ގައުމީ ފުޓްބޯޅަ ޓީމުގެ އެސިސްޓަންޓް ކޯޗަކަށް ސޮބާހު މުހައްމަދު (ސޮބާ) ހަމަޖައްސާފައިވާ ކަމަށް ގައުމީ ފުޓްބޯޅަ ޓީމުގެ ހެޑް ކޯޗު އަދި އެފްއޭއެމްގެ ޓެކްނިކަލް ޑިރެކްޓަރު، ހަންގޭރީގެ އިސްތަވާން އުރުބާނީ ބުނެފި އެވެ.
ކުރިއަށް އޮތް ފީފާ ބްރޭކުގައި ރާއްޖޭގެ ގައުމީ ފުޓްބޯޅަ ޓީމުން ކުޅޭ ތިން މެޗަށް ނެގި ސްކޮޑުގެ ފަރިތަކުރުންތައް މިރޭ ގަލޮޅު ދަނޑުގައި ވަނީ ފަށައިފަ އެވެ.
ގައުމީ ޓީމުގެ ފަރިތަކުރުންތައް ފެށުމުގެ ކުރިން، ގަލޮޅު ދަނޑުގެ ވީއައިޕީ ރޫމުގައި މިރޭ ބޭއްވި ނޫސްވެރިންގެ ބައްދަލުވުމުގައި އުރުބާނީ ބުނެފައިވަނީ، ސޮބާ، ގައުމީ ޓީމުގެ ޓެކްނިކަލް އެސިސްޓަންޓް ކޯޗަކަށް ހަމަޖައްސަން ނިންމީ ގިނަ ގޮތްގޮތުން ވިސްނުމަށް ފަހު ކަމަށެވެ.
ކުރިއަށް އޮތް ފީފާ ބްރޭކުގައި ރާއްޖޭން ކުޅޭ މެޗުތަކަށް މާދަމާ ފުރާނެ އެވެ. އެހެންކަމުން، ރާއްޖޭގައި ގައުމީ ޓީމުގެ ޕްރެކްޓިސް އޮތީ މިރޭ އެކަންޏެވެ.
މި މަހުގެ 24 ވަނަ ދުވަހު، ގައުމީ ޓީމުން ޗައިނާގެ ޗޮންގްޖިންގައި ކުޅޭނީ ޗައިނާ ގައުމީ ޓީމާ އެވެ. އެ މެޗަށް ފަހު، ގައުމީ ޓީމުން ދެން ދަތުރުކުރާނީ ކިރްގިސްތާންގެ ވެރި ރަށް ބިޝްކެކް އަށެވެ. އަދި، ބިޝްކެކްގައި މި މަހު 28 ވަނަ. ދުވަހު ކިރްގިސްތާނާ މެޗެއް ކުުޅުމަށް ފަހު، އަންނަ މަހުގެ އެއް ވަނަ ދުވަހު ލެބަނަންއާ ދެކޮޅަށް ކުޅޭނެ އެވެ.
ރާއްޖޭން 2008 ވަނަ އަހަރު ސާފް ޗެމްޕިއަންޝިޕްގެ ޗެމްޕިއަންކަން ހޯދި ޓީމުގައި ކުޅުނު ސޮބާ ވަނީ އުރުބާނީގެ ކޯޗުކަމުގައި ގައުމީ ޓީމަށް ކުޅެފަ އެވެ. އަދި، އެންމެ ފަހުން، ސޮބާ، މަސައްކަތް ކޮށްފައިވަނީ، ގައުމީ އަންހެން ފުޓްބޯޅަ ޓީމުގެ ހެޑް ކޯޗަކަށެވެ. އެއީ، ސާފް ވިމެންސް ޗެމްޕިއަންޝިޕްގަ އެވެ. އޭގެ ކުރިން، ސޮބާ ވަނީ 17 އަހަރުން ދަށުގެ ގައުމީ ޓީމުގެ ހެޑް ކޯޗުކަން ވެސް ކޮށްފަ އެވެ.
އުރުބާނީ ބުނީ، ސޮބާ، އެސިސްޓަންޓް ކޯޗަކަށް ހަމަޖެއްސުމަކީ ގައުމީ ޓީމުގައި ބޭނުންވާ ގޮތަށް މަސައްކަތް ކުރުމަށް ލިބިގެންދިޔަ ފަސޭހައެއް ކަމަށެވެ.
ތިން ވަނަ ފަހަރަށް ރާއްޖޭގެ ކޯޗަކަށް، މި އަހަރުގެ ކުރީކޮޅުގައި އައި އުރުބާނީ ބުނީ، މާޒީގައި ގައުމީ ޓީމާ އެކު އޭނާ ކޮށްފައިވާ ރަނގަޅު މަސައްކަތްތަކުގެ ވާހަކަ ތަކުރާރުކޮށް ދެއްކުމަކީ ކުރަން ބޭނުންވާ ކަމެއް ނޫން ކަމަށާއި މިހާރު ވިސްނަންވީ ކުރިއަށް އޮތް މުސްތަގުބަލަށް ރާއްޖޭގެ ފުޓްބޯޅައިގެ ޖީލެއް ބިނާކޮށް ރަނގަޅު ގައުމީ ޓީމެއް ބިނާކުރުމަށް ކަމަށެވެ. އެ ގޮތުން، ސޮބާ، ގައުމީ ޓީމުގެ ކޯޗިން ސްޓާފެއްގެ ގޮތުގައި ގެނައުމަކީ، އުރުބާނީ ކުރިން ރާއްޖޭގައ ކޮށްފައި ހުރި މަަސައްކަތްތަކުގެ ތަޖުރިބާ ހުރި ފަރާތެއް އެކަން މިހާރު ތިބި ކުޅުންތެރިންނަށް ހިއްސާކޮށްދީ ރަނގަޅަށް ޓީމުގެ ކަންކަން ކުރިއަށް ގެންދަން ލިބުނު ފަސޭހައެއް ކަމަށް ވެސް އުރްބާނީ ވަނީ ބުނެފަ އެވެ.
ތޭވީސް އަހަރުން ދަށުގެ ގައުމީ ޓީމުގެ އެސިސްޓަންޓް ކޯޗަކަށް ވެސް މީގެ ކުރިން މަސައްކަތް ކުރި ސޮބާ ވަނީ ކޯޗިން ކެރިއަރުގައި، ނިއު ރޭޑިއަންޓް ސްޕޯޓްސް ކްލަބާއި ކްލަބް ވެލެންސިއާ އަދި ވިކްޓަރީ ސްޕޯޓްސް ކްލަބަށް ވެސް ކޯޗުކޮށްދީފަ އެވެ. އަދި، ކްލަބް ގްރީން ސްޓްރީޓްސްގެ ކޯޗަކަށް ހުރުމުގެ އިތުރުން، ދެ ވަނަ ޑިވިޝަނާއި ތިން ވަނަ ޑިވިޝަނުގެ ޓީމުތަކުގައި ވެސް ކޯޗިން މަސައްކަތްކޮށްފައިވެ އެވެ.
