ދެކުނު އެފްރިކާގައި އާންމުކޮށް ދުވަންދާ މަގަކުން މިދިޔަ ހަފުތާގައި ގެއްލުނު އަންހެނަކު ހޯދުމަށް މުޅި ގައުމުގައި އިއުލާނުކޮށްފައި ވަނިކޮށް، އޭނާ މަރުވެފައިވާކަން އެ ގައުމުގެ ފުލުހުން ކަށަވަރުކޮށްދީފި އެވެ.
ޖޯހަނަސްބާގްގެ އިރުމަތީ ސަރަހައްދަކުން މިދިޔަ ހޮނިހިރު ދުވަހު ފެނުނު ހަށިގަނޑަކީ އެލިޒަބަތު މޮސެލަކްގޯމޯގެ ހަށިގަނޑުކަން އޭނާގެ އާއިލާއިން ހޯމަ ދުވަހު ވަނީ ކަށަވަރުކޮށްދީފަ އެވެ. ކެމްޕްޓަން ޕާކް ސަރަހައްދުން ފާއިތުވި ދުވަސްތަކުގައި ބޮޑެތި އަނިޔާތަކަކާއެކު ފެނުނު ފަސް އަންހެނުންގެ ހަށިގަނޑުގެ ތެރޭގައި މޮސެލަކްގޯމޯގެ ހަށިގަނޑު ހިމެނެ އެވެ.
މި މަރުތަކަކީ ސިލްސިލާ ގާތިލެއްގެ އަމަލުތަކެއް ކަމަށް އަދި ނުބެލެވޭ ކަމަށް ފުލުހުން ބުނި ނަމަވެސް، މި ހުރިހާ މަރެއްގައި ހުރި އެއްގޮތް ކަންތައްތަކަކީ އާންމުންނަށް އިންޒާރު ނެރެންޖެހޭ ވަރުގެ ނުރައްކާތެރި ކަންތައްތަކެއް ކަމަށް ފުލުހުން ފާހަގަކުރި އެވެ.
ކެމްޕްޓަން ޕާކް ސަރަހައްދުގައި އުޅޭ އަންހެނުން، ވަކިން ހާއްސަކޮށް މީހުން މަދު އެކަހެރި ސަރަހައްދުތަކުގައި އެކަނި ހިނގާފައި ނުވަތަ ދުވަން ނުދިއުމަށް ފުލުހުން ވަނީ އިލްތިމާސްކޮށްފަ އެވެ.
ޔޫއެން ވިމެންގެ ތަފާސްހިސާބުތަކުން ދައްކާ ގޮތުގައި، ދެކުނު އެފްރިކާއަކީ ދުނިޔޭގައި ޖިންސީ ތަފާތުކުރުންތަކުގެ ސަބަބުން ހިންގާ އަނިޔާވެރި އަމަލުތައް އެންމެ ގިނަ އެއް ގައުމެވެ. އެ ގައުމުގައި އަންހެނުން މަރާ ނިސްބަތް ދުނިޔޭގެ އެވްރެޖަށް ވުރެ ފަސް ގުނަ އިތުރެވެ.
މި މަރުތައް ތަހުގީގު ކުރުމަށް ފުލުހުން ހާއްސަ ޓާސްކް ފޯހެއް އެކުލަވާލާފައިވީ ނަމަވެސް، މޮސެލަކްގޯމޯގެ މަރާއި ވިދިވިދިގެން ފެނުނު ހަށިގަނޑުތަކުގެ ސަބަބުން ދެކުނު އެފްރިކާގެ ރައްޔިތުންގެ މެދުގައި ވަނީ ބޮޑު ބިރުވެރިކަމަކާއި ނުރުހުމެއް އުފެދިފަ އެވެ.
