އެމެރިކާ އާއި އީރާނާ ދެމެދު ހިނގަމުންދާ ހަނގުރާމައަށް ހަތް މަސް ފުރެން ކައިރިވެފައި ވަނިކޮށް، އަންނަ ހަފުތާގައި ނިއުޔޯކްގައި ބާއްވާ އދ. ގެ އާންމު މަޖިލީހުގައި ބައިވެރިވުމަށް އީރާނުގެ އޮފިޝަލުންނަށް އެމެރިކާ ސަރުކާރުން ވިސާ ދީފި އެވެ.
އދ. ގެ އާންމު މަޖިލީހަށް ދިއުމުގެ ހުއްދަ ދީފައިވާ އީރާނުގެ ވަފުދުގެ އެންމެ އިސް ބޭފުޅުންގެ ތެރޭގައި އެ ގައުމުގެ ރައީސް މަސްއޫދު ޕެޒެޝްކިއަން އާއި ޚާރިޖީ ވަޒީރު އައްބާސް އަރަގްޗީ ހިމެނިވަޑައިގަންނަވަ އެވެ.
އެމެރިކާގެ ސްޓޭޓް ޑިޕާޓްމަންޓުގެ ތަރުޖަމާނަކު ބުރާސްފަތި ދުވަހު މި ނިންމުން ކަށަވަރުކޮށްދެއްވަމުން ވިދާޅުވީ، އީރާނުގެ ވަފުދުގެ ދަތުރުފަތުރު ކުރުމުގައި ހަރުކަށި ހުރަސްތަކެއް ކުރިމަތިކުރާނެ ކަމަށާއި، އެމެރިކާގެ ބައެއް އުފެއްދުންތައް ގަތުން އެ ބޭފުޅުންނަށް މަނާވާނެ ކަމަށެވެ.
އެމެރިކާ އިން މި ފިޔަވަޅު އަޅާފައި މިވަނީ، މިދިޔަ ފެބްރުއަރީ މަހު ފެށުނު ހަނގުރާމަ ހުއްޓުމަކަށް އަންނާނެ ކަމުގެ އެއްވެސް ނިޝާނެއް ނުފެނި، ދުނިޔޭގެ ހަކަތައިގެ އަގުތައް އުފުލި، އަވަށްޓެރި ގައުމުތަކަށް ވެސް މި ހަނގުރާމައިގެ އަސަރު ފެތުރެމުންދާ ދަނޑިވަޅެއްގައެވެ.
"އދ. ގެ މައި އިދާރާ ހުންނަ ގައުމުގެ ހައިސިއްޔަތުން އަދާކުރަންޖެހޭ ޒިންމާތަކާ އެއްގޮތްވާ ގޮތުގެ މަތިން، އީރާނުގެ ސަރުކާރުގެ އިސް ވަފުދަށް އދ. ގެ އާންމު މަޖިލީހުގެ ހައި-ލެވެލް ހަފުތާގައި ބައިވެރިވުމުގެ ފުރުސަތު ލިބޭނެ،" ސްޓޭޓް ޑިޕާޓްމަންޓުގެ ތަރުޖަމާނު ބީބީސީއަށް ވިދާޅުވި އެވެ.
އޭނާ އިތުރަށް ވިދާޅުވީ، އެ ވަފުދުގެ ބޭފުޅުން ދަތުރުފަތުރު ކުރުމުގައި ހުރަސްތަކެއް ހުންނާނެ ކަމަށާއި، އެމެރިކާގެ ސިޔާސަތާ އެއްގޮތްވާ ގޮތުގެ މަތިން އަގުބޮޑު މުދަލާއި އެ ނޫންވެސް ބައެއް ތަކެތި ގަތުން މަނާވާނެ ކަމަށެވެ. އަދި މިއަހަރުގެ ވަފުދަކީ މިދިޔަ އަހަރަށްވުރެ ކުޑަ ވަފުދެއްކަން ވެސް އޭނާ ފާހަގަކުރެއްވި އެވެ.
މިދިޔަ އަހަރު ވެސް އދ. އަށް ވަޑައިގެންނެވި އީރާނުގެ ޑިޕްލޮމޭޓުންނަށް "ކޮސްޓްކޯ" ފަދަ ހޯލްސޭލް ފިހާރަތަކުން ވިޔަފާރިކުރުން އޮތީ މަނާކޮށްފަ އެވެ. މީގެ އިތުރުން ގަހަނާ އާއި، ރާ އަދި ކާރު ފަދަ އަގުބޮޑު މުދާ ގަތުމުގެ ކުރިން އެމެރިކާ ސަރުކާރުގެ ހުއްދަ ހޯދުމަށް ވެސް އޭރު އޮތީ ލާޒިމުކޮށްފަ އެވެ.
ސްޓޭޓް ޑިޕާޓްމަންޓުގެ ތަރުޖަމާނު ޓޮމީ ޕިގޮޓް ވިދާޅުވީ، އީރާނުގެ ރައްޔިތުން ފެނާއި ކަރަންޓުގެ ދަތިކަމާއި، "ލާއިންސާނީ އަނިޔާވެރިކަމާއި" އަދި އިންތިހާއަށް އުފުލެމުންދާ ތަކެތީގެ އަގުތަކާ ކުރިމަތިލަމުންދާއިރު، އެ ގައުމުގެ ޑިޕްލޮމޭޓުން އެމެރިކާގައި "ބޮޑެތި ވިޔަފާރިތައް ކުރަން" ދޫކޮށްނުލާނެ ކަމަށެވެ.
މީގެ އިތުރުން، އދ. ގެ އާންމު މަޖިލީހުގައި ބައިވެރިވުމަށް ފަލަސްތީނުގެ ރައީސް މަހްމޫދު އައްބާސް އާއި އެ ގައުމުގެ ވަފުދަށް އެމެރިކާ އިން ވިސާ ދޭން އިންކާރުކޮށްފައިވާކަން ބީބީސީއަށް ވަނީ އެނގިފައެވެ.
ފަލަސްތީނުގެ ވަފުދަކީ ގާނޫނީ ސައްހަކަން އޮތް ވަފުދެއް ކަމަށް ބަލައިނުގަންނަ ކަމަށް ވައިޓް ހައުސް ބުނާއިރު، އެ ބޭފުޅުންނަށް ވިސާ ދޭން އިންކާރު ކުރި މިއީ ޖެހިޖެހިގެން ދެވަނަ އަހަރެވެ.
