މެލޭޝިއާގެ ސިޔާސީ މަޝްރަހަށް ނުފޫޒު ފޯރުވަން މަސައްކަތް ކުރި ކަމަށް ބުނެ ކުރާ ތުހުމަތުތައް، އެ ގައުމުގައި ހުންނަ އެމެރިކާގެ އެމްބަސީން ދޮގުކޮށްފި އެވެ.
އެމްބަސީގެ ފޭސްބުކް ޕޭޖުގައި އާންމުކުރި ބަޔާނެއްގައި، އެމްބަސީ ހިންގެވުމާ ހަވާލުވެ ހުންނެވި ޑޭވިޑް އެޗް ގޭމްބްލް ޖޫނިއާ ވިދާޅުވީ، މެލޭޝިއާގެ ސިޔާސީ ލީޑަޝިޕް ކަނޑައެޅުމަށް އެމެރިކާއިން ދުވަހަކުވެސް މަސައްކަތް ކޮށްފައި ނުވާނެ ކަމަށެވެ.
އަދި އެ ނޫން ގޮތަކަށް ދެކެވޭ ކޮންމެ ވާހަކައަކީ ދޮގެއް ކަމަށް ވެސް އޭނާ ވިދާޅުވި އެވެ.
އެމެރިކާ އެމްބަސީން މިފަދަ ބަޔާނެއް ނެރެފައި މިވަނީ، 2014 ވަނަ އަހަރު މެލޭޝިއާގެ ސަރުކާރު ވައްޓާލުމަށް އެހީތެރިވެދޭނެ ކަމަށް އެމެރިކާއިން ހުށަހެޅި ކަމަށް، ޕާޓީ އިސްލާމް ސެ-މެލޭޝިއާ (ޕާސް) ގެ ރައީސް އަބްދުލް ހާދީ އަވާން ވިދާޅުވުމާ ގުޅިގެންނެވެ.
މެލޭޝިއާގެ މީޑިއާތަކުން ރިޕޯޓްކޮށްފައިވާ ގޮތުގައި، މިދިޔަ ހޮނިހިރު ދުވަހު ބޭއްވި އެ ޕާޓީގެ އަހަރީ ކޮންގްރެސްގައި ހާދީ ވިދާޅުވީ، އެ ހުށަހެޅުން ލިބުނީ އެމެރިކާގެ ކުރީގެ ރައީސް ބަރަކް އޮބާމާ އެ އަހަރު މެލޭޝިއާއަށް ކުރެއްވި ދަތުރުފުޅާ ދިމާކޮށް ކަމަށެވެ.
ހާދީ ވިދާޅުވި ގޮތުގައި، ޕާސް އަކީ އޭރުގެ އިދިކޮޅު ކޯލިޝަން ކަމަށްވާ "ޕަކަޓާން ރަކްޔަތު" ގެ ބައިވެރިއެއްގެ ގޮތުގައި އޮތް އިރު، ކުއާލަލަމްޕޫރުގައި ހުންނަ އެމެރިކާ އެމްބަސީގައި ބޭއްވި ބައްދަލުވުމަކަށް އެ ޕާޓީގެ ބައެއް އިސް ބޭފުޅުންނަށް ދައުވަތު ދިނެވެ.
އެ ބައްދަލުވުމުގައި ޕާސްގެ އެސިސްޓަންޓް ސެކްރެޓަރީ ޖެނެރަލް ތަކިޔުއްދީން ހަސަން އާއި، އޭރު ހާދީގެ ސިޔާސީ ސެކްރެޓަރީގެ މަގާމުގައި ހުންނެވި އަހުމަދު ސަމްސޫރީ މުޚްތާރު ބައިވެރިވެވަޑައިގެންނެވި ކަމަށް އޭނާ ވިދާޅުވި އެވެ.
"ދަ މެލޭ މެއިލް" ނޫހުން ރިޕޯޓްކޮށްފައިވާ ގޮތުގައި، އެ ބައްދަލުވުމުގައި އެމެރިކާ އެމްބަސީގެ މަންދޫބުން ވަނީ އޭރުގެ ސަރުކާރު ވައްޓާލައި، ވެރިކަމާ ހަވާލުވުމަށް ޕާސް އަށް އެހީތެރިވެދިނުމުގެ ފުރުސަތު އޮތް ކަމަށް ބުނެފަ އެވެ.
ނަމަވެސް، ބޭރުގެ އެއްވެސް ގައުމަކުން އެފަދަ ގޮތަކަށް ކަންކަމުގެ ތެރެއަށް ވަނުމަށް އެ ޕާޓީގެ ލީޑަރުން އިންކާރު ކުރެއްވި ކަމަށް ހާދީ ވިދާޅުވި އެވެ.
ހާދީ އިތުރަށް ވިދާޅުވީ، އޭރު މެލޭޝިއާގައި ހުންނެވި އެމެރިކާގެ ސަފީރު ވަކިން އޭނާއާ ބައްދަލުކުރައްވައި، ޕާސް އިން ވެރިކަމާ ހަވާލުވެއްޖެ ނަމަ ބޮޑުވަޒީރުގެ މަގާމަށް ހުށަހަޅާނީ ކާކުގެ ނަންތޯ ސުވާލު ކުރެއްވި ކަމަށެވެ.
"ދަ ސްޓާ" ނޫހުގައިވާ ގޮތުން، އެ ސުވާލުގެ ޖަވާބުގައި "އެމެރިކާއިން އެއްބަސްވަނީ ކާކާ ހެއްޔެވެ؟" މިފަދައިން ސަފީރާ ސުވާލު ކުރެއްވި ކަމަށް ހާދީ ވިދާޅުވި އެވެ.
ހާދީ ވިދާޅުވި ގޮތުގައި އޭނާ ދެއްވި އެ ޖަވާބަށް މަހާތީރު މުހައްމަދު ވަނީ ތާއީދު ކުރައްވައި ތައުރީފު ކުރައްވާފަ އެވެ.
