުޅަހެޔޮކަމަށް ހާއްސަ ކޯޗުންގެ އެހީތެރިކަން ހޯދުމުގެ ފުރުސަތު ވެސް ބައިވެރިންނަށް ދެވުނެވެ.
މި ދިރާސާއިން ވަނީ 'ރީބައުންޑް އިފެކްޓް' ނުވަތަ އަލުން އިއާދަވުމުގެ ބާރު ވެސް ފާހަގަކޮށްފަ އެވެ. އެގޮތުން ވަޒީފާ ގެއްލުން ނުވަތަ ގާތް މީހަކު މަރުވުން ފަދަ ހިތާމަވެރި އަދި ދަތި ހާލަތްތަކުގައި ވެސް، ހާއްސަ އުސޫލުތަކެއް ބޭނުންކޮށްގެން ސިކުނޑީގެ ދުޅަހެޔޮކަން އަނބުރާ ހޯދައި، އެ ދަމަހައްޓައި، އިތުރުކުރެވިދާނެކަން ވަނީ ސާބިތުވެފަ އެވެ.
މައުލޫމާތު: ބީބީސީ ސައިންސް ފޯކަސް
